Atorang-atorang par jadi penatua
3:1-7
3
1 Ada kata-kata yang bilang bagini, “Sapa yang batul-batul mau jadi penatua, tugas yang dia mau tu paleng bae paskali.” Kata-kata tu memang batul. 2 Jadi, sapa yang mau jadi penatua, dia musti pung hidop batul biar orang seng bisa bilang kalo dia ada biking apapa yang sala. Dia musti pung bini satu sa deng seng maeng serong. Dia musti pung pikirang tajang sampe tau bawa diri, pung kalakuang bae sampe orang taru hormat par dia, suka tarima sapa sa manumpang di dia pung ruma, deng pintar kasi balajar orang. 3 Dia jua bukang pamabo deng pung tangang seng haringang par pukul orang. Mar dia musti pung hati bae deng orang, suka hidop dame deng sapa sa, deng seng mata kepeng. 4 Dia musti tau ator dia pung ruma tangga deng tau ajar dia pung anana, biar dong taru hormat deng dengar-dengarang dia. 5 Barang, sapa yang seng tau ator dia pung ruma tangga sandiri, bagemana kong dia bisa ator Allah pung jamaat? 6 Jang angka orang yang baru parcaya Yesus par jadi penatua, tagal dia nanti bisa sombong la Tuhan hukum dia macang deng Antua hukum Setang pung Raja. 7 Dia musti hidop manis-manis biar orang-orang yang balong parcaya Yesus jua taru hormat par dia. Kalo seng, orang-orang nanti bicara yang tarbae-tarbae soal dia la Setang pung Raja buju dia par biking dosa.*Atorang-atorang par jadi diaken
3:8-13
8 Timotius, waktu mau angka orang-orang par jadi diaken, akang pung atorang-atorang sama lai deng atorang-atorang par jadi penatua. Atorang-atorang tu bagini: Dia musti pung kalakuang bae sampe orang-orang taru hormat par dia. Dia seng suka bicara parlente-parlente. Dia bukang pamabo deng seng cari kepeng deng cara yang seng batul. 9 Dia musti tetap parcaya ajarang soal Yesus yang Allah su buka par katong, deng biking apa yang dia tau tu batul. 10 Kamong musti lia bae-bae kata orang-orang yang mau jadi diaken tu pung hidop batul ka seng. Kalo dong pung hidop batul, baru kamong angka dong par jadi diaken.
11 Bagitu lai deng dong pung bini-bini.a Bini-bini tu musti pung kalakuang bae sampe orang-orang taru hormat par dong. Dong musti seng suka carita orang pung busu, musti tau bawa diri, deng bisa dapa parcaya dalang hal apa sa.
12 Diaken tu musti pung bini satu sa, seng maeng serong, deng tau ator dia pung ruma tangga bae-bae. 13 Diaken yang biking dia pung karja bae-bae, orang-orang nanti taru hormat par dia deng dia jua labe barani bicara par orang-orang soal bagemana dia parcaya Yesus Kristus.
Dasar dari katong pung parcaya
3:14-16
14-15 Timotius e, beta harap seng lama lai beta bisa pi mangente ale. Mar beta taku kalo sadiki lama lai baru beta datang. Jadi, beta tulis nasehat-nasehat ni par ale, biar ale tau soal bagemana orang-orang parcaya musti hidop dalang Allah pung kaluarga. Katong orang-orang parcaya ni Allah yang hidop pung jamaat. Katong musti pegang kuat-kuat Allah pung ajarang yang batul deng jaga ajarang tu biar orang seng bisa roba akang. 16 Memang batul, ajarang soal Yesus tu bagus paskali, seng ada lawang. Ajarang tu bisa bawa orang par hidop iko Allah pung mau. Ajarang tu dolo katong seng tau akang, mar sakarang Allah su kasi tau akang par katong. Ajarang tu bilang,
“Yesus Kristusb datang ka dunya jadi manusia.
Tuhan pung Roh su kasi unju kalo Yesus tu batul-batul Allah pung Ana.
Malekat-malekat su lia Antua.
Orang-orang su kasi tau kabar soal Antua par bangsa-bangsa di dunya.
La orang-orang di dunya parcaya Antua.
Antua tarangka ka sorga la Allah pung sinar paleng tarang manyala koliling Antua.”