Surat par Orang
Ibrani
Kata-Kata Partama
Sapa yang tulis surat ni: Dalang surat Ibrani ni seng bilang sapa yang tulis akang, mar katong bisa tau soal sapa yang tulis dari akang pung isi. Dia tu Timotius pung tamang (13:23) deng dengar Kabar Bae dari Yesus pung murid-murid (2:3). Dia tau batul soal budaya Yahudi, Alkitab Janji Lama, bahasa Yunani, deng gaya tulis yang bagus dalang bahasa tu.
Surat ni par sapa: Orang yang tulis surat Ibrani ni seng bilang kata surat ni par sapa. Mar, dari dia pung gaya tulis, katong bisa tau kalo surat ni par orang parcaya yang pung dara Yahudi, yang jua dapa panggel par orang Israel ka orang Ibrani. Tagal itu kong surat ni dapa panggel par surat Ibrani. Dia pake nats-nats deng banya conto dari Alkitab Janji Lama, deng bicara soal orang Yahudi pung budaya deng cara ibada par bicara soal Yesus. Orang-orang Yahudi yang parcaya ni ada susa deng sangsara tagal parcaya Yesus (10:32-34, 13:3, 13), deng bimbang deng dong pung parcaya par Yesus tagal dapa pangaru dari dong pung orang-orang Yahudi sandiri.
Mangapa surat ni dapa tulis: Surat ni dapa tulis par kasi kuat orang-orang Yahudi yang parcaya Yesus biar dong seng bimbang deng dong pung parcaya. Orang yang tulis surat ni bilang par dong kalo Yesus tu Allah pung Ana (1:2-4) deng Imam Basar yang orang parlu (2:17-18). Dia ajar dong kalo Yesus tu labe hebat dari malekat-malekat (1:5-14) deng dari Musa (3:1-6). Antua tu Imam Basar yang labe hebat dari imam-imam agama Yahudi, tagal Antua seng bardosa deng Antua karja dalang Tenda Sombayang yang batul yang ada di sorga, bukang Tenda Sombayang yang manusia biking (4:14—7:28). La lewat Antua, Allah ika janji yang baru deng manusia, janji yang labe hebat dari janji yang lama (8:1—10:18). Akang pung laste, dia jua kasi inga dong par pegang dong pung parcaya kuat-kuat (3:6, 14, 4:14, 10:23, 32-36), deng tahang hati dalang susa deng sangsara (12:4-13).
Surat ni tabage par babarapa bagiang:
| 1:1—2:18 | Yesus labe hebat dari juru-juru bicara deng malekat-malekat |
| 3:1—7:28 | Yesus labe hebat dari Musa deng orang Yahudi pung Imam-imam Basar samua |
| 8:1—10:18 | Yesus jadi katong pung Imam Basar yang bawa janji yang baru yang Allah ika deng manusia |
| 10:19—13:21 | Bagemana orang parcaya musti hidop |
| 13:22-25 | Kata-kata laste |