3
1 Basudara e, coba kamong pikir bae-bae bagemana Allah Bapa paleng sayang katong. Antua pung sayang par katong ni paleng basar sampe Antua panggel katong ni Antua pung anana. La itu tu memang batul. Katong ni Allah pung anana! Mar, orang-orang yang hidop iko dunya pung mau seng mangarti kalo katong ni Antua pung anana. Barang, dong seng kanal Allah Bapa. 2 Basudara yang beta sayang! Sakarang katong ni Allah pung anana, mar katong balong tau parsis nanti katong jadi bagemana. Cuma yang katong tau tu, waktu Yesus datang kombali ka dunya, katong nanti jadi sama macang deng Antua. Barang, katong nanti lia Antua batul-batul bagemana. 3 Jadi, sapa sa dari kamong yang harap par jadi macang deng Kristus, dia musti jaga diri bae-bae tarus biar jang biking dosa. Dia musti macang deng Kristus yang seng bardosa.4 Sapa sa yang biking dosa tarus, dia tu su malawang Tuhan pung parenta. Barang, dosa tu sama sa deng malawang Tuhan pung parenta. 5 Kamong tau kalo Kristus datang ka dunya par hapus katong pung dosa-dosa.* Kamong jua tau kalo Antua seng parna biking dosa. 6 Jadi sapa sa yang satu hati deng Antua, dia seng tetap biking dosa. Mar sapa yang tetap biking dosa, dia tu seng tau Kristus tu sapa, deng dia tu jua batul-batul seng kanal Antua.
7 Jadi ananaa e, jaga diri bae-bae biar seng ada orang yang bisa parlente kamong kata kalo biking dosa tu seng apapa. Barang, sapa sa yang iko Tuhan pung mau, dia tu pung hidop batul macang deng Yesus Kristus yang pung hidop batul lai. 8 Mar sapa yang biking dosa tarus, dia tu Setang pung Raja pung ana. Barang dari waktu dunya ni balong jadi lai, Setang pung Raja su biking dosa. Tagal itu, Allah pung Ana datang ka dunya par kasi ancor samua yang Setang pung Raja su biking.
9 Sapa sa yang su jadi Allah pung ana, dia seng biking dosa tarus tagal Antua pung tabiat ada dalang dia. Dia su jadi Antua pung ana, jadi dia pasti seng biking dosa tarus. 10 Jadi, deng cara bagini katong bisa tau bae-bae sapa Allah pung anana deng sapa Setang pung Raja pung anana: Sapa yang seng iko Allah pung mau deng seng sayang dia pung basudara yang iko Yesus, dia tu bukang Allah pung ana.
Orang parcaya musti baku sayang
3:11-18
11 Basudara e! Waktu partama kali kamong parcaya Yesus Kristus, kamong su dengar Allah pung pasáng yang bilang kalo katong musti baku sayang satu deng laeng.* 12 Jang sama deng Adam deng Hawa pung ana Kain. Dia tu Setang pung Raja pung ana sampe dia bunu dia pung ade. Mangapa kong dia bunu dia pung ade? Tagal samua yang dia biking tu jahat, mar samua yang dia pung ade biking tu batul.* 13 Jadi basudara yang iko Yesus e, jang herang kalo orang-orang yang hidop iko dunya pung mau binci kamong.
14 Dolo, katong macang orang yang su mati, tagal katong tapisa dari Allah. Mar sakarang, katong su hidop tarus-tarus deng Allah, tagal katong su satu hati deng Antua. Katong tau soal ini, tagal sakarang ni katong sayang katong pung basudara yang iko Yesus. Sapa yang seng sayang dia pung basudara yang iko Yesus, dia macang deng orang yang su mati. Dia masi tapisa dari Allah. 15 Sapa yang binci dia pung basudara yang iko Yesus, dia tu sama deng pambunu. La pambunu seng bisa hidop tarus-tarus deng Allah. Kamong tau to?
16 Basudara e! Katong bisa tau bagemana katong musti batul-batul sayang orang laeng kalo katong lia bagemana Yesus sayang katong. Antua kasi Antua pung hidop par kasi salamat katong. Jadi katong jua musti sayang katong pung basudara yang iko Yesus. Labe-labe lai, katong musti sayang dong, mala sampe kasi katong pung hidop par dong lai. 17 Kalo ada orang yang hidop cukup la dia tau kalo dia pung basudara ada susa mar seng pung hati pait sadiki lai par tolong dong, bagemana kong dia bisa bilang kalo dia tu sayang Allah? Seng bisa to? 18 Anana e, jang cuma bilang di mulu sa kalo katong baku sayang, mar katong musti batul-batul biking akang deng cara baku tolong.
Kalo iko Allah pung mau, katong pung hati tenang waktu sombayang par Antua
3:19-24
19 Basudara samua, kalo katong baku sayang satu deng laeng, katong bisa tau kalo katong ni Allah pung anana yang hidop iko Allah pung ajarang yang batul. Kalo katong batul-batul baku sayang, katong pung hati tenang waktu katong sombayang par Antua. 20 Biar kata katong pung hati tudu kalo katong ni orang bardosa, katong seng parlu balisa. Barang, Allah tau labe banya dari katong pung hati. Jadi Antua tau kalo katong baku sayang. Antua tau samua-samua yang katong biking.
21 Basudara yang beta sayang! Kalo katong pung hati seng tudu katong macang bagitu, katong seng parlu taku waktu sombayang par Allah. 22 La apa sa yang katong minta dari Antua, Antua nanti kasi akang par katong. Barang, katong iko Antua pung parenta deng biking Antua pung hati sanang. 23 Parenta yang Antua kasi tu: Katong musti parcaya Allah pung Ana Yesus Kristus deng katong musti baku sayang satu deng laeng macang deng parenta yang Antua su kasi par katong.*
24 Sapa yang iko Allah pung parenta-parenta tu, dia satu hati tarus deng Antua la Antua jua satu hati tarus deng dia. Katong tau kalo Antua su satu hati deng katong tagal Antua su kasi Antua pung Roh par katong.