Paulus pung karja di Tesalonika
2:1-12
2
1 Basudara yang iko Yesus, kamong sandiri su tau kalo seng parcuma katong datang kasi tau Kabar Bae par kamong di kota Tesalonika. 2 Kamong jua su tau kalo waktu katong balong datang par kamong, katong dapa siksa deng dapa biking malu di kota Filipi. Mar Allah yang katong somba tu su kasi kuat katong pung hati, sampe katong barani kasi tau Kabar Bae dari Antua par kamong di Tesalonika, biar kata orang-orang malawang katong.*3 Katong datang kasi tau Kabar Bae par kamong tu deng hati yang barsi. Katong seng kasi tau kabar yang seng batul. Katong seng parna cari untung dari kamong ka parlente kamong. 4 Mar, Allah su tes katong pung hati la lia kalo Antua bisa parcaya katong, la tagal itu Antua pili katong par kasi tau Kabar Bae. Jadi, katong kasi tau akang par kamong bukang par biking sanang manusia pung hati, mar par biking sanang Allah pung hati sa. Cuma Antua yang salalu tau katong pung dalang hati. 5 Kamong sandiri su tau kalo waktu kasi tau Kabar Bae par kamong, katong seng parna bicara mulu manis deng kamong ka cari kepeng tado-tado dari kamong. Allah jadi saksi soal itu. 6 Tagal katong ni Yesus Kristus pung utusang, katong bisa sa biking orang taru hormat par katong. Mar katong seng mau biking kamong deng orang laeng biking bagitu.
7 Mala waktu katong ada sama-sama deng kamong, katong hidop manis-manis deng kamong, macang deng mama yang kalesang dia pung anana. 8 Katong paleng sayang kamong, jadi katong sanang kasi tau Kabar Bae dari Allah par kamong. Mar bukang itu sa, tagal katong sayang kamong sampe katong bantu kamong lai.
9 Basudara yang iko Yesus. Kamong masi inga to? Waktu katong ada kasi tau Kabar Bae dari Allah par kamong, katong banting tulang siang-malang par katong pung hidop hari-hari. Katong seng mau biking susa satu orang lai dari kamong par katong pung ongkos hidop hari-hari. 10 Waktu katong ada deng kamong yang parcaya Yesus, kamong su lia deng mata kapala sandiri bagemana katong pung hidop. Allah su lia lai. Katong hidop deng hati barsi deng biking apa yang batul. Orang-orang jua seng bisa bilang kalo katong biking apapa yang sala par kamong. 11 Kamong tau kalo katong urus kamong macang deng bapa yang urus antua pung anana. Katong su kasi nasehat kamong deng kasi kuat kamong pung hati satu abis satu. 12 Katong buju kamong biar kamong pung hidop biking Allah pung hati sanang. Barang, Allah panggel kamong par jadi Antua yang pegang parenta jadi Raja tu pung orang-orang, deng kamong nanti dapa hormat sama-sama deng Antua.
Jamaat di Tesalonika biking Paulus dong pung hati paleng sanang
2:13-16
13-14 Basudara yang iko Yesus, katong seng putus-putus minta dangke banya dari Allah tagal Kabar Bae yang katong su kasi tau par kamong tu, kamong tarima akang macang deng Allah sandiri yang kasi tau akang par kamong, bukang manusia. Deng memang batul, Kabar Bae tu dari Allah. La Kabar Bae tu su mulai roba kamong yang parcaya pung hidop. Katong tau kalo kamong su tarima Kabar Bae tu tagal dari kamong pung orang-orang Tesalonika sandiri ada yang siksa kamong. Jadi, kamong sama deng orang-orang yang parcaya Yesus Kristus di propinsi Yudea, tagal dong pung orang-orang Yahudi sandiri jua siksa dong.* 15 Orang-orang Yahudi yang su bunu Tuhan Yesus deng Allah pung juru-juru bicara, dong tu su siksa katong lai. Dong jua baku musu deng samua orang. Allah batul-batul seng suka dong pung kalakuang.* 16 Waktu katong mau kasi tau Allah pung Kabar Bae par orang-orang yang bukang Yahudi, orang Yahudi coba pele-pele katong. Dong biking bagitu biar Allah seng kasi salamat orang-orang yang bukang Yahudi. Dong pung cara bagitu yang biking dong pung dosa batamba tarus. Jadi sakarang ni, Allah mara dong paskali sampe Antua su siap par hukum dong.
Paulus dong rindu par baku dapa deng jamaat di Tesalonika
2:17-20
17 Basudara samua, biar kata orang su kasi pisa katong dari kamong sadiki lama, mar katong rindu kamong tarus. Jadi, katong cari jalang tarus par baku dapa deng kamong. 18 Katong mau paskali par datang lia kamong. Mala beta su babarapa kali coba pi lia kamong di kota Tesalonika, mar Setang pung Raja jaga pele-pele katong. 19 Katong rindu par lia kamong tagal kamong tu yang katong harap par biking katong pung hati sanang. La waktu Tuhan Yesus yang katong somba tu bale kombali, kamong yang nanti angka katong pung muka. 20 Memang batul! Kamong yang angka katong pung muka deng yang biking katong pung hati paleng sanang.