Nasehat par pamimping-pamimping jamaat deng samua orang parcaya
5:1-11
5
1 Sakarang, beta mau bicara par pamimping-pamimping jamaat yang ada di situ. Basudara e, beta ni pamimping jamaat sama deng kamong lai. Beta su lia deng mata kapala sandiri bagemana Kristus susa deng sangsara. Beta jua nanti dapa bagiang dari Antua pung kuasa yang hebat paskali, waktu Antua bale kombali ka dunya. Jadi, beta mau minta deng sunggu-sunggu dari kamong: 2 Jaga deng kalesang Allah pung orang-orang yang Antua parcaya par kamong jaga tu bae-bae, macang deng orang yang jaga deng kalesang dia pung bos pung domba-domba. Allah mau kamong biking akang deng hati sanang, bukang deng hati barát. Jang biking akang tagal mau cari untung, mar tagal batul-batul mau tolong dong.* 3 Jang anggap kamong pung diri macang deng tuang basar la parenta orang-orang yang Allah su parcaya par kamong jaga tu iko suka. Mar kamong musti jadi conto yang bae par dong. 4 La waktu Orang Jaga Domba yang Paleng Hebat tu bale kombali ka dunya, kamong nanti dapa hadia yang luar biasa yang seng bisa ancor deng yang ada tarus-tarus.5 La par laki-laki yang masi muda, beta minta deng sunggu-sunggu dari kamong par dengar-dengarang pamimping-pamimping jamaat. Kamong samua musti anggap diri seng pung arti apapa par baku tolong satu deng laeng, tagal Allah pung Tulisang ada bilang kata,
“Allah lawang orang yang sombong,
mar Antua tolong orang yang anggap diri seng pung arti apapa.”*
6 Tagal itu, kamong musti anggap diri seng pung arti apapa di muka Allah yang pung kuasa paleng hebat tu, biar Antua angka kamong par dapa puji deng hormat pas waktu yang Antua su ator.* 7 Bawa samua hal yang biking kamong pung hati susa tu par Allah, tagal Antua batul-batul paduli deng kamong.
8 Kamong musti jaga-jaga deng salalu siap par lawang Setang pung Raja yang jadi kamong pung musu tu. Dia ada bajalang kasana-kamari macang deng singa yang bataria basar-basar par cari orang-orang yang dia bisa talang. 9 Kamong musti lawang dia deng kamong pung parcaya yang kuat par Yesus Kristus. Barang, kamong tau kalo kamong pung basudara yang parcaya Yesus di samua tampa di dunya ni jua dapa susa deng sangsara sama deng kamong. 10 Mar susa deng sangsara tu seng lama. Abis itu, Allah yang salalu kasi unju Antua pung hati bae par manusia tu nanti biking samua jadi bae kombali par kamong. Antua jua nanti biking kamong labe tamba kuat, seng tagoyang, deng labe sunggu-sunggu parcaya Antua. Antua sandiri yang su panggel kamong par dapa hormat sama-sama deng Antua tarus-tarus, tagal kamong su satu hati deng Kristus. 11 Antua tu yang pung kuasa par samua-samua sampe tarus-tarus. Amin.
Petrus tutu dia pung surat
5:12-14
12 Basudara e, surat yang pende ni, Silasa yang bantu beta par tulis akang. Dia tu katong pung basudara yang parcaya Kristus deng yang katong bisa parcaya. Lewat surat ni beta mau kasi samangat deng kasi kuat kamong par parcaya kalo Allah batul-batul pung hati bae par kamong tarus. Jadi kamong musti pegang akang kuat-kuat.*
13 Basudara jamaat di kota Babel kiring hormat par kamong. Allah su pili dong par jadi Antua pung orang-orang sama deng kamong. Beta pung tamang Markus yang beta su anggap macang deng beta pung ana sandiri tu kiring hormat par kamong lai.* 14 Beta minta biar kalo kamong baku dapa, kasi salam satu deng laeng manis-manis.b
Beta minta biar Allah kasi dame par kamong samua yang su satu hati deng Kristus. Amin.
Hormat, Petrus