Pake katong pung mulu bae-bae
3:1-12
3
1 Basudara samua e, jang banya dari kamong yang mau jadi guru par Allah pung ajarang. Barang kamong tau, kalo katong yang ajar Allah pung ajarang seng biking apa yang katong ajar, Antua nanti hukum katong labe barát dari dong yang seng ajar Antua pung ajarang. 2 Memang katong samua ni jaga biking dosa. Mar kalo ada orang yang bisa jaga dia pung mulu waktu bicara, dia tu orang yang pung hidop batul, yang bisa ator dia pung diri bae-bae dalang samua hal. 3 Conto macang kuda. Kalo katong pasang tali kacil di akang pung mulu, katong bisa ator akang bajalang iko katong pung suka. La deng tali kacil sa katong bisa bawa binatang basar tu. 4 Conto laeng lai kapal. Biar kata kapal tu paleng basar deng anging kancang bisa bawa akang kasana-kamari, mar deng akang pung kamudi yang paleng kacil tu sa juru mudi bisa bawa kapal tu bajalang iko dia pung mau. 5 Bagitu lai deng mulu. Biar kata mulu tu kacil mar bisa jadi parkara basar kalo katong pake akang par makang puji diri sandiri. Coba lia api! Biar kata kacil sa mar akang bisa bakar utang basar satu sampe abis. 6 Sama deng api yang bakar utang satu sampe abis, bagitu lai deng katong pung mulu. Mulu tu bagiang dari katong pung badang yang bisa kasi ancor orang laeng kalo katong pake akang par bamaki, basumpa, deng bicara yang tarbae-tarbae. Kalo katong pake akang par hal-hal yang jahat tarus, akang bisa kasi ancor katong pung hidop. Barang, hal-hal jahat yang kaluar dari katong pung mulu tu, akang sama deng api yang asal dari naraka.7 Manusia bisa kasi jina binatang liar, burung-burung, binatang-binatang maraya, deng ikang-ikang. La memang manusia su biking bagitu. 8 Mar balong ada satu orang lai yang bisa kasi jina mulu. Mulu tu paleng jahat. Seng ada orang yang bisa ator akang. Akang pono deng racong yang bisa biking mati orang. 9 Katong pake akang par puji-puji Tuhan Allah, Bapa yang katong somba. Mar, katong jua pake akang par maki deng sumpa orang yang Allah su biking iko Antua pung model sandiri.* 10 Dari katong pung mulu yang sama, katong kasi kaluar kata-kata par puji Tuhan deng kata-kata par maki deng sumpa orang.
Sio basudara e, jang paskali macang bagitu! 11 Coba kamong pikir bae-bae! Masa ada aer tawar deng aer masing kaluar dari satu mata aer yang sama? Seng ada to! 12 Conto laeng lai basudara e, pohong ara pasti seng babua saitun ka pohong anggor pasti seng babua ara. Bagitu lai, mata aer yang kasi kaluar aer masing pasti seng kasi kaluar aer tawar. Bagitu lai deng katong pung mulu. Seng pantas paskali kalo katong pake akang par puji Tuhan la bale pake akang lai par maki deng sumpa orang.
Ajarang soal pikirang tajang yang batul-batul dari Allah
3:13-18
13 Basudara e, kalo ada dari kamong yang bilang kalo dia tu pung pikirang tajang deng tau apa yang sala deng apa yang batul, dia musti kasi unju akang dalang dia pung hidop yang bae. Dia musti randa hati deng hidop manis-manis deng orang, sama deng orang yang batul-batul mangarti banya hal. 14 Mar kalo kamong masi suka culas deng dalang hati masi suka inga diri sandiri, jang kamong sombong deng kamong pung mangarti banya tu la malawang Allah pung ajarang yang batul. 15 Sapa yang bilang kalo dia mangarti banya hal deng cara hidop macang bagitu, dia pung mangarti banya hal tu, akang seng datang dari Allah mar dari dunya, dari manusia pung napsu, deng dari Setang pung Raja pung mau. 16 Barang, kalo dia masi culas deng pikir diri sandiri, dia pasti bakalai deng orang laeng deng biking macang-macang kajahatang.
17 Mar orang yang mangarti banya hal yang batul-batul dari Allah, dia tu pung hati barsi, suka hidop dame deng orang, hidop manis deng orang, mau dengar orang laeng pung bicara, paduli deng orang yang susa, deng suka biking bae par orang. Dia jua seng barát sabala deng seng munafik. 18 Sapa yang suka hidop dame deng orang laeng, dia nanti biking orang laeng hidop dame lai. La akang pung hasil, dong samua hidop iko Tuhan pung mau.