Paulus pung Surat par
Filemon
Tabea
1:1-3
1
1 Par Filemon yang beta deng Timotius sayang deng yang karja par Yesus Kristus macang deng katong.Tabea! Beta ni Paulus, yang ada maso bui tagal karja par Yesus Kristus. Hormat dari beta deng dari katong pung sudara Timotius. 2 Katong dua kiring hormat lai par Apfia, orang yang katong su anggap macang katong pung sudara parampuang sandiri. Hormat lai par Arkipus, yang barani sama deng katong par kasi tau Allah pung Kabar Bae macang deng tantara yang barani.* Hormat lai par basudara jamaat yang jaga bakumpul par ibada di ale pung ruma.
3 Katong minta biar Allah Bapa yang katong somba deng Tuhan Yesus Kristus kasi berkat basar deng dame par kamong samua.
Paulus minta dangke banya par Tuhan tagal Filemon
1:4-7
4 Filemon e, sabang kali beta sombayang par ale, beta salalu minta dangke banya-banya dari Allah yang beta somba. 5 Barang, beta su dengar dari orang-orang kalo ale sayang Allah pung orang-orang samua deng parcaya Tuhan Yesus tarus. 6 Beta sombayang biar waktu ale bakumpul sama-sama deng orang-orang parcaya laeng, kamong labe tamba satu hati tagal kamong mangarti samua yang bae yang Allah su kasi par katong. Kalo kamong satu hati, orang-orang nanti puji Kristus.
7 Sudara e, ale pung rasa sayang par Allah pung orang-orang biking sampe beta pung hati sanang deng kuat, tagal ale su biking Allah pung orang-orang pung hati sanang lai.
Paulus minta Filemon tarima Onesimus kombali
1:8-22
8-10 Filemon e, tagal ale sayang Allah pung orang-orang jadi beta mau minta ale biking apapa satu yang ale musti biking. Beta ni Yesus Kristus pung utusang, jadi beta pung hak par parenta ale biking akang. Mar tagal ale sayang Allah pung orang-orang deng tagal beta sayang ale, beta seng mau parenta ale. Beta cuma minta bae-bae dari ale. Beta su tua deng sakarang ada di dalang bui tagal beta karja par Yesus Kristus. Beta mau minta tolong soal Onesimus.a Waktu dia datang lia beta dalang bui, beta ajar dia soal Yesus Kristus sampe dia jadi parcaya. Tagal itu, beta su anggap dia sama deng beta pung ana sandiri. 11 Dolo dia memang seng barguna apapa par ale. Mar sakarang dia paleng barguna, bukang cuma par ale sa, mar par beta lai.
12 Sakarang ni, beta suru dia yang beta paleng sayang tu bale kombali par ale. 13 Kalo iko beta pung mau, beta mau sa tahang dia di sini par batamang beta ganti ale. Beta mau biking bagitu biar dia bisa bantu beta waktu beta ada di dalang bui ni. Beta ada di dalang bui ni tagal beta su kasi tau Kabar Bae par orang-orang. 14 Mar tagal katong balong baku akor soal ini, jadi beta seng mau tahang dia. Beta seng mau paksa ale par musti iko beta pung mau. Beta labe suka kalo ale mau tolong beta tagal ale pung hati sandiri mau par biking akang.
15 Filemon e, coba pikir bae-bae. Mangkali dolo Allah su ator kalo Onesimus musti tapisa sadiki lama dari ale biar dia bisa parcaya Yesus Kristus. Tagal itu, Onesimus su bisa bale kombali par ale la tinggal tarus-tarus sama-sama deng ale. 16 Dia bisa bale kombali bukang cuma par jadi ale pung orang suru-suru, mar labe bae dari orang suru-suru, dia tu su jadi sudara yang parcaya Yesus yang ale bisa sayang. Beta paleng sayang dia. Mar ale nanti sayang dia labe dari beta, tagal dia tu ale pung orang suru-suru deng sudara yang parcaya Tuhan Yesus lai.
17 Jadi, kalo ale anggap beta ni orang yang karja sama-sama deng ale par Yesus, tolong tarima Onesimus kombali jua macang deng ale tarima beta sa. 18 La kalo dia ada biking apapa yang sala ka ada bautang apapa di ale, beta yang nanti bayar akang. 19 Beta sandiri yang tulis deng beta pung tangang ni kata, “Beta Paulus. Beta yang nanti bayar Onesimus pung utang samua par ale.”b
Mar ale sandiri jang lupa kalo ale jua ada pung utang par beta soal ale pung hidop yang sakarang. Barang, beta su tolong ale sampe ale bisa parcaya Yesus Kristus.
20 Sudara e, beta harap ale bantu beta tagal katong dua parcaya Tuhan Yesus. Biking beta pung hati sanang jua tagal katong dua parcaya Kristus to! 21 Beta tulis macang bagini par ale tagal beta parcaya kalo ale nanti biking akang. Beta tau kalo ale nanti biking labe lai dari yang beta minta.
22 Beta mau minta satu lai jua. Tolong kasi siap kamar satu di ale pung ruma par beta tinggal jua. Barang, beta harap Tuhan nanti jawab kamong pung sombayang la beta bisa baku dapa kombali deng kamong samua.
Paulus tutu dia pung surat
1:23-25
23 Filemon e, Epafras yang satu bui deng beta di sini tagal karja par Yesus Kristus, dia kiring hormat par ale. 24 Tarus, orang-orang yang su tolong beta dalang beta pung karja par Yesus Kristus, macang Markus, Aristarkus, Demas, deng Lukas kiring hormat lai par ale.
25 Katong minta biar Tuhan Yesus Kristus kasi berkat basar par kamong samua.
Hormat, Paulus