Paulus pung Surat Partama par Jamaat di
Tesalonika
Kata-Kata Partama
Sapa yang tulis surat ni: Orang yang tulis surat Partama Tesalonika ni Paulus. Dia yang partama kali kasi tau Kabar Bae deng kasi badiri jamaat di Tesalonika, sama-sama deng dia pung tamang karja Timotius deng Silas. Mar, Paulus dong musti lari dari Tesalonika tagal orang-orang Yahudi yang seng parcaya Yesus biking kaco (Utusang pung Carita 17:1-9). Seng lama abis itu, Paulus suru Timotius bale pi par dong, par tau kalo dong di Tesalonika tu masi tetap parcaya Yesus. Timotius kasi tau Paulus kata jamaat di Tesalonika tu masi tetap parcaya Antua. Kabar ini biking Paulus pung hati paleng sanang, la tagal itu dia tulis surat ni par orang-orang parcaya di Tesalonika.
Surat ni par sapa: Surat ni par jamaat yang ada di kota Tesalonika, ibu kota dari propinsi Makedonia di karajaang Roma. Kota ni satu kota yang panting tagal akang jadi pusat jual-bali deng karajaang Roma pung markas tantara ada di situ lai.
Orang-orang parcaya di kota tu ada yang asal dari agama Yahudi, mar ada jua dari agama-agama bukang Yahudi yang somba dewa-dewa (1:9). Tagal dong su bale balakang dari dong pung agama-agama yang dolo la parcaya Yesus Kristus, dong dapa siksa dari dong pung orang-orang sandiri (2:13-14).
Mangapa Paulus tulis surat ni: Paulus tulis surat Partama Tesalonika ni par kasi kuat orang-orang parcaya di Tesalonika pung hati, deng par kasi samangat dong yang dapa siksa tu biar dong tetap parcaya Tuhan Yesus tarus. Paulus jua kasi balajar babarapa hal yang dong di jamaat Tesalonika balong mangarti. Dia kasi balajar soal bagemana orang-orang parcaya musti hidop biar Allah pung hati sanang (4:1-12, 5:12-22). Dia jua kasi jelas soal apa yang nanti jadi par orang-orang parcaya yang su mati, waktu Yesus Kristus bale kombali ka dunya (4:13-18).
Surat ni tabage par babarapa bagiang:
| 1:1-10 | Tabea deng Paulus minta dangke dari Allah |
| 2:1—3:13 | Paulus pung karja par jamaat Tesalonika |
| 4:1—5:22 | Cara hidop yang pantas par orang-orang parcaya |
| 5:23-28 | Paulus tutu dia pung surat |