Paulus deng Silas suru Timotius pi ka Tesalonika
3:1-5
3
1 Basudara e! Beta, Silas, deng Timotius su rindu paskali par mau baku dapa deng kamong, mar seng bisa. Tagal katong seng bisa tahang lai, jadi katong pikir labe bae beta deng Silas tinggal di kota Atena,* 2 la katong dua suru Timotius pi ka kota Tesalonika. Dia tu katong pung sudara yang iko Yesus, yang karja par Allah sama-sama deng katong par kasi tau Kabar Bae soal Yesus Kristus. Katong suru dia pi par kamong biar dia bisa biking kuat kamong pung hati deng biking kamong labe tamba parcaya Yesus. 3 Katong biking bagitu biar seng ada satu orang lai dari kamong yang tagoyang dari kamong pung parcaya par Yesus tagal susa deng sangsara yang katong orang parcaya dapa sakarang ni. Kamong sandiri su tau kalo katong samua yang parcaya Yesus pasti sangsara. 4 Dolo, waktu katong masi ada sama-sama deng kamong, katong su bilang ulang-ulang kali kalo katong samua yang parcaya Yesus nanti sangsara. Sakarang akang su jadi, la kamong sandiri su rasa akang. 5 Tagal itu, waktu beta seng kuat tahang lai, beta suru Timotius par pi lia kamong di Tesalonika. Beta biking bagitu tagal beta mau tau kalo kamong masi parcaya Yesus ka seng. Barang, beta taku jang sampe Setang pung Raja su coba-coba kamong la kamong bale balakang dari Yesus. Kalo su bagitu, samua yang katong su biking par kamong tu, akang parcuma sa.Timotius datang bawa barita soal jamaat Tesalonika
3:6-10
6 Sakarang ni, Timotius su bale dari kota Tesalonika. Dia bawa barita yang biking katong pung hati paleng sanang. Dia bilang kata kamong masi tetap parcaya Yesus deng baku sayang. Dia jua bilang kalo kamong inga tarus apa yang bae soal katong deng mau paskali par baku dapa deng katong, macang deng katong jua mau baku dapa deng kamong.*
7 Jadi basudara yang iko Yesus e, biar kata katong di sini ada susa deng sangsara paskali, mar waktu katong dengar kalo kamong parcaya Yesus tarus, katong pung hati kuat. 8 Jadi sakarang ni, asal kamong tetap pegang kamong pung parcaya kuat-kuat par Tuhan Yesus sa, katong pung hati su tenang. 9 Jadi katong minta dangke banya-banya par Allah, barang katong pung hati paleng sanang tagal kamong parcaya Yesus tarus. 10 Katong sombayang sunggu-sunggu siang-malang biar katong bisa baku dapa lai deng kamong. Deng bagitu, katong bisa kasi balajar kamong labe banya lai biar kamong labe sunggu-sunggu parcaya Yesus.
Paulus dong sombayang par jamaat Tesalonika
3:11-13
11 Katong minta dari katong pung Allah Bapa deng Tuhan Yesus yang katong somba buka jalang par katong, biar katong bisa pi baku dapa deng kamong lai. 12 Katong minta Tuhan Yesus tolong kamong biar kamong labe baku sayang deng tamba sayang samua orang macang deng katong sayang kamong. 13 Katong minta macang bagitu biar kamong pung hati kuat la kamong pung hidop barsi dari dosa. La kalo kamong pung hidop barsi dari dosa, waktu Tuhan Yesus yang katong somba bale kombali sama-sama deng malekat-malekat deng Antua pung orang-orang samua, seng ada satu lai yang bisa kasi sala kamong di muka Allah Bapa yang katong somba.