Paulus pung Surat par Jamaat di
Kolose
Kata-Kata Partama
Sapa yang tulis surat ni: Orang yang tulis surat Kolose ni Paulus. Dia tulis akang waktu dia ada dalang bui di kota Roma tagal kasi tau Kabar Bae soal Yesus. Paulus balong parna baku dapa deng jamaat di Kolose (2:1) deng bukang dia yang kasi badiri jamaat tu.
Surat ni par sapa: Surat ni par jamaat di Kolose. Kolose tu satu kota yang ada di propinsi Asia, di negara Turki sakarang. Tagal akang seng talalu jau dari kota Efesus, babarapa orang Kristen dari kota Efesus pi ka kota Kolose par kasi tau Kabar Bae par orang-orang bukang Yahudi di sana. Akang pung hasil ada orang-orang Kolose yang parcaya Tuhan Yesus.
Waktu itu, dalang jamaat di Kolose ni ada guru-guru yang kasi balajar ajarang-ajarang yang seng batul. Dong bilang kalo jamaat Kolose mau dapa kasi salamat dari Allah, dong jua musti somba apa sa yang pung kuasa di langit macang malekat-malekat (2:18) ka roh-roh, bukang cuma Tuhan Yesus sa. Guru-guru parlente tu jua bilang par jamaat kalo dong jua musti biking atorang-atorang dalang Hukum Torat, macang atorang soal sunat, makanang yang haram, ka orang Yahudi pung hari-hari basar (2:16, 20-22).
Mangapa Paulus tulis surat ni: Paulus tulis surat ni par kasi balajar jamaat di Kolose kalo Kristus pung kuasa labe basar dari samua-samua yang ada di langit deng dunya (1:15-17, 2:10), jadi orang Kristen jang taru harap par apapa yang laeng lai. Paulus jua bilang jang pusing deng guru-guru parlente yang bilang kalo orang Kristen musti iko atorang Torat (2:16) ka atorang apa sa par dapa kasi salamat, tagal atorang yang manusia biking seng pung kuasa par roba manusia pung napsu jahat. Mala, Yesus Kristus su biking samua yang katong parlu biar Allah kasi salamat katong dari katong pung dosa-dosa. Barang lewat Kristus, orang parcaya macang deng orang mati yang Allah su kasi hidop kombali (2:13, 3:1). Tagal itu, orang parcaya musti kasi tinggal tabiat hidop yang lama la taru hati par apa sa yang Allah mau (3:1-17).
Surat ni tabage par babarapa bagiang:
| 1:1-14 | Tabea deng Paulus minta dangke dari Allah |
| 1:15-23 | Yesus pung kuasa labe basar dari samua-samua |
| 1:24—2:5 | Paulus pung karja par kasi tau Kabar Bae |
| 2:6—4:1 | Nasehat soal bagemana hidop satu hati deng Kristus |
| 4:2-18 | Paulus tutu dia pung surat |