Yakobis
pung Surat
Kata-Kata Partama
Sapa yang tulis surat ni: Orang yang tulis surat Yakobis ni Yakobis, Yesus pung sudara (Markus 6:3; Galatia 1:19). Dia tu pamimping jamaat di Yerusalem (Galatia 2:9), deng paleng dapa hormat dari utusang-utusang yang laeng (Utusang pung Carita 21:18).
Surat ni par sapa: Dalang Yakobis 1:1 ada bilang kalo surat ni par “orang-orang Yahudi yang su parcaya Yesus, yang tinggal talamburang di sagala tampa di dunya”. Dong ni orang-orang parcaya yang dapa siksa dari orang-orang yang seng parcaya Yesus, la lari talamburang sampe ka Fenisia, pulo Siprus, deng Antiokia (Utusang pung Carita 8:1, 11:19). Banya dari dong jua yang hidop kurang-kurang (1:9).
Mangapa Yakobis tulis surat ni: Tagal Yakobis tu pamimping jamaat, dia tulis surat ni par kasi nasehat, kasi balajar, kasi kuat, deng tagor jamaat-jamaat yang tinggal talamburang deng yang hidop dalang susa tu (1:2-4, 12). Dia bilang dong par tarima susa deng sangsara yang dong dapa tagal dong pung parcaya tu deng hati sanang. Dia kasi nasehat dong par tahang hati tarus biar dong pung parcaya par Yesus Kristus tu batumbu deng baakar kuat-kuat (1:2-18, 5:7-11). Dia jua ada kasi nasehat banya lai par dong soal bagemana orang parcaya musti hidop.
Surat ni tabage par babarapa bagiang:
| 1:1 | Tabea |
| 1:2-18 | Tarima susa deng sangsara deng hati sanang |
| 1:19—2:26 | Jang cuma dengar Allah pung ajarang sa, mar biking akang dalang hidop |
| 3:1-18 | Jaga mulu deng cari tau apa yang batul-batul dari Allah |
| 4:1-17 | Jang tarika deng dunya ni pung mau |
| 5:1-20 | Macang-macang nasehat |