Tetap parcaya biar kata dapa hina deng dapa siksa
12:1-17
12
1 Basudara e, katong su lia orang-orang parcaya yang banya paskali tu pung conto par katong. Dong tu macang deng orang yang iko lomba lari yang su sampe di finis kamuka katong la sakarang ada lia katong lari. Tagal itu, mari katong buang samua yang pele-pele katong pung parcaya deng lapas dosa-dosa yang ika katong biar katong bisa tetap parcaya, sama deng orang yang iko lomba lari yang buang samua yang biking dia seng bisa lari bae-bae. Deng bagitu, katong bisa batahang par lari tarus sampe ka finis, iko apa yang Allah mau katong biking. 2 Jang lia kiri-kanang mar lia Yesus tarus sa, tagal Antua tu yang buka jalang biar katong bisa parcaya deng yang biking katong pung parcaya jadi batul-batul kuat. Lia la balajar dari Antua yang batahang waktu dapa salib, seng ambe pusing deng akang biar kata orang-orang anggap akang hal yang hina, tagal Antua tau kalo abis itu Antua nanti paleng sanang paskali. La sakarang ni, Antua ada dudu di Allah pung sabala kanang, tampa paleng panting, la pegang parenta sama-sama deng Allah. 3 Coba inga-inga bagemana Yesus tetap tahang hati waktu orang-orang bardosa hina deng siksa Antua. Deng bagitu, kamong pung parcaya tetap kuat deng kamong seng putus harap.4 Waktu kamong usaha malawang hal-hal jahat, kamong balong parna malawang sampe kamong pung dara tatumpa la mati macang Yesus. 5 Masa kamong lupa Tuhan pung nasehat par kasi kuat kamong? Antua kasi nasehat kamong tagal kamong tu Antua pung anana. Antua bilang,
“Sio anana e! Jang anggap enteng kalo Tuhan ada kasi balajar kamong deng karas.
La jang putus harap kalo Antua ada tagor kamong.
6 Barang, Tuhan kasi balajar orang-orang yang Antua sayang deng karas.
La Antua hukum orang-orang yang Antua su tarima jadi Antua pung anana.”*
7 Jadi, kalo kamong ada susa deng sangsara, kamong musti batahang. Antua ada ajar kamong macang deng bapa satu yang ajar dia pung ana. Mana ada bapa yang seng parna ajar dia pung ana deng karas? 8 Mar, kalo kamong seng dapa ajar deng karas, sama deng apa yang Allah pung anana samua biasa dapa, itu pung arti kamong tu bukang Antua pung anana. 9 Katong pung bapa di dunya ni sa ajar katong deng karas la katong taru hormat par dong tagal itu. Kalo bagitu, katong musti labe dengar-dengarang deng taru hormat par katong pung Bapa di sorga biar katong bisa hidop tarus-tarus to? 10 Katong pung bapa di dunya ni ajar katong deng karas sadiki tempo sa. Dong ajar katong iko apa yang dong anggap itu bae. Mar katong pung Bapa di sorga ajar katong deng karas par katong pung bae, biar katong bisa barsi dari dosa sama deng Antua. 11 Memang saki sabang kali katong dapa ajar deng karas. Itu bukang satu hal yang enak. Mar abis itu, akang biking katong yang dapa kasi balajar tu par hidop deng batul deng biking katong rasa dame.
12 Tagal itu, kasi kuat kamong pung parcaya, sama deng orang yang iko lomba lari yang musti kasi kuat dong pung tangang yang seng kuat deng lutu yang gamatar. 13 La jang kasi tinggal Tuhan pung jalang yang lurus tu, biar orang yang balong kuat dalang dong pung parcaya lia kamong pung hidop tu, dong jadi labe kuat deng seng jatu. Itu sama deng orang yang iko lomba lari yang kasi unju jalang yang bae biar orang yang iko dari balakang seng jatu.*
14 Basudara e, kamong musti usaha par hidop dame deng samua orang. Kamong jua musti kasi kamong pung hidop par Tuhan deng usaha biar hidop seng bardosa, tagal seng ada orang yang bisa lia Tuhan kalo dia bardosa. 15 Ati-ati biar seng ada satu orang lai dari kamong yang kasi tinggal dia pung parcaya par Tuhan la seng bisa rasa Antua pung hati bae. Barang, kalo ada orang yang kasi tinggal dia pung parcaya, dia nanti jadi racong yang biking rusak orang banya pung parcaya deng biking dong bardosa.* 16 Ati-ati biar jang ada satu orang lai dari kamong yang tidor deng orang yang bukang dia pung laki ka bini. Ka, ati-ati jua biar jang ada dari kamong yang seng ambe pusing deng Allah pung janji, macang deng Esau. Barang, hak yang Tuhan kasi par jadi ana yang tua tu, dia jual akang par dia pung ade Yakub deng makanang satu piring.* 17 Jang biking bagitu, tagal kamong sandiri tau to, kalo abis itu waktu dia musti tarima berkat yang jadi dia pung hak tu, dia pung bapa seng kasi akang. Biar kata dia manangis aer mata dara lai biar dia pung bapa kasi akang, mar dia seng bisa roba apa yang su jadi.*
Jang seng ambe pusing deng Allah pung kata-kata
12:18-29
18 Basudara samua, kamong seng sama deng orang Israel dolo waktu dong mau datang par Tuhan di gunung Sinai. Itu tu gunung yang batul-batul ada di dunya. Dong lia gunung tu tatutu deng galap, anging ribut basar, deng api manyala-manyala. 19 Di situ, dong dengar suara trompet yang basar paskali deng Allah pung suara sandiri. Waktu dong dengar itu, dong paleng taku sampe dong minta deng sunggu-sunggu dari Musa biar Allah jang bicara langsung par dong lai.* 20 Barang, dong seng tahang deng Antua pung parenta kata, “Samua yang sonto gunung ni, manusia ka binatang ka, musti dapa lempar deng batu sampe mati.”* 21 Apa yang orang Israel lia tu biking bulu badang badiri paskali, sampe Musa sa bilang, “Beta paleng taku sampe gamatar.”*
22 Mar kamong basudara e, kamong su datang ka gunung Sion. Di situ ada kota Yerusalem. Mar, bukang Yerusalem yang ada di dunya, mar di Allah yang hidop pung tampa tinggal yang ada di sorga. Di sana, kamong baku dapa Antua pung malekat ribu-ribu bakumpul barsuka puji Antua. 23 Di sana kamong baku dapa samua orang yang partama jadi Allah pung anana yang ada bakumpul. Dong pung nama-nama tatulis di sorga. Di sana kamong baku dapa Allah yang putus manusia samua pung parkara, baku dapa samua orang yang pung hidop batul yang su mati dolo-dolo, yang su lapas dari tabiat hidop yang bardosa. 24 Di sana kamong jua baku dapa Yesus yang jadi jambatang par bawa janji yang baru dari Allah par manusia. Antua pung dara yang tatumpa di kayo salib tu labe bae dari Habel pung dara, tagal deng Antua pung dara orang dapa kasi ampong dari dosa, mar deng Habel pung dara orang dapa hukum.
25 Tagal itu, kamong musti ati-ati biar jang sampe kamong seng ambe pusing deng Allah pung kata-kata yang Antua bilang par kamong. Barang, kalo orang Israel yang seng dengar Allah pung kata-kata lewat Musa yang hidop di dunya ni sa dapa hukum, apalai deng katong yang dengar Antua yang bicara dari sorga? 26 Waktu Antua bicara par orang Israel dolo tu, Antua pung suara tu biking sampe dunya ni tagoyang. Mar sakarang, Antua janji, “Satu kali lai, Beta nanti bukang cuma goyang dunya ni sa, mar langit lai.”* 27 Waktu Antua bilang bagitu, itu pung arti kalo samua yang Antua biking tu nanti tagoyang la ancor, biar yang tatinggal tu cuma apa yang seng bisa tagoyang deng ancor. 28 Jadi, tagal katong nanti pegang parenta sama-sama deng Allah di Antua pung karajaang yang seng bisa tagoyang la ancor, mari katong minta dangke dari Antua. La mari katong somba Antua deng rasa hormat, iko cara yang biking sanang Antua pung hati. 29 Barang, Allah yang katong somba tu sama deng api yang kasi angos.*