Janji par ambe sanang sama-sama deng Allah
4:1-13
4
1 Basudara e, janji yang Allah kasi par ambe sanang sama-sama deng Antua tu sampe sakarang masi ada. Tagal itu, kamong parlu ati-ati biar seng ada satu orang lai dari kamong yang seng dapa apa yang Antua su janji tu. 2 Barang, katong jua su dengar Kabar Bae tu, sama deng katong pung tete-nene moyang dolo tu lai. Mar, Kabar Bae tu seng ada pung guna par dong tagal dong seng parcaya akang. 3 Katong yang parcaya ni nanti ambe sanang sama-sama deng Antua. Mar dong yang seng parcaya tu, dong nanti seng bisa ambe sanang deng Antua, sama deng apa yang Antua bilang,“Beta morka deng angka sumpa kata,
‘Dong seng bisa ambe sanang sama-sama deng Beta.’ ”*
Antua bilang bagitu biar kata Antua su abis biking Antua pung karja samua dari waktu Antua abis biking dunya ni lai. 4 Katong tau kalo katong bisa ambe sanang sama-sama deng Antua tagal ada tatulis dalang satu tampa dalang Allah pung Tulisang kata, “Pas hari katuju, waktu Antua su biking Antua pung karja samua, Antua ambe sanang.”* 5 Mar inga apa yang Antua bilang soal hal itu dalang nats tadi kata, “Dong nanti seng bisa ambe sanang sama-sama deng Beta.”* 6 Jadi, ada orang-orang yang nanti bisa ambe sanang sama-sama deng Antua. Mar orang-orang yang su dengar Kabar Bae kamuka tu, dong seng bisa ambe sanang deng Antua, tagal dong seng dengar-dengarang Antua. 7 Tagal itu, Antua pili satu hari laeng lai biar orang-orang ada pung kans par ambe sanang deng Antua. Hari yang Antua pili tu “Hari ini”. Katong tau soal hal itu tagal abis dari jamang Yosua tu, Antua bilang akang kombali lewat Daud, dalang nats yang beta bilang kamuka kata,
“Hari ini, kalo kamong dengar Antua pung suara,
jang kasi karas kamong pung hati!”*
8 Dolo, Yosua memang bawa orang Israel maso ka tana Kanaan, mar itu bukang par ambe sanang sama-sama deng Allah. Ande kata kalo itu par ambe sanang deng Antua, Antua seng parlu bicara soal hari laeng lai. 9 Jadi, masi ada waktu par katong Allah pung orang-orang, par ambe sanang sama-sama deng Antua. Hari itu macang deng hari katuju waktu Antua barenti karja deng ambe sanang.* 10 Barang, sapa yang su ambe sanang sama-sama deng Antua, itu sama sa deng dia jua su barenti dari dia pung karja samua, sama deng Antua jua barenti dari Antua pung karja samua di hari katuju. 11 Tagal itu, mari katong usaha sunggu-sunggu par ambe sanang deng Allah. Jang sampe ada satu orang lai yang jatu tagal seng dengar-dengarang Allah, sama deng katong pung tete-nene moyang dolo.
12 Barang, Allah pung kata-kata tu akang hidop deng pung kuasa, labe tajang dari parang yang tajang muka-balakang mana sa. Tagal sama deng parang bisa tikang sampe bisa kasi pisa tulang deng sum-sum, Allah pung kata-kata jua bisa tikang paleng kadalang, sampe bisa kasi pisa katong pung jiwa deng roh. Akang bisa nilai katong pung hati deng pikirang yang tasambunyi. 13 Seng ada satu lai di langit ka dunya yang bisa sambunyi dari Antua, tagal samua-samua macang kata talanjang deng tabuka par Antua. La par Antua sa katong musti tanggong jawab samua yang katong biking.
Yesus tu katong pung Imam Basar yang hebat
4:14—5:10
14 Sakarang katong ada pung Imam Basar yang hebat yang su pi ka sorga di muka Allah par jadi jambatang par katong deng Allah. Imam Basar tu Allah pung Ana Yesus. Tagal itu, mari katong pegang kuat-kuat apa yang katong su mangaku, kalo katong parcaya Antua. 15 Barang, katong pung Imam Basar tu bukang Imam Basar yang seng bisa rasa apa yang katong manusia bardosa yang seng kuat ni rasa. Antua bisa rasa akang, tagal Antua parna jadi sama deng manusia yang dapa coba dalang banya hal par biking dosa. Cuma, Antua seng biking dosa. 16 Tagal itu, mari datang deng barani par Allah yang pung hati bae deng yang dudu di kadera raja tu. Deng bagitu, katong bisa tarima Antua pung berkat basar deng Antua pung hati bae waktu katong parlu par dapa tolong.