Petrus
pung Surat Kadua
Kata-Kata Partama
Sapa yang tulis surat ni: Orang yang tulis surat 2 Petrus ni Simon Petrus (1:1, 3:1). Dia tulis surat 2 Petrus ni waktu dia ada dalang bui dan su tau kalo dia nanti dapa hukumang mati (1:14). Lia jua Kata-kata Partama surat 1 Petrus.
Surat ni par sapa: Petrus seng bilang kalo dia tulis surat ni par sapa. Mar, banya orang yang pintar Alkitab bilang kata surat ni dapa tulis par orang-orang yang su parcaya Yesus Kristus (1:1) di daera Asia Kacil (3:1).
Surat ni sadiki beda deng surat 1 Petrus, mar akang pung isi amper sama deng surat Yudas. Surat 2 Petrus deng Yudas banya bicara soal orang-orang yang kasi balajar ajarang yang seng batul dalang jamaat sampe banya dari jamaat jadi bingong. Lia 2 Petrus 2 deng Yudas 4-18.
Mangapa Petrus tulis surat ni: Tagal Petrus tu pamimping jamaat-jamaat Kristen deng tau kalo seng lama lai dia su mau mati, jadi dia tulis surat ni par kasi nasehat orang-orang parcaya biar dong tetap hidop iko Allah pung mau deng pegang Antua pung ajarang yang batul tu kuat-kuat, tagal dong su parcaya Yesus (1:3-21, 3:17-18).
Dia jua tulis surat ni par kasi inga orang-orang parcaya biar dong seng anyo iko ajarang-ajarang yang seng batul. Dong musti bale balakang dari ajarang-ajarang yang macang bagitu, deng lawang dong yang kasi balajar akang (2:1-22). Dalang surat ni, dia kasi inga orang-orang parcaya kalo Yesus pasti datang kombali ka dunya par jadi hakim par samua yang ada di dunya. Sapa sa yang hidop dame deng Allah, Antua pasti kasi salamat dong (3:1-16).
Surat ni tabage par babarapa bagiang:
| 1:1-2 | Tabea |
| 1:3-15 | Bagemana orang parcaya musti hidop |
| 2:1-22 | Ati-ati deng juru-juru bicara parlente deng guru-guru parlente |
| 3:1-16 | Tuhan Yesus nanti bale kombali |
| 3:17-18 | Petrus tutu dia pung surat |