Cara hidop yang biking Tuhan pung hati sanang
13:1-6
13
1 Basudara e! Kamong musti tarus-tarus sayang kamong pung basudara yang parcaya Tuhan. 2 La kalo ada orang yang kamong seng kanal yang parlu par manumpang, jang lupa tarima dia di kamong pung ruma. Barang deng biking bagitu, ada babarapa orang yang seng sadar su tarima malekat-malekat di dia pung ruma.* 3 Jang lupa sombayang deng tolong orang-orang yang ada dalang bui, macang kata kamong sandiri jua ada sama-sama deng dong dalang bui lai. La jang lupa deng orang-orang yang dapa siksa, macang kata kamong sandiri jua ada sangsara lai.4 Kamong samua musti taru hormat par janji kaweng yang kamong su ika. Laki deng bini seng bole kasi kotor dong pung tampa tidor. Itu pung arti, dong seng bole maeng serong tagal Allah nanti hukum orang yang tidor deng orang yang bukang dia pung laki ka bini. 5 Jang kamong mata kepeng, mar musti puas deng apa yang kamong pung. Barang, Allah sandiri su bilang kata,
“Beta seng parna kasi tinggal ale
deng seng parna kasi biar ale sandiri.”*
6 Tagal itu, katong barani bilang bagini,
“Tuhan tu yang salalu tolong beta, jadi beta seng taku.
Manusia seng bisa biking apapa beta.”*
Jang iko sagala macang atorang yang seng batul
13:7-19
7 Basudara e! Jang lupa kamong pung pamimping-pamimping yang su kasi tau Allah pung kata-kata par kamong. Pikir bae-bae samua yang dong biking dari waktu dong hidop sampe dong mati, la iko dong pung parcaya par Yesus tu. 8 Yesus Kristus tu seng parna baroba dari dolo, sakarang, sampe tarus-tarus.
9 Jadi, jang paskali iko sagala macang ajarang seng batul yang bawa kamong ka jalang yang sala, macang katong orang Yahudi pung ajarang soal makanang. Dong iko sagala macang atorang soal makanang, mar akang seng tolong dong par dapa tarima dari Allah. Katong pung parcaya kuat tagal Antua su kasi unju Antua pung hati bae par katong, bukang tagal iko atorang agama soal makanang. 10 Par katong, ada Yesus yang su mati par tabus katong pung dosa-dosa. Antua sama deng katong pung korbang yang ada di atas tampa bakar korbang. Mar, orang Yahudi pung imam-imam yang karja di Tenda Sombayang seng dapa untung apapa dari katong pung korbang tu.
11 Iko atorang agama Yahudi, Imam Basar biasa bawa dara binatang yang dapa kasi korbang tu ka dalang Ruang Paleng Kudus par jadi korbang par tabus orang-orang dari dong pung dosa. Mar binatang tu pung bangke dapa bakar di luar kampong.* 12 La sama deng binatang yang dapa bakar di luar kampong tu, Yesus jua sangsara sampe mati di luar kota Yerusalem pung pintu maso par kasi barsi Antua pung orang-orang pung dosa-dosa deng Antua pung dara sandiri. 13 Tagal itu, mari katong kaluar iko Yesus di luar kota Yerusalem. Beta pung maksud, jang malu kasi tinggal katong orang Yahudi pung atorang-atorang agama yang seng bisa kasi salamat katong tu. Mar mari iko Yesus, biar Antua kasi salamat katong biar kata orang-orang hina katong sama deng orang-orang hina Antua. 14 Barang, di dunya ni seng ada tampa yang tetap par katong tinggal. Katong ada tunggu tampa yang ada di sorga par katong tinggal tarus-tarus.
15 Basudara e! Tagal Yesus su jadi korbang par tabus katong dari katong pung dosa, katong seng parlu kasi korbang binatang lai biar Allah tabus katong dari katong pung dosa. Jadi, mari katong puji-puji Allah tarus deng mangaku kalo Antua tu Tuhan. Itu tu korbang yang katong kasi par Antua. 16 Deng jang lupa biking apa yang bae par orang laeng. Kalo dong ada parlu apapa bagitu, tolong dong jua. Tagal samua yang kamong biking tu korbang yang biking Allah pung hati sanang.
17 Kamong musti dengar-dengarang par orang-orang yang pimping kamong deng musti iko dong pung parenta. Barang, dong salalu jaga biar kamong seng bale balakang dari kamong pung parcaya par Tuhan. La kalo Tuhan tanya dong soal apa yang dong su biking tu, dong musti lapor par Antua. Jadi, kamong musti dengar-dengarang dong biar dong karja deng hati sanang. Mar, kalo kamong seng dengar-dengarang dong, dong pung hati susa. La kalo bagitu, itu seng bawa untung par kamong.
18 Tolong sombayang tarus par katong jua. Katong tau kalo apa yang katong biking tu, katong biking akang deng hati barsi deng katong mau biking apa yang batul tarus. 19 Mar yang labe kusus lai, beta minta deng sunggu-sunggu dari kamong par sombayang minta Tuhan buka jalang biar beta bisa bale lakas-lakas par kamong.
Kata-kata laste deng berkat
13:20-25
20-21 Waktu Yesus mati, Antua pung dara su tatumpa par kasi sah janji yang Allah ika deng katong tarus-tarus. Allah su kasi hidop katong pung Tuhan Yesus kombali, la Antua su jadi Orang Jaga Domba yang Paleng Hebat par katong yang jadi Antua pung domba-domba ni. Jadi beta minta biar Allah, yang su biking katong pung hati dame tu, kasi apa sa yang bae yang kamong parlu par biking Antua pung mau. Beta jua minta biar lewat Yesus Kristus, Allah karja dalang katong pung hati par biking apa sa yang biking Antua pung hati sanang. Mari katong puji-puji Yesus Kristus tarus-tarus! Amin.
22 Beta minta deng sunggu-sunggu dari kamong samua basudara e, biar kamong tarima beta pung nasehat-nasehat ni bae-bae, biar kata beta pung surat ni cuma pende sa.
23 Beta mau kasi tau kamong kalo katong pung sudara Timotius tu su kaluar dari bui. Kalo dia datang par beta labe capat, katong dua nanti pi lia kamong. 24 Kiring hormat par kamong pung pamimping-pamimping jamaat samua di situ deng par Allah pung orang-orang samua yang ada di situ lai. Katong pung basudara dari Italia kiring hormat par kamong lai.
25 Beta minta biar Allah kasi unju Antua pung hati bae par kamong samua.