Cara ibada dalang Tenda Sombayang tu cuma ande-ande par ajar katong yang hidop sakarang
9:1-10
9
1 Basudara e! Dalang janji yang partama yang Allah ika deng orang Israel tu, ada atorang-atorang soal ibada deng soal Tenda Sombayang yang manusia biking tu. 2 Dalang Tenda Sombayang tu, ada dua ruang. Dalang ruang yang partama ada kaki lampu deng meja, la roti yang imam-imam su kasi par Allah ada di atas meja tu. Ruang ni nama Ruang Kudus. 3 Di balakang ruang yang partama tu ada kaeng pampele basar satu par pele ruang yang kadua. Ruang kadua ni nama Ruang Paleng Kudus.* 4 Di situ ada tampa bakar kamanyaang dari mas deng Peti Tampa Simpang Allah pung Parenta yang dapa sopo deng mas. Dalang peti tu ada Harun pung tongka yang parna batunas, batu dua bala yang ada tulis Allah pung atorang-atorang, deng guci mas yang isi manna.a* 5 Di atas peti tu, ada dua patong malekat yang nama kerub. Kerub-kerub tu tanda kalo Allah yang pung kuasa paleng basar tu ada di situ. Kerub-kerub tu pung sayap tutu pantutu peti tampa Allah kasi ampong manusia pung dosa-dosa.* Mar sakarang, beta seng bisa bicara soal samua tu sampe ka akang pung alus-alus samua.6 Itu tu cara samua yang ada dalang Tenda Sombayang tu dapa ator di akang pung tampa satu-satu. La sabang hari, imam-imam maso dalang ruang muka dalang tenda tu par biking dong pung tugas.* 7 Mar dalang ruang yang kadua, cuma Imam Basar sa yang bisa maso ka situ satu taong satu kali. La waktu dia maso, dia musti maso bawa dara binatang par kasi akang par Allah, biar Antua kasi ampong dia pung dosa, deng orang laeng pung dosa yang dong biking tagal dong seng mangarti kalo apa yang dong biking tu dosa.* 8 Lewat atorang-atorang tu, Allah pung Roh kasi unju kalo jalang maso ka Ruang Paleng Kudus par baku dapa Allah tu balong tabuka kalo ruang yang partama tu masi tapake.
9 Samua tu jadi macang deng ande-ande par ajar katong yang hidop sakarang. Akang pung arti, katong pung korbang deng apa sa yang katong kasi par Allah seng bisa biking katong pung hati barsi dari dosa. 10 Barang, atorang-atorang tu cuma soal makanang deng minomang, deng jua soal macang-macang atorang soal basu diri iko atorang agama. Mar, atorang-atorang tu cuma par ator soal apa yang ada di luar sa, bukang apa yang ada dalang hati. Allah kasi atorang-atorang tu par manusia iko akang sampe Antua ganti akang deng cara yang baru.
Yesus Kristus tu katong pung Imam Basar yang karja dalang Ruang Paleng Kudus di sorga par kasi lapas katong dari dosa
9:11-28
11 Sakarang, Kristus su datang jadi Imam Basar par bawa hal-hal yang bae yang Allah su janji par katong. Antua su maso ka Ruang Paleng Kudus yang batul-batul hebat deng luar biasa di sorga. Itu bukang Ruang Paleng Kudus yang manusia biking deng bukang asal dari dunya ni. 12 Antua seng maso ka Ruang Paleng Kudus tu bawa dara kambing laki-laki ka dara ana sapi, sama deng apa yang Imam Basar biasa biking par kasi korbang. Mar, Antua maso ka sana satu kali sampe tarus-tarus bawa Antua pung dara sandiri. Deng Antua pung dara tu, Antua kasi lapas katong dari dosa tarus-tarus. 13 Kalo iko atorang yang lama, par mau kasi barsi satu orang dari dosa biar dong bisa iko ibada, imam musti kabas dara kambing laki-laki ka dara sapi laki-laki tu ka dia pung badang. Ka, imam musti bakar sapi parampuang muda sampe jadi abu la kabas akang di dia pung badang.* Jadi, kalo dara deng abu tu bisa kasi barsi orang, biar kata itu cuma bagiang luar sa, 14 apalai Kristus pung dara? Deng Allah pung Roh yang hidop tarus-tarus yang pimping Antua, Kristus kasi Antua pung diri sandiri par Allah, par jadi korbang yang seng pung kurang sadiki lai. Korbang yang Kristus bawa tu kasi barsi katong pung hati kacil dari hal-hal yang seng ada pung guna, biar katong bisa somba Allah yang hidop tu.
15 Jadi deng samua yang Kristus biking tu, Antua jadi jambatang par bawa janji yang baru yang Allah ika deng manusia. Deng bagitu, samua orang yang Allah su panggel par jadi Antua pung orang-orang tu, dong bisa tarima harta pusaka yang ada tarus-tarus, sama deng apa yang Antua su janji. Barang, Antua su mati par tabus manusia dari dosa-dosa yang dong biking waktu masi iko janji yang lama tu. 16 Coba lia orang yang biking surat par bage-bage harta pusaka par dia pung turunang. Dong baru bisa tarima akang kalo su ada bukti yang jelas kalo dia su mati do. 17 Barang, kalo orang yang biking surat tu masi hidop, surat tu balong bisa tapake. Mar kalo orang yang biking surat tu su mati, baru surat tu bisa tapake. 18 Bagitu jua deng janji yang partama yang Allah ika deng katong pung tete-nene moyang dolo. Janji yang Allah kasi par dong tu balong sah kalo balong ada dara binatang yang tatumpa. 19 Waktu Musa abis kasi tau atorang-atorang samua dari Allah par orang Israel, dia ambe dara ana sapi deng dara kambing laki-laki la campor akang deng aer. Abis itu, dia ambe jaga hisop sapanggal deng kaeng wol warna mera dara babi, la colo akang di dara yang su dapa campor deng aer tu, la kabas akang di kitab yang tagulung yang isi atorang-atorang tu deng di orang Israel samua. 20 Waktu dia biking bagitu, dia bilang, “Dara ni par kasi sah janji yang Allah ika deng kamong, janji yang Antua suru kamong musti biking akang.”* 21 Deng cara yang sama, Musa jua kabas dara ka Tenda Sombayang deng alat-alat samua yang dong pake par ibada dalang tenda tu.* 22 Mala kalo iko Hukum Torat, amper samua hal musti dapa kasi barsi deng dara.* La kalo seng ada dara yang tatumpa, seng ada dosa yang dapa kasi ampong.
23 Jadi, Tenda Sombayang deng alat-alat yang orang Israel pake di situ tu, itu conto dari apa yang ada di sorga. Kalo tenda deng samua yang ada dalang tenda tu musti dapa kasi barsi deng dara, apalai par kasi barsi apa yang ada dalang sorga. Akang musti dapa kasi barsi deng dara dari korbang yang labe luar biasa dari korbang binatang. 24 Barang, Kristus seng maso ka Ruang Paleng Kudus di Tenda Sombayang yang manusia biking, yang jadi conto sa dari apa yang batul yang ada di sorga. Mar, Antua maso ka Ruang Paleng Kudus di sorga par badiri di muka Allah ganti katong. 25 Antua seng maso par kasi Antua pung diri ulang-ulang par jadi korbang, sama deng Imam Basar yang sabang taong musti maso ka Ruang Paleng Kudus par bawa dara yang bukang dia pung dara sandiri, mar dara binatang. 26 Barang, kalo Antua kasi diri par jadi korbang ulang-ulang, itu pung arti dari waktu dunya ni dapa biking Antua pasti su sangsara ulang-ulang. Mar yang batul tu, pas waktu dunya su mau abis ni, Antua datang satu kali sa par kasi diri par jadi korbang par tabus manusia pung dosa. 27 La sama deng Allah su putus kalo manusia tu cuma mati satu kali la abis itu Antua putus dia pung parkara, 28 Kristus jua mati satu kali sa par jadi korbang par tabus banya orang pung dosa. La abis itu, Antua nanti bale satu kali lai, bukang par tabus dosa-dosa, mar par kasi salamat orang-orang yang tunggu-tunggu Antua.