Paulus pung Surat Partama par Jamaat di
Tesalonika
Tabea
1:1
1
1 Par basudara jamaat di kota Tesalonika yang su satu hati deng katong pung Allah Bapa deng Tuhan Yesus Kristus.Tabea! Ini beta Paulus deng beta pung tamang karja, Silasa deng Timotius.
Katong minta biar Tuhan kasi berkat basar deng dame par kamong samua.
Paulus minta dangke dari Allah
1:2-10
2-3 Katong tiga minta dangke tarus dari Allah tagal kamong samua su parcaya Antua. Waktu katong sombayang par katong pung Allah Bapa, katong seng parna lupa sombayang par kamong. Katong inga kamong pung karja par Tuhan Yesus tagal kamong parcaya Antua. Katong inga bagemana kamong su karja karas par bantu orang-orang parcaya laeng tagal kamong sayang dong. Katong jua inga kalo waktu kamong sangsara, kamong parcaya tarus kalo Tuhan Yesus Kristus yang katong somba tu nanti bale kombali.
4 Basudara samua yang Allah sayang! Katong tau kalo Allah su pili kamong par jadi Antua pung orang-orang. 5 Barang, waktu katong kasi tau Kabar Bae par kamong, katong seng bicara deng katong pung kata-kata sandiri. Mar Allah pung Roh kasi kuasa par katong sampe katong bicara pake Antua pung kata-kata. Jadi, katong batul-batul parcaya kalo Kabar Bae yang katong bilang par kamong tu batul. La waktu katong tinggal sama-sama deng kamong, kamong jua su lia katong pung cara hidop soal bagemana katong bantu kamong. 6 Katong jua tau kalo Allah su pili kamong tagal katong lia bagemana kamong iko katong deng Tuhan Yesus pung conto. Barang, biar kata kamong sangsara tagal tarima Kabar Bae tu, kamong tarima akang deng hati sanang tagal Allah pung Roh karja dalang kamong pung hati. 7 Deng kamong pung cara hidop tu, kamong su jadi conto par samua orang yang parcaya Yesus di propinsi Makedonia deng propinsi Akaya sampe dong bisa hidop macang deng kamong lai. 8 Tagal kamong sampe orang-orang di Makedonia deng Akaya su dengar Kabar Bae soal Tuhan Yesus. Mar bukang di dua tampa tu sa. Orang-orang di samua tampa su dengar soal bagemana kamong parcaya Allah. Jadi, katong seng usa bilang apapa lai, barang samua orang su tau bagemana kamong parcaya Allah. 9 Orang banya tu su carita soal bagemana kamong su tarima katong deng bae-bae. Dong jua carita soal bagemana kamong kasi tinggal kamong pung dewa-dewa la somba Allah yang hidop deng yang batul. 10 Dong carita lai kalo kamong ada tunggu Allah pung Ana yang nanti datang dari sorga. Ana tu Yesus, yang Allah su kasi hidop kombali. Yesus ni yang kasi salamat katong biar Allah seng hukum katong.