Katong musti parcaya, macang deng orang-orang yang parcaya Allah yang hidop dolo-dolo
11:1-40
11
1 Basudara e! Yang nama parcaya tu bagini: Katong batul-batul tau kalo apa yang katong harap dari Tuhan tu, katong pasti dapa akang, biar kata katong balong lia akang lai. 2 Tagal katong pung tete-nene moyang parcaya Allah, Antua sanang deng dong.3 Tagal katong parcaya Allah, katong mangarti kalo Allah biking langit deng dunya ni deng Antua pung kata-kata. Jadi apa yang katong lia ni, Allah biking akang dari apa yang katong seng bisa lia.
4 Tagal Habel parcaya Allah, dia kasi korbang yang labe bae dari dia pung kaka Kain. Jadi tagal dia pung parcaya tu, Allah bilang kalo dia tu batul di muka Antua deng tarima korbang yang dia su bawa tu.* Dia su mati, mar anggap sa dia masi kasi nasehat par katong yang sakarang ni, tagal dia su kasi unju dia pung parcaya tu par jadi conto par katong.
5 Tagal Henok parcaya Allah, Antua angka dia hidop-hidop ka sorga, biar dia seng mati. Seng ada orang yang bisa dapa lia dia lai, tagal Antua su angka dia. Barang, waktu dia balong dapa angka, Antua bilang kalo dia biking Antua pung hati sanang.* 6 Jadi, seng ada orang yang bisa biking Allah pung hati sanang, kalo dia seng parcaya Antua. Barang, sapa yang mau datang par Allah, dia musti parcaya kalo Allah itu ada deng parcaya kalo Allah nanti kasi apa yang bae par orang yang sunggu-sunggu cari Antua.
7 Tagal Nuh parcaya Allah, waktu dia dengar Antua bicara soal hal-hal yang manusia balong parna lia, dia dengar-dengarang Antua. Dia biking kapal basar iko Allah pung parenta par kasi salamat dia deng dia pung kaluarga. Tagal dia pung parcaya tu, Antua bilang dia tu orang yang batul di muka Antua. La deng dia pung parcaya tu, dia kasi unju par orang-orang di dunya kalo dong pantas dapa hukum dari Tuhan.*
8 Tagal Abraham parcaya Allah, waktu Antua suru dia par pi ka negri yang nanti jadi dia pung anana cucu pung pusaka, dia dengar-dengarang Antua. Dia pi, biar kata dia seng tau mau pi ka mana.* 9 Tagal dia parcaya Allah, dia tinggal jadi orang dagang di tana yang Antua su janji par dia tu. Di situ, dia tinggal di tenda. Bagitu lai deng dia pung ana Isak deng cucu Yakub, yang tarima janji yang sama dari Antua.* 10 Dia tahang hati deng hidop macang bagitu, tagal dia ada tunggu-tunggu mau tinggal di kota yang Allah sandiri biking iko Antua pung rencana, kota yang pung pandasi kuat.
11 Tagal Abraham parcaya Allah, dia deng dia pung bini Sara bisa pung ana, biar kata Sara su talalu tua par pung ana. Barang, Abraham parcaya kalo Allah pasti biking apa yang Antua su janji.* 12 Jadi dari laki-laki satu, lahir dia pung anana cucu banya, biar kata dia su talalu tua par pung ana. Dia pung turunang tu banya seng bisa rekeng, macang deng bintang di langit deng paser di pinggir pante.*
13 Dong samua tu parcaya Allah sampe mati. Biar kata dong balong dapa apa yang Antua janji, mar dong parcaya kalo Antua pasti biking akang. Itu macang kata dong su lia akang dari jau, deng tunggu akang deng hati sanang. Tagal itu, dong mangaku kalo dong tu macang deng orang dagang yang tinggal sadiki tempo sa di dunya ni.* 14 Orang yang bilang bagitu tu kasi unju kalo dong ada tunggu-tunggu tampa tinggal yang tetap par dong. 15 Tampa yang dong ada tunggu-tunggu tu bukang dong pung tampa tinggal dolo yang dong su kasi tinggal tu. Kalo memang tampa tinggal dolo tu yang dong ada tunggu-tunggu, dong pasti pung kans par pulang ka sana. 16 Mar, yang dong rindu paskali tu tampa tinggal yang labe bae dari yang ada di dunya ni. Itu tu tampa tinggal di sorga. Tagal itu kong Allah seng malu waktu dong bilang kalo Antua tu Allah yang dong somba. Barang, Antua su kasi siap kota satu par dong.
17-18 Tagal Abraham parcaya Allah, waktu dia dapa tes dari Antua, dia siap kasi dia pung ana Isak par jadi korbang par Antua. Dia mau kasi korbang dia pung ana satu areng-areng tu, biar kata dia su tarima Antua pung janji,* waktu Antua bilang par dia kata, “Ale pung turunang yang Beta su janji tu asal dari ale pung ana Isak.”* 19 Dia parcaya Allah, tagal dia pikir kalo Allah pung kuasa par kasi hidop orang mati. Jadi anggap sa dia su tarima Isak kombali dari kamatiang.
20 Tagal Isak parcaya Allah, waktu dia su tua, dia kasi berkat par Yakub deng Esau yang dong nanti dapa.*
21 Tagal Yakub parcaya Allah, waktu dia su mau mati, dia kasi berkat par Yusuf pung ana dua tu, la dia batongka di dia pung kapala tongka la somba Allah.*
22 Tagal Yusuf parcaya Allah, waktu dia su mau mati, dia kasi tau kalo orang-orang Israel nanti kaluar dari Mesir, la kasi pasáng par dong par bawa dia pung tulang-tulang kaluar dari sana.*
23 Tagal Musa pung orang tatua parcaya Allah, waktu dia lahir, dia pung orang tatua sambunyi dia tiga bulang sepe-sepe. Barang, dong tau kalo dong pung ana tu bukang ana yang biasa-biasa sa, la tagal itu dong seng taku langgar Raja Mesir pung parenta par bunu anana laki-laki yang baru lahir.*
24 Tagal Musa parcaya Allah, pas dia basar, dia seng mau orang panggel dia par Raja Mesir pung ana parampuang pung ana.* 25 Barang, dia labe suka dapa siksa sama-sama deng Allah pung orang-orang daripada hidop sanang-sanang dalang dosa, biar kata itu cuma sadiki tempo sa. 26 Dia pikir, labe bae dia dapa hina tagal Kristus daripada dapa sagala harta di Mesir. Barang dia tau kalo eso lusa, Allah nanti balas dia tagal dia pung parcaya tu.
27 Tagal dia parcaya Allah, dia pi kasi tinggal Mesir deng seng taku kalo Raja Mesir nanti morka la hukum dia. Dia maju tarus, tagal dia macang kata su lia Antua yang manusia seng bisa lia tu.*
28 Tagal dia parcaya Allah, dia suru orang Israel biking hari basar Paska la bunu domba la kabas akang pung dara di dong pung pintu muka. Deng bagitu, malekat yang Allah suru par bunu anana yang tua di Mesir tu seng sonto orang Israel pung anana yang tua.*
29 Tagal orang Israel parcaya Allah, dong langgar Laut Mera, macang kata dong ada langgar di tana karing sa. Mar orang-orang Mesir, dong tinggalang waktu dong coba langgar akang.*
30 Tagal orang Israel parcaya Allah, waktu dong bajalang koliling kota Yeriho tuju hari, tembok-tembok yang ron kota tu rubu samua.
31 Tagal parampuang tarbae yang nama Rahab tu parcaya Allah, dia tarima orang Israel pung mata-mata la sambunyi dong di dia pung ruma. Tagal itu, dia seng dapa kasi binasa sama-sama deng orang-orang yang seng dengar-dengarang Allah di dia pung kota.*
32 Masi banya orang lai yang beta bisa bilang par kamong. Beta bisa carita soal Gideon, Barak, Simson, Yefta, Daud, Samuel, deng Allah pung juru-juru bicara yang laeng pung parcaya.* Mar, waktu seng kasi bae lai kalo beta carita soal dong samua. 33 Tagal dong samua parcaya Allah, ada dari dong yang kasi kala karajaang-karajaang, ada yang jadi pamimping-pamimping yang seng barát sabala, ada yang tarima apa yang Allah su janji par dong, deng ada yang tutu singa-singa pung mulu.* 34 Tagal dong parcaya Allah, ada dari dong yang salamat dari api basar, ada yang salamat dari orang-orang yang mau bunu dong, deng ada yang seng kuat, mar dapa kasi kuat dari Antua. Ada jua yang jadi kuat waktu baku prang la kasi kala tantara-tantara musu yang datang dari negri laeng.* 35 Ada jua parampuang-parampuang yang tagal dong parcaya Allah, dari dong pung kaluarga yang su mati, ada yang hidop kombali.
Mar ada orang laeng yang tagal parcaya Allah, dong dapa siksa sampe mati. Barang, dong seng mau dapa kasi bebas kalo musti manyangkal dong pung parcaya. Dong labe suka mati tagal dong tau kalo Allah nanti kasi hidop yang labe luar biasa par dong di sorga.* 36 Ada jua yang dapa hina deng dapa cambok, mala dapa rante deng dapa bui.* 37 Ada jua yang dapa lempar deng batu sampe mati, dapa gargaji bala dua, ka dapa bunu deng parang. Ada jua yang bajalang kalalerang deng pakiang dari kuli domba ka kuli kambing. Dong susa makanang, dapa biking susa, deng dapa siksa.* 38 Dong kalalerang di padang gurun deng di gunung-gunung, dalang goa-goa, deng dalang lobang-lobang batu. Dunya ni bukang tampa tinggal yang pantas par orang-orang yang pung parcaya macang dong. 39 Allah pung hati sanang tagal lia dong pung parcaya. Mar sampe mati jua, dong seng tarima apa yang Antua su janji par dong. 40 Barang, Allah su sadia apapa satu yang labe bae par katong samua yang parcaya. Antua mau biar satu waktu, katong deng dong nanti sama-sama tarima samua yang Antua su janji. La deng bagitu, katong samua jadi orang-orang yang seng kurang apapa lai di muka Antua.