Yesus mati biar Allah kasi ampong orang pung dosa-dosa
2:1-6
2
1 Ananaa e, beta tulis samua ni par kamong biar kamong jang biking dosa. Mar kalo ada dari kamong yang biking dosa, Allah nanti kasi ampong dia. Barang ada Satu Orang yang nanti badiri di muka Allah Bapa par minta Antua kasi ampong katong pung dosa-dosa. Orang tu Yesus Kristus. Antua seng parna biking dosa. 2 Antua mati di kayo salib par tabus katong pung dosa-dosa. Mar bukang cuma katong pung dosa-dosa sa. Antua jua mati par tabus samua orang yang ada di dunya ni pung dosa-dosa lai.3 Basudara e! Kalo katong iko Allah pung parenta samua, itu su kasi unju kalo katong ni orang-orang yang batul-batul kanal Antua. 4 Jadi sapa sa yang bilang kalo dia kanal Allah mar seng iko Antua pung parenta, dia tu mulu parlente deng seng mau tau deng Antua pung ajarang yang batul. 5-6 Mar sapa sa yang iko Antua pung parenta, dia tu batul-batul sayang Antua. Jadi sapa sa yang bilang kalo dia su satu hati deng Antua, dia pung cara hidop musti sama deng Yesus Kristus pung cara hidop. Ini ni yang kasi unju par katong kalo katong su satu hati deng Allah.
Orang yang hidop dalang tarang
2:7-14
7 Basudara yang beta sayang, beta seng tulis parenta baru par kamong, mar parenta yang kamong su parna dengar dari Allah pung ajarang waktu kamong baru partama kali parcaya Kristus. Parenta tu soal kamong musti baku sayang.* 8 Mar ada hal baru lai yang beta mau tulis soal parenta par baku sayang ni. Hal yang baru tu, Yesus su batul-batul biking akang dalang Antua pung hidop deng kamong jua su biking akang lai. Barang, kamong su kasi tinggal kajahatang la su hidop bae-bae macang deng orang yang kaluar dari galap la pi ka tarang.
9 Sapa yang bilang kalo dia salalu biking apa yang batul macang deng orang yang hidop dalang tarang mar masi binci dia pung basudara yang iko Yesus, itu sama sa dia tu masi hidop dalang dosa macang deng orang yang hidop dalang galap. 10 Sapa yang sayang dia pung basudara yang iko Yesus, dia tu su hidop dalang tarang. Jadi, seng ada apapa dalang dia pung hidop yang bisa biking dia bardosa. 11 Mar sapa yang binci dia pung basudara yang iko Yesus, dia tu hidop dalang galap. Dia bajalang raba-raba jalang tagal galap biking sampe dia seng bisa dapa lia apapa.
12 Anana e! Beta tulis samua ni par kamong,
barang Allah su kasi ampong kamong pung dosa-dosa
tagal apa yang Kristus su biking.
13 Mama-mama deng bapa-bapa e!
Beta tulis samua ni par bapa-bapa dong,
tagal mama-mama deng bapa-bapa dong su kanal Yesus Kristus yang su ada dari waktu Allah balong biking dunya ni lai.
Anana muda e! Beta tulis samua ni par kamong,
tagal kamong su kasi kala Setang pung Raja.
14 Anana e! Beta tulis samua ni par kamong,
tagal kamong su kanal Allah, katong pung Bapa.
Mama-mama deng bapa-bapa e!
Beta tulis samua ni par mama-mama deng bapa-bapa dong,
tagal mama-mama deng bapa-bapa dong su kanal Yesus Kristus yang su ada dari waktu Allah balong biking dunya ni lai.
Anana muda e! Beta tulis samua ni par kamong,
tagal kamong pung parcaya par Allah kuat paskali.
Kamong jua iko Antua pung ajarang tarus deng su kasi kala Setang pung Raja.
Jang iko dunya ni pung mau
2:15-17
15 Jadi basudara e, jang sayang dunya ni deng apa sa yang bukang Allah Bapa pung mau. Kalo sapa biking bagitu, dia tu batul-batul seng sayang Antua. 16 Barang, apa sa yang bukang Antua pung mau, akang asal dari dunya ni. Akang bukang dari apa yang katong pung Allah Bapa mau par katong biking. Samua yang bukang Antua pung mau tu macang bagini: hidop par biking sanang diri sandiri, asal mata lia sa la baringing, deng mangarti tagal rasa ada pung apapa. 17 Dunya ni deng apa sa yang bukang Antua pung mau tu nanti seng ada lai. Mar sapa yang biking Allah pung mau, dia nanti hidop tarus-tarus deng Antua.
Orang-orang yang musu Yesus Kristus
2:18-27
18 Anana e, beta mau bilang par kamong kalo seng lama lai dunya ni su mau kiamat. Kamong inga ka seng? Katong su parna bilang kalo waktu dunya su mau kiamat, satu orang yang musu Yesus Kristusb nanti datang. Mala sakarang ni jua su ada banya orang yang musu Yesus Kristus. Ini jadi tanda kalo dunya ni batul-batul su mau kiamat. 19 Dong yang musu Antua tu dolo ada sama-sama deng katong yang parcaya Kristus, mar sakarang dong su pi kasi tinggal katong.c Dong seng parna batul-batul parcaya Kristus. Kalo dong batul-batul katong pung basudara yang iko Yesus, dong pasti masi ada sama-sama deng katong. Mar dong kaluar kasi tinggal katong. Itu tu tanda kalo dong tu bukang katong pung basudara yang iko Yesus.
20 Mar Kristus yang seng bardosa tu su kasi Allah pung Roh par kamong. Tagal itu, kamong samua bisa tau Allah pung ajarang yang batul. 21 Jadi, beta tulis samua ni par kamong bukang tagal kamong seng tau Allah pung ajarang yang batul, mar tagal kamong batul-batul su tau akang. Kamong jua su tau kalo dalang Allah pung ajarang tu seng ada apapa yang seng batul.
22 Basudara samua, sapa yang bilang kalo Yesus tu bukang Orang yang Allah su Angka par Kasi Salamat Manusia, dia tu paleng parlente paskali. Orang yang bilang bagitu tu, dia batul-batul musu Kristus. Dia tu manyangkal Allah Bapa deng Allah pung Ana Yesus Kristus. 23 Sapa sa yang manyangkal Allah pung Ana Yesus Kristus, dia tu seng satu hati deng Allah Bapa. Mar sapa yang mangaku Allah pung Ana Yesus Kristus, dia tu jua satu hati deng Allah Bapa.
24 Jadi, kamong musti pegang kuat-kuat tarus ajarang yang batul soal Yesus yang kamong su dengar waktu partama kali kamong parcaya Antua. Kalo kamong pegang ajarang yang batul tu kuat-kuat tarus dalang kamong pung hati, kamong nanti satu hati tarus deng Allah Bapa deng Antua pung Ana Yesus Kristus. 25 Ini ni janji yang katong su tarima dari Yesus: Katong nanti hidop tarus-tarus deng Antua.
26 Basudara samua, beta tulis samua ni par kasi inga kamong soal dong yang su kaluar kasi tinggal katong yang parcaya Kristus. Dong tu ada cari jalang par parlente kamong deng ajarang yang seng batul. 27 Mar, dong seng bisa parlente kamong, tagal Kristus su kasi Allah pung Roh par kamong la Allah pung Roh ada dalang kamong. Jadi, seng parlu ada orang laeng lai par kasi balajar kamong soal ajarang yang dong anggap tu batul, tagal Allah pung Roh sandiri yang kasi balajar kamong soal samua yang batul tu. La apa yang Allah pung Roh ajar, samua tu batul, seng ada yang seng batul. Tagal itu, kamong musti hidop satu hati deng Yesus Kristus tarus sama deng apa yang Allah pung Roh su ajar par kamong.
Allah pung anana
2:28—3:10
28 Anana e, kamong musti hidop satu hati deng Yesus Kristus tarus. Kamong musti hidop macang bagitu biar waktu Antua datang kombali ka dunya, katong samua seng takotang ka malu waktu baku dapa deng Antua. 29 Kamong su tau kalo Yesus Kristus iko Allah Bapa pung mau. Tagal itu, kamong jua musti tau kalo sapa sa yang salalu iko Antua pung mau, dia tu Antua pung ana.