Paulus pung Surat Kadua par Jamaat di
Tesalonika
Kata-Kata Partama
Sapa yang tulis surat ni: Orang yang tulis surat 2 Tesalonika ni Paulus. Dia tulis akang mangkali babarapa bulang abis tulis surat 1 Tesalonika. Lia jua Kata-kata Partama surat 1 Tesalonika.
Surat ni par sapa: Surat ni par jamaat yang ada di kota Tesalonika (Lia jua Kata-kata Partama surat 1 Tesalonika). Abis tarima surat 1 Tesalonika tu, ada orang-orang dalang jamaat yang sala mangarti Paulus pung ajarang soal apa tempo Tuhan Yesus bale kombali (1 Tesalonika 5:1-11). Barang, ada yang ajar kalo Tuhan Yesus su bale kombali (2:2), jadi jamaat bingong tagal dong masi dapa siksa. Tarus ada jua yang ajar kalo seng lama lai Yesus mau bale kombali, jadi ada dari jamaat yang seng mau karja lai (3:6, 11-12).
Mangapa Paulus tulis surat ni: Paulus tulis surat 2 Tesalonika par kasi batul jamaat pung pikirang-pikirang yang sala soal apa tempo Tuhan Yesus nanti bale kombali ka dunya. Dia kasi jelas kalo Tuhan Yesus balong bale kombali (1:7, 2:1). Jadi, akang pung waktu par Allah balas orang-orang yang ada biking dong sangsara balong datang lai (1:6). La orang seng bole pamalas karja, mar musti karja biar dong bisa makang, iko Paulus dong pung conto waktu masi tinggal sama-sama deng dong (3:7-10). Dalang surat ini, Paulus jua kasi kuat dong pung hati deng kasi samangat dong yang dapa siksa tu biar dong tetap parcaya Tuhan Yesus tarus (1:11-12, 2:13-17).
Surat ni tabage par babarapa bagiang:
| 1:1-12 | Tabea deng Paulus minta dangke dari Allah |
| 2:1-17 | Ajarang soal Yesus nanti bale kombali |
| 3:1-5 | Paulus minta jamaat Tesalonika sombayang par Paulus dong |
| 3:6-15 | Orang parcaya jang pamalas karja |
| 3:16-18 | Paulus tutu dia pung surat |