Cara hidop yang pantas par orang-orang parcaya
4:1-12
4
1 Basudara samua yang iko Yesus, katong su kasi balajar kamong soal bagemana kamong musti hidop biar Allah pung hati sanang. Memang kamong ada biking akang dalang kamong pung hidop hari-hari. Katong samua su satu hati deng Tuhan Yesus, jadi katong minta paskali biar kamong labe sunggu-sunggu lai biking akang dalang kamong pung hidop. 2 Barang, kamong su tau kalo apa yang katong ajar par kamong tu pake Tuhan Yesus pung kuasa.3 Allah mau kamong musti jaga kamong pung hidop bae-bae biar kamong barsi dari dosa. Jadi, kamong seng bole tidor deng orang yang bukang kamong pung laki ka kamong pung bini. 4 Jang kasi biar kamong pung napsu tu ator kamong pung diri, mar hidop barsi dari dosa, sampe orang-orang taru hormat par kamong. 5 Jang hidop iko napsu yang kurang-kurang ajar, macang deng orang yang seng kanal Allah biasa biking. 6 Jang biking dosa par kamong pung basudara laeng yang parcaya Allah deng cara maeng serong deng dia pung laki ka dia pung bini. Barang, Tuhan Yesus nanti hukum orang-orang yang biking macang bagitu. Katong su kasi inga soal samua ni par kamong dari dolo lai. 7 Barang, Allah pili katong samua bukang par tidor deng orang yang bukang katong pung laki ka katong pung bini, mar par hidop barsi dari dosa. 8 Jadi, sapa sa yang seng iko apa yang katong ada bilang ni, dia bukang cuma seng tarima katong sa, mar jua seng tarima Allah yang su kasi Antua pung Roh par kamong lai.
9 Basudara yang iko Yesus, katong seng parlu tulis soal kamong musti baku sayang satu deng laeng. Barang, Allah sandiri su kasi balajar kamong soal itu. 10 Memang, kamong su sayang samua basudara yang iko Yesus di propinsi Makedonia. Mar basudara e, katong minta paskali biar kamong labe hari labe tamba baku sayang. 11 Kamong musti usaha par hidop dame deng samua orang. Jang suka iko campor orang pung urusang. Kamong jua musti karja karas par kamong pung hidop hari-hari. Samua ni katong su bilang akang par kamong. 12 Kamong musti hidop macang bagitu, biar kamong seng bagantong par orang laeng, deng biar orang-orang yang seng parcaya Yesus nanti taru hormat par kamong lai.
Tuhan Yesus nanti bale kombali
4:13-18
13 Basudara samua yang iko Yesus, katong mau kamong batul-batul tau soal orang-orang yang parcaya Yesus yang su mati. Barang, katong seng mau kamong pung hati susa soal dong yang su mati. Jang hati susa macang deng orang-orang yang seng parcaya kalo Allah nanti kasi hidop orang mati kombali. 14 Katong samua parcaya kalo Yesus su mati la su hidop kombali. Jadi, katong samua jua parcaya kalo nanti waktu Yesus bale kombali, Allah pasti kasi hidop samua orang yang parcaya Yesus yang su mati la angka dong tinggal deng Yesus.
15 Katong mau kasi tau par kamong apa yang Tuhan Yesus sandiri su bilang. Antua bilang kalo nanti waktu Antua bale kombali, katong samua yang masi hidop di dunya ni nanti nai sama-sama deng Antua. Mar orang-orang parcaya yang su mati nanti nai kamuka katong.* 16 Barang, waktu Tuhan Yesus turung dari sorga, Antua kasi parenta deng suara basar, malekat pung pamimping tabaos, deng Allah pung trompet babunyi, baru Kristus pung orang-orang yang su mati hidop kombali. 17 Abis itu, katong yang masi hidop yang parcaya Yesus ni, katong nanti dapa angka ka awang sama-sama deng dong yang baru hidop kombali tu par baku dapa deng Tuhan Yesus di langit. La katong samua nanti tinggal sama-sama deng Antua tarus-tarus. 18 Tagal itu, kamong musti laeng kasi kuat laeng pung hati pake kata-kata ni biar kamong pung hati seng susa.