Jaga diri bae-bae sampe Tuhan datang kombali
5:1-11
5
1 Basudara yang iko Yesus, dalang surat ni, beta, Silas, deng Timotius seng parlu tulis soal apa tempo Tuhan Yesus bale kombali. 2 Barang, kamong sandiri su batul-batul tau kalo Antua nanti bale kombali di waktu yang katong seng sangka-sangka, macang deng pancuri datang tenga malang.* 3 Waktu itu tu, orang-orang pikir kalo dunya ni ada bae-bae sa. Dong bilang, “Samua di dunya ni bae-bae sa. Katong seng usa taku apapa.”Mar akang seng bagitu! Skrek bagini, dong dapa cilaka. Akang sama deng parampuang satu yang skrek poro saki waktu mau kasi lahir ana. Dia seng bisa lari dari akang. Bagitu lai waktu Tuhan Yesus bale kombali, dong seng bisa lari dari akang.
4-5 Mar basudara yang iko Yesus, waktu Tuhan Yesus bale kombali, kamong seng takajo macang deng tuang ruma yang tidor mati tenga malang waktu pancuri maso. Mar kamong su siap waktu Tuhan Yesus bale kombali, tagal kamong seng hidop sama deng orang-orang yang seng kanal Tuhan. Dong tu macang deng orang yang hidop dalang galap. Mar kamong samua hidop iko Antua pung mau, macang deng orang yang hidop dalang tarang. Katong seng hidop dalang galap. 6 Jadi, katong samua jang macang deng orang-orang yang seng parcaya Tuhan, yang seng tau kalo Yesus nanti bale kombali. Dong macang deng orang yang tidor mati. Mar, katong musti jaga-jaga deng tahang hati, biar katong siap waktu Yesus bale. 7 Barang, orang yang tidor mati, dong biasa tidor mati deng seng jaga-jaga waktu malang. La orang yang mabo, dong biasa mabo deng seng tahang hati waktu malang lai. 8 Mar katong yang parcaya Yesus ni musti tahang hati la biking apa yang batul, macang deng apa yang orang-orang biking waktu siang tarang. Katong musti parcaya Yesus deng baku sayang satu deng laeng. Kalo katong biking bagitu, katong macang deng tantara yang bawa dia pung pampele dada par jaga diri biar dia seng luka dalang prang. Katong jua musti taru harap par Antua kalo Antua nanti kasi salamat katong. Kalo katong biking bagitu, katong macang deng tantara yang pake topi waja dalang prang biar seng mati.*
9 Allah pili katong bukang par hukum katong, mar par kasi salamat katong, la katong salamat tagal Tuhan Yesus Kristus yang katong somba. 10 Yesus su mati par katong, biar waktu Antua bale kombali, katong yang masi hidop ka yang su mati ka, katong nanti tinggal sama-sama deng Antua. 11 Jadi, kamong musti baku kasi nasehat deng baku bantu biar kamong labe tamba parcaya macang deng apa yang kamong ada biking tu.
Paulus kasi nasehat par jamaat Tesalonika
5:12-22
12 Basudara yang iko Yesus e! Beta, Silas, deng Timotius minta kamong taru hormat par orang-orang yang karja karas par Tuhan di tenga-tenga kamong. Dong su dapa pili dari Tuhan par pimping deng kasi nasehat kamong biar kamong seng biking dosa. 13 Kamong musti batul-batul taru hormat deng sayang dong tagal dong pung karja par bantu kamong tu. Jang baku bakalai, mar hidop bae-bae satu deng laeng.
14 Basudara, kamong musti tagor orang-orang yang pamalas karja. Kasi kuat orang-orang yang pung hati takotang. Tolong orang-orang yang seng kuat. Sabar deng samua orang. 15 Jaga biar seng ada yang balas kajahatang deng kajahatang, mar usaha tarus par biking yang bae par orang-orang yang parcaya Yesus deng samua orang laeng lai.
16 Kamong pung hati musti paleng sanang tarus. 17 Jang pamalas sombayang. Sombayang siang-malang. 18 Minta dangke dari Allah par samua yang jadi dalang kamong pung hidop hari-hari. Barang, Allah mau kamong biking bagitu tagal kamong su satu hati deng Yesus Kristus.
19 Jang malawang Tuhan pung Roh pung karja. 20 Jadi, kalo ada orang yang kasi tau pasáng-pasáng yang dong dapa dari Tuhan, jang anggap enteng pasáng-pasáng tu. 21 Mar, kamong musti timbang samua pasáng biar kamong tau kalo itu dari Tuhan ka seng. Kalo itu dari Tuhan, iko akang. 22 Jang iko nasehat tarbae yang suru orang par biking kajahatang.
Paulus tutu dia pung surat
5:23-28
23 Basudara samua yang iko Yesus e! Beta, Silas, deng Timotius sombayang biar Allah yang biking katong hidop dame tu biking kamong batul-batul jadi Antua pung orang-orang yang iko Antua pung mau. Katong jua minta Antua jaga kamong pung hati, nyawa, deng badang biar waktu Yesus Kristus, Tuhan yang katong somba, bale kombali, kamong seng bardosa. 24 Allah yang panggel kamong par jadi Antua pung orang-orang yang seng bardosa, deng katong parcaya kata Antua nanti biking bagitu tagal Antua salalu biking apa yang Antua bilang.
25 Basudara e, katong minta kamong sombayang par katong lai. 26 Kiring katong pung salam manis par basudara samua yang iko Yesus yang ada di situ. 27 La deng Tuhan Yesus pung kuasa, beta minta kamong musti baca surat ni par samua basudara yang iko Yesus di kota Tesalonika. 28 Katong minta biar Tuhan Yesus Kristus yang katong somba, kasi berkat basar par kamong samua.
Hormat, Paulus