Paulus pung Surat par Jamaat di
Efesus
Kata-Kata Partama
Sapa yang tulis surat ni: Orang yang tulis surat Efesus ni Paulus, waktu dia ada dalang bui di kota Roma tagal kasi tau Kabar Bae soal Yesus (3:1, 4:1, 6:20). Dia parna tinggal di kota Efesus tiga taong la kasi balajar Kabar Bae di sana deng di antero propinsi Asia (Utusang pung Carita 19:1—20:1, 31).
Surat ni par sapa: Surat ni par jamaat di kota Efesus deng jamaat-jamaat yang ada di dekat-dekat kota Efesus. Kota Efesus ni ibu kota deng kota paleng panting di propinsi Asia, di negara Turki sakarang. Orang-orang yang tinggal di kota ni labe banya orang-orang yang bukang Yahudi (2:11-12). Dong somba banya dewa-dewi. Satu yang paleng panting tu nama dewi Artemis (Utusang pung Carita 19:35).
Mangapa Paulus tulis surat ni: Paulus tulis surat ni par ajar jamaat Efesus biar dong labe mangarti Tuhan Allah pung bae par dong sampe dong bisa dapa kasi salamat dari dosa-dosa, hidop batul di muka Allah, deng labe tamba tau deng mangarti soal berkat-berkat rohani yang dong dapa tagal dong su satu hati deng Yesus Kristus (1:3). Dia jua kasi tau jamaat kalo dong musti taika jadi satu tagal dong su satu hati deng Yesus Kristus. Par jadi conto, dia bilang kalo Yesus Kristus tu kapala la orang-orang parcaya tu sama deng Antua pung badang yang taika dari bagiang yang beda-beda (1:22-23, 4:4, 15-16, 5:23-32). Dia jua bilang kalo Yesus tu macang deng batu pandasi yang paleng panting dari ruma satu, la orang-orang yang parcaya Antua tu sama deng ruma tu sandiri (2:20-22).
Dalang surat ni, dia jua ada kasi nasehat laki-bini, orang tatua deng anana, deng jua jongos-jongos deng dong pung bos-bos (5:22—6:9). Dia kasi nasehat dong samua par pake samua yang Allah su kasi par dong biar waktu dapa coba dari Setang pung Raja par biking dosa, dong bisa malawang dia, sama deng tantara yang pake alat-alat prang samua par lawang dia pung musu (6:11).
Surat ni tabage par babarapa bagiang:
| 1:1-2 | Tabea |
| 1:3—3:21 | Allah pung maksud par orang-orang parcaya |
| 4:1—6:9 | Cara hidop yang pantas par orang-orang parcaya |
| 6:21-24 | Paulus tutu dia pung surat |