Lewat Kristus yang jadi katong pung Imam Basar di sorga, Allah ika janji yang baru deng katong manusia
8:1-13
8
1 Jadi basudara e, inti dari samua yang katong ada bicara tu ini: Katong ada pung Imam Basar. Antua dudu di Allah yang pung Kuasa Paleng Basar tu pung sabala kanang, tampa paleng panting, par pegang parenta sama-sama deng Allah di sorga.* 2 Antua biking Antua pung karja di tampa yang kudus di sorga, di Tenda Sombayang yang batul yang Tuhan su biking. Antua seng biking akang di Tenda Sombayang yang manusia biking di dunya. 3 Barang, Imam Basar sapa sa dapa angka par kasi korbang deng kasi apapa par Allah. Bagitu lai deng katong pung Imam Basar Yesus. Antua musti pung apapa satu par kasi korbang par Allah. 4 Ande kata Antua masi ada di dunya, Antua seng bisa jadi imam, tagal di dunya ni su ada imam-imam yang jaga kasi korbang par Allah iko Hukum Torat. 5 Apa yang dong biking tu, itu tu conto deng model dari apa yang ada di sorga. Ini sama deng apa yang Allah bilang par Musa waktu dia mau biking Tenda Sombayang. Antua bilang, “Inga bae-bae. Ale musti biking samua tu sama deng conto yang Beta su kasi unju par ale di atas gunung tu.”* 6 Mar Yesus yang dapa tugas par jadi katong pung Imam Basar tu, Antua pung karja labe hebat dari imam-imam tu samua, tagal lewat Antua, Allah ika janji yang baru deng manusia. Janji yang baru tu, akang labe bae dari janji yang lama, tagal lewat janji yang baru tu manusia bisa dapa hal-hal yang labe bae.7 Kalo memang janji yang lama bisa biking katong baku bae deng Allah, mangapa kong Antua masi ika janji yang baru lewat Yesus lai? 8 Mar Allah dapa orang Israel pung sala, tagal dong seng iko atorang-atorang dari janji yang lama. Tagal itu Tuhan Allah bilang par dong,
“Dengar apa yang Beta mau bilang ni.
Satu waktu, Beta nanti ika janji yang baru deng orang Israel deng orang Yehuda.a
9 Janji tu seng sama deng janji yang Beta su ika deng dong pung tete-nene moyang,
waktu Beta pegang dong pung tangang par hentar dong kaluar dari negri Mesir.
Barang, dong seng pegang janji yang Beta su ika deng dong tu,
la tagal itu Beta su seng mau tau lai deng dong.
10 Jadi, ini ni janji yang baru yang Beta mau ika deng orang Israel eso lusa:
Beta nanti taru Beta pung atorang-atorang dalang dong pung hati
deng tulis akang dalang dong pung pikirang.
Beta nanti jadi dong pung Allah
deng dong nanti jadi Beta pung orang-orang.
11 La dong seng parlu ajar dong pung orang-orang satu bangsa ka dong pung basudara sandiri par kanal Tuhan lai.
Tagal dong samua, kacil-basar, su kanal Beta.
12 Barang, Beta nanti kasi unju Beta pung hati bae par dong, la kasi ampong dong pung sala-sala samua,
deng seng mau inga-inga dong pung dosa-dosa lai.”*
13 Jadi basudara e, waktu Allah bilang kalo Antua mau ika janji yang baru, itu pung arti kalo janji yang lama tu su seng tapake lai. La apa yang su seng tapake lai deng su tua tu seng lama lai ilang.