Paulus pung Surat par Jamaat di
Galatia
Tabea
1:1-5
1
1-3 Par basudara jamaat yang ada di propinsi Galatia.Tabea! Beta ni Paulus yang jadi Yesus Kristus pung utusang bukang tagal manusia yang pili ka angka beta, mar tagal Yesus Kristus deng Allah Bapa yang su kasi hidop Antua kombali dari kamatiang tu yang pili beta.
Beta deng basudara samua yang parcaya Yesus yang ada sama-sama deng beta minta biar Allah Bapa yang katong somba deng Tuhan Yesus Kristus kasi berkat basar deng dame par kamong samua. 4 Kristus su kasi Antua pung diri par mati tagal katong pung dosa-dosa biar katong bisa lapas dari kuasa jahat yang ator dunya ni. Antua biking bagitu iko katong pung Allah Bapa pung mau. 5 Cuma Allah sa yang pantas par dapa puji tarus-tarus. Amin.
Jamaat Galatia su bale balakang dari Kabar Bae yang batul
1:6-10
6 Basudara e, beta herang deng kamong samua! Allah su pili kamong par jadi Antua pung orang-orang tagal Kristus pung hati bae par kamong. Mar sakarang, kamong paleng capat paskali par bale balakang dari Allah la iko kabar bae yang laeng, 7 yang kalo iko batul, itu bukang Kabar Bae dari Allah. Beta bilang bagitu tagal ada orang yang coba putar bale Kabar Bae soal Kristus deng biking sampe kamong seng tau ajarang mana yang batul. 8 Mar dengar beta bilang par kamong: Kalo ada yang kasi balajar kabar bae yang laeng dari Kabar Bae yang katong su kasi balajar par kamong tu, biar kata dia tu satu dari katong sandiri ka malekat dari sorga lai, Allah nanti hukum dia tarus-tarus. 9 Katong su bilang akang par kamong, mar beta mau ulang akang sakali lai: Kalo ada yang kasi balajar kabar bae yang laeng dari Kabar Bae yang kamong su tarima dari katong tu, Allah nanti hukum dia tarus-tarus. 10 Beta bilang bagitu bukang par dapa puji ka kasi sanang manusia pung hati, mar tagal beta cuma usaha par kasi sanang Allah pung hati. Jadi kalo beta masi usaha par dapa puji, beta ni bukang Kristus pung jongos.
Paulus carita soal dia dapa pili par jadi Yesus pung utusang
1:11-24
11 Basudara samua, beta mau kamong batul-batul tau kalo Kabar Bae yang beta kasi balajar par kamong tu bukang dari manusia. 12 Barang, beta seng tarima akang dari manusia deng bukang manusia jua yang kasi balajar akang par beta. Mar Yesus Kristus sandiri yang kasi tau akang par beta.
13 Kamong pasti su dengar carita soal beta pung hidop dolo-dolo, waktu beta masi iko agama Yahudi pung atorang-atorang. Waktu itu, beta usaha sunggu-sunggu par siksa Allah pung jamaat deng usaha tarus par kasi binasa dong.* 14 La kalo banding beta deng beta pung tamang-tamang satu bangsa yang satu jamang deng beta, seng ada satu orang lai yang labe dari beta. Beta paleng samangat deng usaha tarus par iko atorang-atorang agama yang katong pung tete-nene moyang kasi tu.* 15 Mar, Allah su pili beta dari waktu beta masi ada dalang beta pung mama pung poro lai deng su panggel beta par karja par Antua tagal Antua pung hati bae. 16 Antua putus par kasi unju Antua pung Ana par beta biar beta bisa kasi tau soal Antua pung Ana tu par orang-orang bukang Yahudi. Waktu Antua panggel beta, beta seng tukar pikirang deng satu orang lai soal itu.* 17 Beta jua seng pi ka kota Yerusalem par minta nasehat dari orang-orang yang su jadi Yesus pung utusang labe kamuka dari beta. Mar, beta langsung pi ka tana Arab la dari situ beta bale kombali ka kota Damsik.
18 Tiga taong abis beta parcaya Yesus, beta pi ka Yerusalem par baku kanal deng Petrus.a Beta tinggal sapulu lima hari di dia pung ruma.* 19 Mar beta seng baku dapa deng Yesus pung utusang-utusang yang laeng, cuma Yesus pung sudara laki-laki yang nama Yakobis tu sa. 20 Allah yang jadi saksi kalo apa yang beta tulis ni batul. Beta seng karang-karang akang.
21 Abis itu, beta pi ka propinsi Siria deng propinsi Kilikia. 22 Waktu itu, orang-orang yang parcaya Kristus di propinsi Yudea balong kanal beta pung rupa. 23 Dong cuma dengar kalo orang yang dolo jaga siksa Kristus pung orang-orang tu, sakarang dia su kasi balajar Kabar Bae soal Kristus yang dolo dia parna inging kasi ancor tu. 24 Jadi dong samua puji-puji Allah, tagal apa yang Antua su biking dalang beta pung hidop.