Yesus labe basar dari Musa
3:1-6
3
1 Tagal itu sio basudara yang su jadi Allah pung orang-orang, yang Antua su panggel par tinggal sama-sama deng Antua di sorga e, mari pikir soal Yesus bae-bae. Antua tu Allah pung utusang deng Imam Basar yang katong parcaya. 2 Antua salalu karja iko Allah yang su angka Antua tu pung mau. Bagitu lai deng Musa yang salalu karja iko Allah pung mau par pimping Antua pung orang-orang samua, sama deng satu orang yang karja di dia pung bos pung ruma. 3 Allah anggap Yesus pantas par dapa hormat labe dari Musa, sama deng tukang yang kasi badiri ruma pantas par dapa hormat labe dari ruma yang dia biking tu. 4 Barang, ruma apa sa pasti ada satu orang yang biking akang. Mar yang biking samua-samua di dunya tu Allah. 5 Musa memang salalu karja iko Allah pung mau par pimping Allah pung orang-orang samua, sama deng orang karja yang karja dalang dia pung bos pung ruma. La apa yang Musa biking tu kasi unju soal apa yang nanti Allah biking eso lusa. 6 Mar Kristus, Antua salalu karja iko Allah pung mau, sama deng ana satu yang jadi kapala dalang dia pung bapa pung ruma. Katong ni Allah pung ruma, asal katong tetap pegang katong pung parcaya kuat-kuat deng taru harap par Antua pung janji yang biking katong pung hati sanang.Jang kasi karas hati macang deng katong pung tete-nene moyang di padang gurun dolo
3:7-19
7 Tagal itu basudara e, sama deng apa yang Allah pung Roh bilang,
“Hari ini, kalo kamong dengar Antua pung suara,
8 jang kasi karas kamong pung hati macang deng kamong pung tete-nene moyang dolo,
waktu dong malawang deng coba-coba Antua di padang gurun.”
9 Allah bilang,
“Di sana, kamong pung tete-nene moyang coba-coba deng tes Beta,
biar kata dong su lia samua yang Beta biking par dong dalang ampa pulu taong.
10 Tagal itu sampe Beta mara paskali deng dong,
deng bilang kata, ‘Dong salalu mau bajalang iko jalang yang sala,
deng salalu seng mau tau deng Beta pung parenta-parenta.’
11 Itu yang biking Beta morka deng angka sumpa kata,
‘Dong seng bisa maso ka tampa yang Beta su kasi siap par dong,
par ambe sanang sama-sama deng Beta.’ ”*
12 Jadi basudara e, ati-ati biar jang ada satu orang lai dari kamong yang pung hati jahat la seng mau parcaya lai, sampe kamong bale balakang dari Allah yang hidop. 13 Mar sabang hari kamong musti baku kasi nasehat tarus, waktu masi ada waktu yang katong panggel par “Hari ini”. Kamong musti biking bagitu biar jang ada dari kamong yang kapala batu tagal dapa tipu la biking dosa. 14 Barang, katong ni satu hati deng Kristus, asal sampe mati katong tetap pegang kuat-kuat katong pung parcaya yang katong tarima dolo tu.
15 Sama deng apa yang Allah pung Tulisang bilang,
“Hari ini, kalo kamong dengar Antua pung suara,
jang kasi karas kamong pung hati macang deng kamong pung tete-nene moyang dolo,
waktu dong malawang Antua.”*
16 Sapa tu yang malawang Allah biar kata dong dengar Antua pung suara? Yang malawang Antua tu orang-orang yang Musa pimping kaluar dari Mesir tu to? 17 La Allah mara paskali deng sapa sampe ampa pulu taong tu? Antua mara deng dong yang biking dosa tu, yang pung bangke talempar talamburang di padang gurun tu to? 18 La Allah angka sumpa par sapa kalo dong seng bisa ambe sanang sama-sama deng Antua? Antua angka sumpa tu par orang-orang yang seng dengar-dengarang Antua tu to?* 19 Jadi dari situ, katong bisa lia kalo dong seng bisa ambe sanang sama-sama deng Antua tagal dong seng parcaya Antua.