Petrus
pung Surat Kadua
Tabea
1:1-2
1
1 Par basudara samua yang su parcaya Yesus Kristus sama deng katong. Antua tu Allah deng Orang yang Kasi Salamat Katong. Antua yang biking sampe katong samua parcaya Antua, tagal apa yang Antua biking tu batul.Tabea! Beta ni Simon Petrus, Yesus Kristus pung jongos deng utusang.
2 Beta minta biar Allah kasi berkat basar deng dame batambong-tambong par kamong samua, tagal kamong su kanal Antua deng Yesus, Tuhan yang katong somba.
Orang-orang parcaya pung cara hidop
1:3-15
3 Basudara e, Tuhan Allah pake Antua pung kuasa par kasi samua yang katong parlu biar katong bisa hidop iko Antua pung mau. Antua biking bagitu tagal katong su kanal Antua yang su panggel katong par jadi Antua pung orang-orang deng tagal Antua hebat paskali deng pung hati bae par katong. 4 La tagal Antua hebat paskali deng pung hati bae, Antua su kasi Antua pung janji-janji yang luar biasa deng yang paleng panting tu par katong. Antua biking bagitu biar kamong pung tabiat sama deng Antua, deng biar kamong bisa kasi tinggal napsu-napsu jahat yang biking ancor manusia di dunya ni. 5 Jadi kamong jang cuma parcaya Yesus sa, mar kamong jua musti usaha sunggu-sunggu par biking apa yang bae lai. La jang cuma usaha par biking apa yang bae sa, mar kamong jua musti usaha sunggu-sunggu par tau apa yang bae deng apa yang jahat lai. 6 La jang cuma usaha par tau apa yang bae deng apa yang jahat sa, mar kamong jua musti tau jaga diri bae-bae lai. La jang cuma tau jaga diri bae-bae sa, mar kamong jua musti tau tahang hati waktu susa deng sangsara lai. La jang cuma tau tahang hati sa, mar kamong jua musti hidop iko Allah pung mau lai. 7 La jang cuma hidop iko Allah pung mau sa, mar kamong jua musti baku sayang deng basudara laeng yang parcaya Yesus lai. La jang cuma baku sayang deng basudara laeng yang parcaya Yesus sa, mar kamong jua musti sayang samua orang lai. 8 Kalo kamong labe hari labe tamba biking samua tu, kamong pung hidop seng parcuma mar ada pung hasil. Itu tu tanda kalo kamong batul-batul kanal Tuhan Yesus Kristus yang katong somba. 9 Mar sapa sa yang seng biking samua tu, dia sama deng orang yang pung mata su kabor ka su buta. Barang, dia su seng bisa lia lai kalo Allah su kasi barsi dia pung diri dari dia pung dosa-dosa yang dolo dia biking.
10 Jadi basudara e, kamong musti usaha sunggu-sunggu par biking samua tu biar ada bukti kalo kamong tu memang batul-batul Allah pung orang-orang yang Antua su panggel deng su pili. Barang kalo kamong biking akang, kamong pung parcaya par Antua tetap kuat, seng tagoyang sadiki lai. 11 La deng bagitu, Antua nanti tarima kamong deng hati yang paleng sanang waktu maso dalang Yesus Kristus pung karajaang yang ada tarus-tarus. Yesus tu Tuhan yang katong somba deng Orang yang Kasi Salamat Katong.
12 Tagal itu sampe beta mau tetap kasi inga samua tu par kamong, biar kata kamong su tau akang deng sunggu-sunggu pegang Allah pung ajarang yang batul yang kamong su tarima tu. 13 Sakarang, waktu beta masi hidop ni,a beta pikir beta musti kasi inga kamong tarus soal samua tu. 14 Barang, beta tau kalo seng lama lai Tuhan su mau panggel beta pulang, sama deng apa yang Tuhan Yesus Kristus yang katong somba su bilang par beta. 15 Jadi beta mau usaha sunggu-sunggu par kasi inga samua tu par kamong, biar kalo beta su pulang, kamong masi inga akang tarus.
Apa yang Allah pung Tulisang su bilang soal Yesus Kristus tu batul
1:16-21
16 Basudara samua, waktu katong kasi tau par kamong soal Tuhan Yesus Kristus yang katong somba tu pung kuasa yang hebat deng soal Antua nanti bale kombali ka dunya ni, itu katong seng karang-karang carita. Katong su lia Antua pung kuasa yang hebat deng katong pung mata kapala sandiri. 17 Katong su lia bagemana Yesus dapa puji deng hormat dari Allah Bapa waktu Antua yang Paleng Hebat Paskali tu bilang kata, “Ini ni Beta pung Ana yang Beta paleng sayang. Dia biking Beta pung hati paleng sanang.” 18 Katong sandiri dengar suara dari sorga tu waktu katong ada sama-sama deng Yesus di atas gunung yang kudus.*
19 Tagal apa yang katong lia deng dengar tu, katong labe tamba parcaya lai par Allah pung kata-kata soal Kristus yang Antua pung juru-juru bicara su parna bilang dolo-dolo tu. Apa yang dong bilang tu, akang sama deng palita yang manyala di tampa yang galap. Jadi, kamong musti taru kira deng inga akang bae-bae sampe nanti waktu Yesus Kristus bale kombali ka dunya la kamong bisa mangarti samua soal Antua deng jelas. Antua bale kombali sama deng matahari nai ka bintang pagi yang manyala par kasi tarang dunya. 20 Mar yang paleng panting, kamong musti tau kalo Allah pung pasáng yang Antua pung juru-juru bicara su bilang dalang Antua pung Tulisang tu, sapa sa seng bole mangarti akang iko dong pung pikirang sandiri.b 21 Barang, Allah pung pasáng tu seng parna lahir dari manusia pung mau, mar dari Allah pung Roh yang karja dalang dong pung hati sampe dong bisa kasi tau akang par orang-orang.