Surat par Orang
Ibrani
Allah bicara par manusia lewat Antua pung Ana
1:1-4
1
1 Basudara e, dolo Allah bicara banya kali deng lewat banya cara par katong orang Israel pung tete-nene moyang lewat Antua pung juru-juru bicara. 2 Mar sakarang, waktu dunya su mau abis ni, Antua su bicara par katong lewat Antua pung Ana. Lewat Antua pung Ana tu, Antua su biking langit deng dunya, lapis deng samua-samua yang ada. La Antua su angka Dia par pegang kuasa par samua-samua yang ada tu. 3 Katong bisa dapa lia Allah pung kuasa yang luar biasa dalang Ana ni pung diri. Dia pung tabiat sama parsis deng Allah. Deng Dia pung kata-kata yang pung kuasa, Dia ator deng biking samua-samua yang ada ni tetap bajalang. La abis kasi barsi manusia pung dosa-dosa, Dia nai ka sorga la dudu di Allah yang pung Kuasa Paleng Basar tu pung sabala kanang, tampa paleng panting. 4 Jadi, Dia jau labe hebat dari malekat-malekat, sama deng Dia pung kuasaa yang Allah su kasi tu jua jau labe basar dari malekat-malekat samua.*Yesus labe hebat dari malekat-malekat
1:5-14
5 Katong tau soal hal itu tagal Allah seng parna bilang par satu dari Antua pung malekat-malekat sama deng apa yang Antua su bilang par Yesus kata,
“Ale tu Beta pung Ana!
Hari ini Beta jadi Ale pung Bapa.”*
Allah jua seng parna bilang par malekat-malekat sama deng apa yang Antua su bilang par Yesus kata,
“Beta nanti jadi Dia pung Bapa,
la Dia nanti jadi Beta pung Ana.”*
6 La waktu Antua utus Antua pung Ana yang tuab tu datang ka dunya, Antua bilang,
“Beta pung malekat samua musti tikang lutu somba Dia.”*
7 Soal malekat-malekat Antua bilang,
“Beta biking Beta pung malekat-malekat tu jadi macang deng anging,
la malekat-malekat yang karja par Beta tu jadi macang deng api yang manyala.”*
8 Mar soal Antua pung Ana, Antua bilang,
“Ale tu Allah yang pegang parenta jadi Raja tarus-tarus deng seng abis-abis,
deng Ale parenta Ale pung karajaang deng batul.
9 Ale sanang kalo orang-orang hidop iko Allah pung mau,
mar Ale binci kalo orang-orang malawang Allah pung parenta.
Tagal itu, Ale pung Allah ni angka Ale jadi Raja la Ale pung hati sanang.
Antua biking Ale labe tinggi dari Ale pung tamang-tamang.”*
10 Antua jua bilang,
“Ale tu Tuhan yang dolo paskali su taru pandasi dunya ni
deng yang biking langit tu lai.
11 Samua tu nanti ancor binasa, mar Ale tetap ada tarus-tarus.
Samua tu nanti rusak macang deng pakiang yang su lama.
12 Samua tu macang deng baju panjang luar yang su lama, yang Ale nanti gulung la buang.
La sama deng pakiang lama, samua tu nanti dapa ganti deng yang baru.
Mar, Ale sandiri tetap sama deng hidop tarus-tarus.”*
13 La Antua jua seng parna bilang par satu dari malekat-malekat tu sama deng apa yang Antua su bilang par Yesus kata,
“Mari dudu di Beta pung sabala kanang, tampa paleng panting,
sampe Beta kasi kala Ale pung musu-musu la biking dong tundu par Ale.”*
14 Jadi, malekat-malekat tu sapa? Dong tu cuma roh-roh yang karja par Allah, yang Allah utus par tolong orang-orang yang nanti dapa kasi salamat.