6
1 Tagal itu, jang katong tinggal kong taputar deng dasar-dasar ajarang soal Kristus sa. Mar, mari bajalang labe jau lai dalang ajarang yang biking katong labe tamba batumbu deng baakar kuat-kuat dalang katong pung parcaya. Jadi, jang katong tinggal kong taputar deng dasar-dasar ajarang macang musti kasi tinggal cara hidop yang biking katong tapisa dari Allah deng soal parcaya Allah. 2 Ka, jang cuma taputar deng ajarang soal sagala macang cara par kasi barsi orang dari dosa, soal sagala macang cara par taru tangang di atas orang, soal orang mati nanti hidop kombali, deng soal orang yang biking kajahatang nanti dapa hukum tarus-tarus. 3 La kalo Allah sayang, katong nanti kasi balajar ajarang yang biking katong samua labe tamba batumbu deng baakar.4 Barang, orang yang bale balakang dari Kristus, dong seng bisa dapa bawa par kasi tinggal dong pung dosa-dosa lai. Dong tu orang-orang yang su tau ajarang yang batul dari Allah, dapa berkat dari sorga, deng tarima Antua pung Roh. 5 Dong su tau dari dalang hati kalo Allah pung kata-kata tu bae. Dong jua su rasa Antua pung kuasa yang Antua nanti kasi lia di dunya baru nanti. 6 Jadi, kalo dong bale balakang dari Yesus, dong nanti seng bisa dapa bawa par kasi tinggal dong pung dosa-dosa kombali lai. Barang, itu sama sa deng dong su kasi salib Allah pung Ana kombali deng su biking malu Antua di muka orang banya.
7 Conto sa tana. Tana yang isap aer ujang yang jaga turung ka atas akang deng yang kasi batumbu tatanamang yang barguna par orang yang usaha tana tu, tana tu akang dapa berkat dari Allah. 8 Mar, kalo tana tu kasi batumbu putri malu deng rumpu baduri, akang seng ada pung guna apapa. Akang nanti dapa kutok dari Allah la laste akang nanti dapa bakar.*
Parcaya deng sabar tunggu-tunggu apa yang Allah janji
6:9-20
9 Basudara jantong hati e! Biar kata katong bicara macang bagitu, katong parcaya kalo kamong labe bae dari itu. Katong parcaya kalo kamong nanti biking apa yang biking Tuhan pung hati sanang, sama deng apa yang pantas par orang-orang yang su dapa kasi salamat biking. 10 Barang, Allah tu salalu biking apa yang batul. Jadi, Antua seng lupa kamong pung karja deng kamong pung sayang par Antua, yang kamong kasi unju waktu kamong tolong Antua pung orang-orang dari dolo sampe oras ni. 11 Mar, katong inging paskali biar kamong sunggu-sunggu kasi unju kamong pung sayang tu tarus, sampe kamong pung waktu di dunya ni abis. Deng bagitu, kamong jadi batul-batul tau kalo kamong nanti tarima apa yang kamong harap dari Allah. 12 Katong seng inging kamong jadi pamalas, mar iko orang-orang parcaya pung conto. Dong parcaya Allah deng sabar sampe dong dapa apa yang Antua su janji par dong.
13 Conto sa Abraham. Waktu Allah ika janji deng dia, Antua sumpa demi Antua pung diri sandiri, tagal seng ada yang labe basar dari Antua. 14 Antua bilang, “Beta pasti nanti kasi berkat batambong-tambong par ale deng nanti biking ale pung turunang jadi banya paskali.”* 15 Abraham tinggal kong tunggu apa yang Antua su janji par dia tu deng sabar, sampe dia dapa akang.
16 Biasa tu manusia angka sumpa demi orang yang labe basar dari dia pung diri. Deng dia pung sumpa tu, dia kasi unju kalo dia pasti biking apa yang dia bilang la seng ada orang yang bisa baku malawang soal itu lai. 17 Bagitu lai deng Allah. Biar orang-orang yang pung hak par tarima janji tu batul-batul tau kalo Antua pasti biking apa yang Antua su janji, Antua ika Antua pung diri deng sumpa. 18 Ada dua hal yang seng parna baroba tagal Antua seng parna parlente. Yang satu tu Antua pung janji la yang satu lai tu Antua pung sumpa. Jadi, Antua ika Antua pung diri deng sumpa biar katong yang cari Antua par jaga katong ni, katong pung hati jadi batul-batul kuat par taru harap kalo Antua nanti kasi apa yang Antua su janji par katong eso lusa. 19 Katong pung harap tu, akang macang deng jangkar di dasar lautang, yang biking katong pung hati jadi kuat deng seng anyo-anyo. Tagal katong pung harap tu kuat macang bagitu, jadi katong macang kata su maso dalang Ruang Paleng Kudus yang tapele deng kaeng pampele basara par baku dapa deng Allah. 20 Yesus su pi ka Ruang Paleng Kudus tu kamuka la su buka jalang par katong, biar katong bisa datang langsung par Allah. Barang, Antua jadi Imam Basar par katong sampe tarus-tarus, sama deng Melkisedek dolo lai.