Tuhan Yesus yang kasi salamat katong dari dosa
2:1-10
2
1 Basudara e! Kamong dolo tu macang deng orang yang su mati, tagal kamong biasa malawang Allah pung parenta deng biking sagala macang dosa. 2 Waktu itu, kamong hidop macang deng orang-orang yang seng kanal Allah di dunya ni. Kamong jua iko Setang pung Raja yang jahat tu, yang parenta roh-roh jahat yang ada di langit. Setang pung Raja tu jua ada parenta orang-orang yang seng iko Allah pung mau. 3 Dolo katong jua sama deng dong tu. Katong hidop iko katong pung tabiat hidop yang jahat deng biking apa sa iko katong pung hati deng pikirang yang jahat. Waktu katong biking bagitu, Allah pasti morka katong, sama deng Antua morka samua orang yang salalu biking dosa.4 Mar, Allah pung hati paleng bae par katong paskali. Barang, Antua paleng sayang katong 5 sampe Antua biking katong hidop kombali sama-sama deng Yesus Kristus, biar kata katong macang deng orang yang su mati, tagal katong biasa malawang Antua pung parenta. Jadi, tagal Allah pung hati bae, Antua kasi salamat katong.* 6 La tagal katong su satu hati deng Yesus Kristus, Allah kasi hidop katong kombali sama-sama deng Kristus deng kasi dudu katong par pegang parenta sama-sama deng Antua di sorga. 7 Allah biking bagitu biar eso lusa nanti, samua orang bisa lia Antua pung hati bae batambong-tambong tu, tagal apa yang Yesus Kristus biking par katong.
8 Jadi, tagal Allah pung hati bae, Antua kasi salamat kamong tagal kamong parcaya Yesus Kristus. Kamong salamat bukang tagal kamong pung usaha sandiri, mar tagal Antua pung mau sandiri par biking bagitu. 9 Jadi, tagal itu bukang kamong pung usaha sandiri, jang ada satu orang lai yang makang puji soal itu. 10 Barang, katong salamat tagal Allah sandiri yang kasi salamat katong, tagal katong su satu hati deng Yesus Kristus. La deng bagitu, Antua biking katong pung hidop jadi baru, biar katong bisa biking samua yang bae, yang Antua su ator dari kamuka-kamuka lai par katong biking.
Yesus Kristus yang biking orang Yahudi deng orang bukang Yahudi baku bae
2:11-22
11 Basudara orang Efesus e! Kamong tu bukang orang Yahudi. Kamong dapa panggel par “orang-orang yang seng dapa sunat” dari orang-orang Yahudi, yang anggap kalo cuma dong tu sa yang jadi Allah pung orang-orang, tagal dong dapa sunat. Dong mangarti deng dong pung sunat tu, biar kata itu cuma tanda yang manusia biking. Coba inga kamong pung hidop dolo-dolo. 12 Waktu itu, kamong balong satu hati deng Yesus Kristus. Kamong macang deng orang luar yang seng satu kalompok deng orang-orang Yahudi yang su dapa pili dari Allah par jadi Antua pung orang-orang. Kamong seng dapa bagiang apapa dari apa yang Allah su janji par Abraham deng dia pung anana cucu. Kamong hidop di dunya ni, mar kamong seng tau soal Allah. Jadi, seng ada apapa yang kamong bisa batul-batul harap par kasi salamat kamong. 13 Mar sakarang, tagal kamong su satu hati deng Yesus Kristus, kamong seng hidop macang bagitu lai. Kamong yang dolo jau dari Allah, sakarang su dekat deng Antua tagal Yesus Kristus pung dara su tatumpa waktu Antua mati di kayo salib.
14 Antua sandiri yang biking katong orang-orang Yahudi deng kamong orang-orang bukang Yahudi baku bae. Dolo katong deng kamong baku musu. Akang macang deng tembok basar satu yang kasi pisa katong samua. Mar waktu Antua mati di kayo salib, Antua su kasi ancor tembok tu la biking katong samua jadi satu kalompok. 15 Waktu Antua mati, Antua hapus orang Yahudi pung atorang-atorang deng parenta-parenta agama yang biking orang Yahudi deng bukang Yahudi seng bisa baku bae. Deng cara bagitu, Antua biking orang Yahudi deng orang bukang Yahudi baku bae jadi satu kalompok yang baru yang su satu hati deng Yesus Kristus, biar dong hidop dame satu deng laeng.* 16 Deng cara bagitu, dong tu bukang dua kalompok lai, mar su jadi satu kalompok yang su baku bae deng Allah. Dong seng baku musu lai, tagal waktu Antua mati di kayo salib, Antua hapus samua hal yang dolo biking dong baku musu tu.* 17 Itu tu alasang mangapa kong Antua datang par kasi tau Allah pung Kabar Bae soal dame par kamong orang-orang bukang Yahudi yang jau dari Allah deng par katong orang-orang Yahudi yang dekat deng Allah.* 18 Barang lewat Antua, katong samua bisa datang par katong pung Allah Bapa, tagal Allah pung Roh yang sama yang tolong katong.
19 Tagal itu basudara e, kamong tu bukang orang dagang ka orang luar lai, mar su jadi satu kalompok deng Allah pung orang-orang samua. Kamong tu su maso jadi Antua pung kaluarga. 20 Antua pung kaluarga tu macang deng ruma satu yang Antua kasi badiri. Antua pung juru-juru bicara deng Yesus pung utusang-utusang tu macang deng tiang-tiang ruma tu, la Yesus Kristus macang deng batu pandasi yang paleng panting dari ruma tu. 21 Di atas batu pandasi yang paleng panting tu, samua bagiang yang beda-beda dari ruma tu taika jadi satu bagus-bagus. La deng bagitu, ruma tu jadi tamba basar tarus par jadi Tuhan pung Tampa Tinggal yang kudus. 22 Di atas batu pandasi yang paleng panting tu jua, kamong orang-orang bukang Yahudi taika jadi satu deng katong orang-orang Yahudi, macang deng ruma yang Allah biking par Antua deng Antua pung Roh tinggal di situ.