5
1 Katong tau kalo katong orang Yahudi pung Imam Basar sapa sa dapa pili dari tenga-tenga manusia par jadi jambatang par manusia deng Allah. Dia dapa angka par kasi korbang par Allah deng bawa apa yang orang mau kasi par Allah, par minta Antua kasi ampong manusia pung dosa-dosa. 2 Dia sabar deng orang-orang yang seng tau apapa soal Allah pung mau deng yang iko jalang yang sala, tagal dia jua manusia biasa yang biking dosa. 3 Tagal itu, dia musti kasi korbang par Allah par minta Antua kasi ampong dia pung dosa-dosa do, baru kasi korbang par orang laeng par minta Antua kasi ampong dong pung dosa-dosa.*4 Seng ada satu orang lai yang bisa angka diri sandiri par jadi Imam Basar. Cuma Allah yang bisa angka Imam Basar, sama deng dolo Antua angka Harun. 5 Bagitu jua deng Kristus, Antua seng angka Antua pung diri sandiri par jadi Imam Basar. Yang angka Antua tu Allah, yang bilang par Antua kata,
“Ale tu Beta pung Ana!
Hari ini Beta jadi Ale pung Bapa.”*
6 Dalang nats laeng, Allah jua bilang,
“Ale tu imam sampe tarus-tarus
sama deng Melkisedek.”*
7 Waktu Yesus masi ada di dunya ni, Antua manangis marata deng sombayang deng sunggu-sunggu par Allah yang pung kuasa par kasi salamat Antua dari kamatiang. La tagal Antua dengar-dengarang Allah, Allah dengar Antua pung sombayang-sombayang tu. 8 Yesus tu Allah pung Ana. Mar biar kata bagitu, Antua balajar dengar-dengarang Allah lewat Antua pung sangsara. 9 Deng Antua pung sangsara tu, Antua jadi Imam Basar yang seng kurang apapa satu lai. La sakarang, Antua bisa kasi salamat samua orang yang dengar-dengarang Antua, biar dong hidop tarus-tarus deng Antua. 10 Antua dapa pili dari Allah par jadi Imam Basar, sama deng Melkisedek.
Jang tinggal kong taputar deng dasar-dasar ajarang
5:11—6:8
11 Basudara e! Masi banya lai yang beta bisa bilang soal Yesus deng Melkisedek par kamong. Mar, seng gampang par kasi jelas akang par kamong, tagal kamong seng mau usaha par mangarti akang. 12 Mala biar kata sakarang kamong su musti jadi guru par kasi balajar Allah pung ajarang, mar kamong masi parlu dapa ajar kombali soal dasar-dasar dari Allah pung ajarang yang batul. Kamong masi parlu susu, bukang makanang karas. 13 Orang yang masi minong susu sa, dong tu anana kacil. Beta pung maksud, orang yang masi tinggal kong taputar deng dasar-dasar ajarang, dong tu anana kacil dalang dong pung parcaya, jadi dong balong batul-batul mangarti soal apa yang batul deng apa yang sala. 14 Mar orang yang makang makanang karas tu orang-orang yang su basar. Beta pung maksud, orang yang su batumbu deng baakar kuat-kuat dalang dong pung parcaya, dong tu orang yang su basar dalang dong pung parcaya, tagal dong su balajar deng su lati dong pung diri par kanal apa yang batul deng apa yang sala.