Petrus
pung Surat Partama
Kata-Kata Partama
Sapa yang tulis surat ni: Orang yang tulis surat 1 Petrus ni Simon Petrus, satu dari Yesus pung sapulu dua murid (Matius 10:2; 1 Petrus 1:1; 2 Petrus 3:1). Dia tu pamimping dari samua jamaat Kristen, yang pung pusat di kota Yerusalem. Dia seng tulis surat ni sandiri, mar minta Silas par tulis akang ganti dia (5:12).
Surat ni par sapa: Surat 1 Petrus ni par orang-orang parcaya yang tinggal talamburang di lima propinsi di daera Asia Kacil (1:1), yang sakarang ada di negara Turki.
Waktu itu, orang-orang Kristen di sana dapa banya macang sangsara (1:6): orang biking busu dong pung nama kata dong tu orang jahat (2:12), dong dapa hojat tagal parcaya Kristus (3:16, 4:4), deng dong dapa binci tagal biking apa yang bae (2:15, 3:14).
Mangapa Petrus tulis surat ni: Petrus tulis surat ni par kasi inga, kasi tau, deng kasi nasehat orang-orang parcaya soal bagemana dong musti hidop di tenga-tenga orang-orang yang seng parcaya. Dong musti hidop iko Allah pung mau, bukang iko dong pung napsu jahat macang dolo waktu balong parcaya Kristus (4:1-6). Dong jua musti hidop iko Yesus pung conto yang Antua su kasi par dong (2:18-25), tagal Antua tu batu pandasi yang paleng panting par dong (2:4-10).
Dia jua tulis surat ni par kasi nasehat dong par sabar tarus biar kata dong dapa susa deng sangsara tagal parcaya Yesus (3:13-22, 4:12-19). Dia bilang kalo orang-orang parcaya di samua tampa di dunya jua dapa sangsara yang sama deng dong. Mar, sangsara tu seng lama lai abis tagal Allah nanti biking samua jadi bae deng biking dong labe tamba kuat, seng tagoyang, deng labe sunggu-sunggu parcaya Antua (5:9-10). Dalang surat ni, dia bilang kalo dong tu paleng baruntung kalo dong dapa hina tagal iko Kristus. Barang, itu tu tanda kalo Allah pung Roh yang hebat ada dalang dong (4:14).
Surat ni tabage par babarapa bagiang:
| 1:1-2 | Tabea |
| 1:3-12 | Yesus kasi salamat orang parcaya |
| 1:12—5:11 | Bagemana orang parcaya musti hidop |
| 5:12-14 | Petrus tutu dia pung surat |