Paulus pung Surat par Jamaat di
Filipi
Kata-Kata Partama
Sapa yang tulis surat ni: Surat Filipi ni Paulus yang tulis. Dia tulis surat ni waktu dia ada dalang bui di kota Roma tagal kasi tau Kabar Bae soal Yesus Kristus (1:13-14). Dia yang partama kali kasi tau Kabar Bae soal Yesus Kristus di kota Filipi tu sama-sama deng Silas, Timotius deng Lukas (Utusang pung Carita 16:11-40).
Surat ni par sapa: Surat ni par jamaat di kota Filipi. Filipi ni kota panting deng kaya yang ada di propinsi Makedonia pung sabala matahari nai, yang sakarang ada di negara Yunani. Banya dari orang yang tinggal di Filipi tu tantara-tantara yang su pangsiong. Seng banya orang Yahudi tinggal di sana. Biar kata ada yang seng tarima Kabar Bae, mar ada jua yang jadi parcaya par Yesus Kristus (Utusang pung Carita 16:14-15, 34). Dong itu tu jamaat partama di Eropa.
Waktu Paulus pi dari Filipi, babarapa kali jamaat Filipi kiring kepeng par bantu dia (1:5, 4:15-16). La waktu jamaat Filipi dengar kalo dia ada dapa bui di kota Roma, dong kiring kepeng par bantu dia lewat anggota jamaat satu nama Epaproditus (4:14, 18). Di Roma, dia tinggal babarapa bulang par bantu Paulus (2:25, 30). Abis itu, Paulus suru dia bale kombali ka Filipi (2:25), deng bawa surat Filipi ni par jamaat di sana.
Mangapa Paulus tulis surat ni: Paulus tulis surat ni par minta dangke banya par jamaat Filipi tagal dong su bantu dia pung karja par kasi tau Allah pung Kabar Bae soal Yesus Kristus (1:2-11, 4:15-20). Dia jua mau kasi inga dong par parcaya Yesus Kristus tarus deng sabar biar kata dong susa deng sangsara (1:27-30, 4:1). Dia minta dong par hidop satu hati tarus, baku sayang, deng randa hati macang deng Yesus Kristus (2:1-5). Dia bilang lai kalo hal yang labe panting dari samua-samua tu kalo orang kanal Yesus Kristus batul-batul (3:1-11), mar musti ati-ati deng orang-orang yang kasi balajar ajarang yang seng batul deng jua dong pung kalakuang (3:17-21).
Surat ni tabage par babarapa bagiang:
| 1:1-11 | Tabea deng Paulus minta dangke dari Allah |
| 1:12-26 | Kabar Bae soal Yesus Kristus tasiar tarus biar kata Paulus maso bui |
| 1:27—2:18 | Parcaya Yesus Kristus tarus deng hidop iko Antua pung cara hidop |
| 2:19-30 | Soal Timotius deng Epaproditus |
| 3:1—4:1 | Jang iko ajarang yang seng batul |
| 4:2-9 | Nasehat-nasehat par jamaat Filipi |
| 4:10-23 | Paulus minta dangke par jamaat di Filipi deng tutu dia pung surat |