Melkisedek labe panting dari Abraham
7:1-10
7
1 Melkisedek tu raja dari kota Salem. Dia jua Allah yang Paleng Tinggi pung imam. Dia tu yang pi baku dapa Abraham la kasi berkat par Abraham, waktu Abraham bale dari prang abis kasi kala babarapa raja. 2 Dari harta-harta samua yang Abraham rampas dalang prang tu, Abraham kasi parpuluhang par Melkisedek.* Melkisedek sandiri pung arti ‘raja yang biking apa yang batul’. Dia tu jua raja dari kota Salem, yang pung arti ‘kota Dame’. Jadi deng kata laeng, dia tu ‘Raja Dame’. 3 Dalang Allah pung Tulisang sandiri seng ada bilang apapa soal dia pung mama ka bapa ka dia pung tete-nene moyang. Jua seng ada bilang soal apa tempo dia lahir deng apa tempo dia mati. Jadi itu macang kata dia tu tetap jadi imam tarus-tarus, sama deng Allah pung Ana lai.4 Jadi lia, Melkisedek tu orang panting, sampe katong pung moyang Abraham sa kasi parpuluhang dari harta yang dia rampas dalang prang tu par Melkisedek. 5 Kalo iko Hukum Torat, cuma imam-imam dari Lewi pung turunang sa yang ada pung hak par kumpul parpuluhang dari orang Israel.* Dong musti biking bagitu, biar kata dong samua tu sama-sama sudara tagal dong samua tu Abraham pung turunang. 6 Mar Melkisedek, biar kata dia tu bukang Lewi pung turunang, mar dia dapa parpuluhang dari harta yang Abraham dapa dalang prang. La biar kata Abraham ni yang tarima Allah pung janji, mar bukang Abraham yang kasi berkat par dia, mar dia yang kasi berkat par Abraham. 7 La seng ada yang bisa manyangkal kalo orang yang kasi berkat tu labe basar dari orang yang tarima berkat.
8 Imam-imam dari Lewi pung turunang yang tarima parpuluhang tu cuma manusia biasa yang nanti mati. Mar Allah pung Tulisang seng bilang kata Melkisedek tu su mati. Jadi, itu sama sa deng dia ada hidop tarus-tarus. 9 Cuma Lewi sa yang biasa tarima parpuluhang dari orang-orang. Mar, waktu Abraham kasi dia pung parpuluhang par Melkisedek, itu anggap sa Lewi jua su kasi dia pung parpuluhang par Melkisedek lewat Abraham. 10 Barang, biar kata Lewi balong lahir waktu jamang Melkisedek, mar dia masi jadi satu bagiang deng dia pung moyang Abraham. Jadi, waktu Abraham baku dapa Melkisedek la kasi parpuluhang tu par Melkisedek, itu anggap sa Lewi deng dia pung turunang su kasi akang sama-sama deng Abraham.
Yesus labe hebat dari Imam-Imam Basar samua
7:11-28
11 Dolo, Tuhan kasi Hukum Torat par orang Israel la angka Lewi pung turunang par jadi imam-imam par tanggong jawab biar orang Israel bisa iko akang. Mar dong pung karja tu seng bantu orang Israel par jadi batul di muka Tuhan. Kalo memang bisa, mangapa kong Antua utus imam laeng yang macang deng Melkisedek par datang, yang bukang asal dari Lewi pung turunang Harun? 12 Kalo imam-imam dari Lewi pung turunang tu dapa ganti deng imam yang laeng, itu pung arti Hukum Torat jua musti dapa ganti lai. 13 Imam yang laeng yang katong ada bicara di sini ni katong pung Tuhan Yesus sandiri. Antua dari suku laeng la dari Antua pung suku tu balong parna ada yang jadi imam deng kasi korbang par Allah di atas tampa bakar korbang. 14 Barang, samua orang tau kalo katong pung Tuhan tu asal dari suku Yehuda. La dalang Hukum Torat, Musa seng parna bilang kalo Yehuda pung turunang bisa dapa pili par jadi imam.
15 Apa yang beta bilang di atas kalo Hukum Torat musti dapa ganti tu, akang labe jelas tagal ada imam laeng yang macang deng Melkisedek yang su datang. 16 Antua tu Yesus. Antua jadi imam bukang tagal atorang lama yang bilang kalo yang jadi imam tu musti dari Lewi pung turunang. Mar, Antua jadi imam tagal Antua ada pung kuasa par hidop tarus-tarus deng seng bisa binasa. 17 Barang, dalang Allah pung Tulisang ada bilang,
“Ale tu imam.
Ale jadi imam tarus-tarus, sama deng Melkisedek.”*
18 Jadi, atorang agama yang dolo tu su seng tapake lai, tagal atorang tu seng kuat deng seng ada pung guna. 19 Beta bilang bagitu tagal Hukum Torat tu seng bisa bawa orang par jadi batul di muka Allah. Mar sakarang, ada jalang yang labe bae biar katong bisa dekat deng Allah. Jalang yang labe bae tu, katong taru harap par Yesus.
20 Jua waktu Allah angka Yesus par jadi imam, Antua angka sumpa deng Yesus. Mar Antua seng parna angka sumpa waktu angka Lewi pung turunang par jadi imam. 21 Mar, waktu Antua angka Yesus par jadi imam, Antua angka sumpa la bilang par Yesus kata,
“Tuhan su angka sumpa deng seng parna mau roba apa yang Antua su bilang kalo,
Ale tu imam sampe tarus-tarus.”*
22 Jadi dari Allah pung sumpa tu, katong bisa tau kalo Yesus tu orang yang jamin kalo janji yang baru yang labe bae tu, akang pasti jadi.
23 Ada satu hal lai yang beda soal Yesus deng imam-imam yang laeng tu. Imam-imam tu dong ada banya tagal dong pasti mati, jadi dong seng bisa biking dong pung tugas imam tu tarus. 24 Mar Yesus, Antua tetap hidop sampe tarus-tarus. Jadi, Antua tetap jadi imam deng seng ada orang laeng yang ganti Antua. 25 Tagal itu, Antua bisa batul-batul kasi salamat manusia yang datang par Allah lewat Antua. Barang, Antua hidop tarus-tarus deng salalu ada par jadi jambatang par dong deng Allah.
26 Jadi, Yesus tu Imam Basar yang katong batul-batul parlu. Antua tu kudus, seng biking sala sama sakali, deng seng bardosa. Allah kasi pisa Antua dari orang-orang bardosa deng angka Antua labe tinggi dari sagala tampa yang ada di sorga. 27 Antua seng sama deng imam-imam basar laeng. Barang, sabang hari dong musti kasi korbang par Allah par hapus dong pung dosa sandiri do, baru kasi korbang par hapus orang laeng pung dosa.* Mar Yesus, Antua su kasi Antua pung diri sandiri par jadi korbang par Allah, biar Allah hapus manusia pung dosa. Antua biking bagitu satu kali sa mar akang pung guna sampe tarus-tarus. 28 Kalo iko Hukum Torat, orang-orang yang dapa pili par jadi Imam Basar tu, dong seng kuat tagal dong biking dosa. Mar lama abis Allah kasi Hukum Torat, Antua angka sumpa waktu ika janji yang baru. Janji yang baru tu, Antua angka Antua pung Ana yang seng ada pung dosa par jadi Imam Basar sampe tarus-tarus.