Yohanis
pung Surat Partama
Yesus Kristus tu Allah pung Kata-Kata yang kasi hidop par orang-orang
1:1-4
1
1 Par basudara samua.Basudara e, beta tulis surat ni par kamong soal Antua yang dapa panggel par Allah pung Kata-Kata. Antua tu yang kasi hidop par orang-orang. Antua su ada dari waktu dunya ni balong ada lai.* Antua datang ka dunya la beta deng utusang-utusang laeng lai su dengar Antua pung suara. Katong lia Antua deng katong pung mata kapala sandiri. Katong sandiri su lia Antua bae-bae deng su pegang Antua deng katong pung tangang. 2 Antua yang kasi hidop par orang-orang tu su datang ka dunya ni la katong su lia Antua. Tagal itu, katong jadi saksi deng kasi tau par kamong apa yang batul soal Antua yang bisa biking orang hidop tarus-tarus deng Allah. Dari waktu dunya ni balong ada lai, Antua su ada sama-sama deng Allah Bapa. La sakarang, Allah su kasi unju Antua par katong samua.* 3 Katong su lia Antua. Katong jua su dengar Antua pung suara. Antua tu yang katong ada kasi tau par kamong biar kamong satu hati deng katong tarus, deng biar katong samua jadi satu hati deng Allah Bapa deng Antua pung Ana Yesus Kristus. 4 Jadi, beta tulis samua ni par kamong biar katong samua pung hati labe tamba sanang.
Orang parcaya musti hidop dalang tarang
1:5-10
5 Basudara e, pasáng yang katong su dengar dari Yesus Kristus tu, katong mau bilang akang par kamong lai. Pasáng tu bagini, “Allah tu tarang. Antua salalu biking apa yang batul. Antua seng parna biking dosa, tagal seng ada galap sadiki lai di Antua.” 6 Jadi, kalo katong bilang katong satu hati deng Allah mar katong masi biking dosa tarus macang orang yang hidop dalang galap, itu sama sa katong parlente putar bale deng seng iko Allah pung ajarang yang batul. 7 Mar, kalo katong hidop dalang tarang macang deng Allah yang ada dalang tarang, katong laeng deng laeng satu hati. Deng Antua jua kasi ampong katong pung dosa-dosa samua tagal Antua pung Ana Yesus pung dara su tumpa di kayo salib.
8 Kalo katong bilang katong seng parna biking dosa, katong su parlente katong pung diri sandiri deng su kasi unju kalo katong seng mau tau deng Allah pung ajarang yang batul. 9 Mar kalo katong mangaku katong pung dosa-dosa par Allah, Antua nanti kasi ampong katong pung dosa-dosa tu deng kasi barsi katong pung hati dari samua yang jahat. Antua kasi ampong katong pung dosa-dosa tagal Antua pasti biking samua yang Antua su bilang par katong, deng tagal Antua biking apa yang batul tarus. 10 Mar kalo katong bilang katong seng bardosa, itu sama sa katong su bilang kalo Allah tu mulu parlente. Barang, Antua bilang kalo samua orang tu bardosa. Kalo katong bilang bagitu, itu pung arti katong seng mau tau deng Antua pung ajarang.