Jamaat pung sombayang
2:1-7
2
1 Timotius, hal yang paleng panting yang beta mau minta deng sunggu-sunggu dari kamong di Efesus tu, kamong musti angka hati, sombayang minta Tuhan tolong kamong deng samua orang, deng minta dangke banya-banya par samua yang Antua su biking. 2 Beta minta kamong sombayang jua par raja-raja deng pamimping-pamimping biar katong samua hidop tenang, dame, iko Tuhan pung mau, deng pung kalakuang bae sampe orang taru hormat par katong. 3 Sombayang macang bagitu tu bae par katong deng biking Allah yang Kasi Salamat Katong Manusia tu pung hati sanang. 4 Antua mau samua orang salamat deng tau soal Antua pung ajarang yang batul. 5 Allah tu cuma satu deng cuma ada satu orang yang jadi jambatang par Allah deng manusia. Orang itu tu Yesus Kristus, yang batul-batul jadi manusia. 6 Antua su kasi Antua pung diri par mati di kayo salib par tabus samua orang dari dong pung dosa-dosa. Deng cara bagitu, di waktu yang Allah su ator, Antua kasi unju bukti par orang-orang kalo Antua mau kasi salamat samua orang. 7 La Antua angka beta par jadi Antua pung utusang, par pi kasi tau Antua pung ajarang yang batul deng kasi balajar akang par orang-orang yang bukang Yahudi biar dong parcaya.* Apa yang beta bilang ni batul. Beta seng karang-karang.Nasehat par laki-laki deng parampuang
2:8-15
8 Timotius e, beta minta samua laki-laki yang ada di mana sa, kalo dong sombayang, dong musti sombayang deng hati yang barsi, jang simpang mara, deng jang bakalai deng orang laeng.
9 Bagitu lai deng parampuang-parampuang. Dong musti bapake bae-bae, pantas, deng biasa-biasa sa. Jang biking rambu deng sagala macang model. Jang talalu bastel deng mas, mutiara, ka pakiang yang mahal-mahal.* 10 Mala parampuang-parampuang tu musti biking apa sa yang bae, tagal itu tu pantas par parampuang-parampuang yang bilang kalo dong tu somba Allah. 11 Kalo ada orang yang kasi balajar ajarang soal Allah, parampuang-parampuang tu musti tado. Dong musti taru hormat deng dengar-dengarang par orang yang kasi balajar tu. 12 Beta larang parampuang-parampuang kasi balajar deng parenta laki-laki. Parampuang-parampuang tu musti tado. 13 Barang, Allah biking Adam kamuka baru Antua biking Hawa.* 14 Adam seng dapa tipu, mar Hawa yang dapa tipu dari Setang pung Raja sampe seng iko Allah pung parenta.* 15 Biar kata bagitu, Allah nanti kasi salamat parampuang-parampuang tagal dong kasi lahir ana.a Antua kasi salamat dong asal dong tarus parcaya Antua, sayang orang laeng, seng biking dosa, deng bawa diri bae-bae.