Paulus pung Surat Partama par
Timotius
Kata-Kata Partama
Sapa yang tulis surat ni: Orang yang tulis surat 1 Timotius ni Paulus. Dia utus dia pung tamang karja Timotius par pi ka jamaat di Efesus par kasi balajar dong deng par pimping jamaat tu (1:3). Paulus tulis dia pung parenta par Timotius dalang surat ni. Lia jua Kata-kata Partama surat Efesus.
Surat ni par sapa: Paulus tulis surat ni par Timotius. Dia tu ana muda satu yang parcaya Yesus, yang asal dari kota Listra. Dia pung bapa orang Yunani deng dia pung mama orang Yahudi. Paulus anggap Timotius ni sama deng dia pung ana sandiri. Paulus pili dia par bantu Paulus pung karja par Yesus Kristus (Utusang pung Carita 16:1-5).
Mangapa Paulus tulis surat ni: Waktu Paulus tulis surat ni, Timotius ada di kota Efesus, mar Paulus sandiri ada di propinsi Makedonia. Paulus rencana par pi lia Timotius di Efesus, mar dia rasa mangkali sadiki lama baru dia bisa datang. Jadi dia tulis surat ni par kasi nasehat Timotius (3:14-15). Paulus kasi tau hal-hal panting par Timotius dalang surat ni. Dia minta Timotius deng jamaat samua musti ati-ati deng jaga diri bae-bae dari ajarang-ajarang yang seng batul (1:3-4, 4:1-5, 6:20-21). Dia kasi nasehat Timotius soal Timotius pung hidop deng soal dia pung karja par Tuhan (1:18-19, 6:11-16). Dia jua kasi tau Timotius soal atorang-atorang par pili penatua ka diaken deng soal dong pung tugas dalang jamaat (3:1-13, 5:17-21).
Surat ni tabage par babarapa bagiang:
| 1:1-2 | Tabea |
| 1:3-20 | Soal ajarang yang seng batul di Efesus |
| 2:1-15 | Nasehat soal ibada |
| 3:1-16 | Atorang-atorang par jadi penatua deng diaken |
| 4:1-16 | Nasehat par Timotius |
| 5:1—6:10 | Nasehat-nasehat soal laki-laki, parampuang, janda, penatua, deng babarapa nasehat yang laeng |
| 6:11-16 | Paulus kasi samangat Timotius |
| 6:17-21 | Paulus kasi nasehat-nasehat yang laste deng tutu dia pung surat |