Paulus pung Surat Partama par
Timotius
Tabea
1:1-2
1
1-2 Par Timotius, orang yang beta anggap macang deng beta pung ana sandiri, tagal ale iko beta parcaya Yesus Kristus.Tabea! Beta ni Paulus, Yesus Kristus pung utusang. Allah yang Kasi Salamat Katong Manusia deng Yesus Kristus yang katong harap tu su angka beta jadi utusang.
Beta minta biar Allah Bapa deng Yesus Kristus, Tuhan yang katong somba, kasi unju Antua pung hati bae deng kasi berkat basar deng dame par ale.*
Jaga diri bae-bae dari ajarang-ajarang yang seng batul
1:3-11
3 Timotius e, beta mau ale tinggal tarus di kota Efesus macang yang beta parna minta deng sunggu-sunggu dari ale waktu beta mau pi ka propinsi Makedonia. Beta minta ale tinggal tarus biar ale tagor babarapa orang yang kasi balajar ajarang-ajarang yang seng batul, biar dong jang biking bagitu. 4 Suru dong barenti deng dong pung carita-carita dolo-dolo deng silsila dolo-dolo yang seng abis-abis tu.a Samua tu bisa biking orang-orang baku malawang deng seng tolong orang-orang yang karja par Allah. Dong cuma bisa karja par Antua kalo dong parcaya Antua.
5 Beta pung nasehat tu, akang pung maksud biar orang-orang baku sayang. Orang-orang bisa baku sayang kalo dong hidop deng hati yang seng bardosa, biking apa yang dong tau tu batul, deng sunggu-sunggu parcaya Tuhan. 6 Mar ada babarapa orang yang su seng hidop macang bagitu lai. Dong labe suka bicara apapa yang seng ada pung guna. 7 Dong mau jadi guru Torat, mar waktu kasi balajar orang-orang, dong sandiri seng mangarti apa yang dong bilang, biar kata dong pikir apa yang dong bilang tu, akang batul.
8 Katong tau kalo Tuhan pung Kitab Torat yang Musa su tulis tu, akang bae par katong kalo katong pake akang iko Tuhan pung mau. 9 Apa yang beta bilang ni, akang pung maksud kalo Tuhan kasi Torat tu bukang par orang-orang yang pung hidop batul. Mar Antua kasi akang par orang-orang yang suka malawang Antua pung hukum, orang-orang yang hidop jau dari Antua, deng orang-orang yang suka biking dosa. Antua kasi akang par orang-orang yang hidop iko dunya pung mau deng orang-orang yang seng taru hormat par Allah, orang-orang yang bunu orang, deng orang-orang yang bunu dia pung mama ka dia pung bapa. 10 Torat tu par orang-orang yang suka tidor deng orang yang bukang dia pung laki ka bini, deng par parampuang yang suka parampuang ka par laki-laki yang suka laki-laki. Torat tu par orang-orang yang pancuri orang la jual dong par jadi jongos, orang-orang yang tukang parlente, orang-orang yang jadi saksi parlente-parlente, deng orang-orang yang biking hal-hal laeng yang malawang Tuhan pung ajarang yang batul. 11 Ajarang tu ada di dalang Kabar Bae dari Allah. Antua tu Allah yang paleng hebat deng yang musti dapa puji. Antua su parcaya beta par pi kasi tau ajarang tu par orang-orang.
Paulus minta dangke dari Yesus Kristus
1:12-17
12 Beta minta dangke banya dari Yesus Kristus, Tuhan yang katong somba, yang kasi kuat beta. Barang, Antua su anggap beta bisa dapa parcaya par biking Antua pung karja la su pili beta par biking akang. 13 Dolo-dolo beta hojat Antua. Beta jua siksa deng biking jahat par orang-orang yang parcaya Antua. Mar Tuhan Yesus kasi unju Antua pung hati bae par beta sampe Antua seng hukum beta, tagal waktu itu beta balong parcaya Antua deng seng tau kalo apa yang beta biking tu sala. 14 Mala Tuhan Yesus yang katong somba tu su kasi berkat basar batambong-tambong par beta. Yesus Kristus yang biking sampe beta bisa parcaya Antua deng sayang orang laeng tagal beta su hidop satu hati deng Antua.
15 Kata-kata yang katong dengar kalo Yesus Kristus datang ka dunya par kasi salamat orang-orang bardosa, itu memang batul. Jadi, sapa sa musti parcaya akang. La beta mau bilang kalo dari samua orang yang bardosa tu, beta ni orang yang paleng bardosa. 16 Mar Yesus Kristus kasi unju Antua pung hati bae par beta biar orang-orang bisa lia kalo Antua paleng sabar deng beta, orang yang paleng bardosa ni. Akang jadi conto par samua orang yang nanti mau parcaya Antua la hidop tarus-tarus deng Antua.
17 Mari katong samua taru hormat deng puji-puji Allah tarus-tarus.
Antua tu, Raja yang pung kuasa dari dolo sampe tarus-tarus.
Antua hidop tarus-tarus, seng parna mati.
Seng ada orang yang bisa lia Antua.
Antua tu Allah, seng ada yang laeng. Amin.
Paulus kasi tugas par Timotius
1:18-20
18 Timotius, beta pung ana e! Tugas yang beta kasi par ale tu, akang iko pasáng yang Allah pung Roh parna kasi par orang-orang di jamaat soal ale. Beta mau kasi inga ale soal pasáng tu biar ale lawang orang-orang yang kasi balajar ajarang yang seng batul tu deng sunggu-sunggu, macang deng tantara lawang dia pung musu. 19 Ale musti parcaya Yesus Kristus tarus deng biking apa yang ale tau tu batul. Ada orang-orang yang su bale balakang dari apa yang dong tau tu batul sampe dong seng parcaya Yesus Kristus lai, 20 macang Himeneus deng Aleksander. Beta su kasi pisa dong dua dari basudara yang parcaya Yesus, macang beta kasi dong par Setang pung Raja.* Beta biking bagitu biar dong dua tu tobat la jang bicara yang tar batul-batul soal Allah lai.