Mari taru kira ajarang yang batul yang katong su dengar
2:1-4
2
1 Tagal Yesus pung kuasa yang paleng luar biasa tu, panting paskali par katong par labe sunggu-sunggu taru kira ajarang yang batul yang katong su dengar, biar katong seng anyo iko ajarang-ajarang yang seng batul. 2 Katong su tau kalo atorang-atorang Torat yang malekat-malekat su kasi tau par katong pung tete-nene moyang tu batul. Katong jua su tau kalo sapa sa yang langgar deng seng dengar-dengarang akang, dia dapa hukumang yang pas deng apa yang dia su biking. 3 Kalo bagitu, masa katong seng dapa hukumang yang labe barát lai kalo katong acu tau deng ajarang yang bisa bawa katong par dapa salamat tu? Ajarang tu labe basar dari parenta-parenta tadi. Tuhan Yesus sandiri yang partama kali kasi tau akang la orang-orang yang dengar akang dari Antua pung mulu su kasi tau akang par katong. 4 Mala Allah sandiri jua kasi kuat apa yang dong bilang tu deng cara biking tanda-tanda herang deng biking hal-hal yang luar biasa, deng kasi berkat-berkat rohani dari Antua pung Roh par dong iko Antua pung mau.Yesus datang ka dunya jadi manusia par kasi salamat katong
2:5-18
5 Allah seng kasi kuasa par malekat-malekat par parenta dunya baru yang nanti ada, dunya yang katong ada bicara akang sakarang ni. 6 Mar, Antua kasi kuasa tu par manusia. Barang, dalang Allah pung Tulisang ada bilang kata,
“Manusia ni sapa sampe Bapa taru kira dia?
Adam pung anana cucu ni sapa sampe Bapa paduli deng dia?
7 Manusia tu bukang sapa-sapa, mar par sadiki tempo Bapa su biking dia sadiki labe randa dari malekat-malekat,
deng su biking dia dapa puji-puji deng dapa hormat macang deng raja.
8 Bapa jua su biking samua-samua tundu par dia.”*
Kalo bilang Antua biking samua-samua tundu par manusia, itu pung arti seng ada satu lai yang seng tundu par manusia. Mar sakarang, katong seng lia kalo samua-samua tundu par dia. 9 Mar coba pikir soal Yesus. Allah biking Antua sadiki labe randa dari malekat-malekat par sadiki tempo, waktu Antua jadi manusia. Mar sakarang, Allah su kasi dudu Antua di tampa paleng panting biar Antua dapa puji deng hormat. Barang, tagal Allah pung hati bae sampe Antua utus Yesus par sangsara sampe mati par katong samua.
10 Allah yang biking samua-samua di dunya la samua-samua tu ada biar Antua dapa puji. Antua mau biar ada banya orang yang jadi Antua pung anana, biar dong bisa hidop tarus-tarus deng pegang parenta sama-sama deng Antua. Tagal itu, Antua biking apa yang Antua musti biking. Antua utus Yesus Kristus par sangsara sampe mati. Deng cara bagitu, cuma Yesus sa yang bisa batul-batul buka jalang biar manusia salamat. 11 Yesus yang kasi barsi katong dari dosa-dosa deng katong yang su dapa kasi barsi ni pung Bapa sama. Tagal itu, Antua seng malu panggel katong par sudara. 12 Antua bilang,
“Beta mau kasi tau par Beta pung sudara-sudara soal apa yang Bapa su biking.
La di tenga-tenga jamaat Beta mau manyanyi puji-puji Bapa.”*
13 Antua jua bilang,
“Beta mau taru harap par Bapa.”*
Antua bilang lai,
“Ini ni Beta deng anana yang Allah su kasi par Beta.”*
14 Katong yang Yesus panggel par anana tu cuma manusia. Tagal itu kong Antua datang ka dunya jadi manusia deng hidop sama manusia, biar Antua bisa mati par kasi ancor Setang pung Raja yang pung kuasa par kamatiang. 15 Deng cara bagitu, Antua kasi bebas katong manusia yang salalu hidop dalang rasa taku par kamatiang, macang deng jongos yang taku dia pung tuang. 16 Barang, Antua seng tolong malekat-malekat mar tolong katong yang jadi Abraham pung turunang. 17 Itu yang jadi alasang mangapa kong dalang sagala hal Antua musti jadi sama deng katong manusia yang jadi Antua pung sudara-sudara. Antua jadi bagitu biar Antua bisa jadi Imam Basar yang kasi unju Antua pung hati bae deng yang salalu karja iko Allah pung mau biar manusia pung dosa-dosa bisa dapa kasi ampong. 18 Barang, tagal Antua sandiri su parna sangsara waktu dapa coba par biking dosa, jadi Antua jua bisa tolong orang-orang yang dapa coba biar dong seng biking dosa.