Jaga diri bae-bae dari ajarang-ajarang yang seng batul
4:1-5
4
1 Timotius, Tuhan pung Roh bilang tarang-tarang kalo nanti waktu Yesus mau bale kombali, ada orang-orang yang su seng parcaya Tuhan Yesus lai la iko orang-orang yang ajar setang-setang pung ajarang yang seng batul. 2 Orang-orang yang ajar tu pung mulu parlente putar bale. Dong su seng tau apa yang sala deng apa yang batul lai. 3 Dong larang orang-orang jang kaweng deng bilang kalo ada makanang yang orang seng bole makang. Padahal Allah biking samua makanang biar orang-orang yang parcaya Yesus deng yang su tau soal Antua pung ajarang yang batul tu tarima akang deng minta dangke dari Antua. 4 Barang samua yang Antua biking tu bae.* Seng ada yang haram asal katong tarima makanang tu deng minta dangke do baru makang. 5 Samua makanang tu bae tagal Allah pung ajarang su bilang kalo apa yang Antua biking tu bae. Akang jua bae tagal katong sombayang do baru makang.Yesus Kristus pung orang karja yang bae
4:6-16
6 Timotius e, kasi balajar samua yang beta su tulis ni par basudara yang iko Yesus. Kalo ale biking akang, ale nanti jadi Yesus Kristus pung orang karja yang bae. Ale jua nanti labe hari labe tamba kuat tagal ale tetap parcaya Allah pung kata-kata deng ajarang yang batul yang ale su iko akang. 7 Mar jang pastiu deng carita-carita dolo-dolo deng carita-carita yang seng maso-maso akal yang cuma biking orang seng parcaya Allah.* Labe bae lati ale pung diri biar ale iko Allah pung mau tarus, macang deng orang yang rajing lari pagi biar dia pung badang kuat. 8 Kalo katong rajing lati katong pung badang, akang bagus par katong pung badang, mar akang pung guna cuma waktu katong ada di dunya ni sa. Mar kalo katong rajing lati katong pung diri par iko Allah pung mau, akang pung guna banya par katong. Barang, Allah su janji kalo akang pung guna bukang cuma di dunya ni sa, mar tarus-tarus sampe di sorga lai.
9 Apa yang beta bilang ni batul. Jadi, sapa sa musti tarima deng parcaya akang bae-bae. 10 Tagal itu, katong musti karja karas deng usaha sunggu-sunggu par biking akang. Barang, katong taru harap par Allah yang hidop, yang pung kuasa par kasi salamat samua manusia. Antua tu yang kasi salamat orang-orang yang parcaya Yesus Kristus.
11 Timotius, kasi balajar samua ni par jamaat deng suru dong musti biking akang. 12 Jang kasi biar satu orang lai anggap enteng ale tagal ale masi muda. Mar ale musti jadi conto yang bae par orang-orang parcaya. Jadi conto par dong dari ale pung bicara, ale pung kalakuang, ale pung rasa sayang par orang laeng, ale pung parcaya, deng ale pung hidop yang seng biking dosa. 13 La waktu tunggu beta datang, ale musti rajing baca Allah pung Tulisang di muka orang-orang parcaya. Ale jua musti kasi balajar akang deng kasi samangat dong soal samua ni. 14 Ale musti rajing biking ale pung karja. Tuhan pung Roh su kasi Antua pung kuasa biar ale bisa biking akang. Kuasa tu, ale tarima akang waktu pamimping-pamimping jamaat taru tangang di atas ale la kasi tau pasáng yang dong dapa dari Tuhan par ale.
15 Timotius, ale musti sunggu-sunggu biking samua ni biar jelas par samua orang kalo ale su labe tamba pintar biking ale pung karja. 16 Jaga diri bae-bae. La waktu ale kasi balajar orang-orang, jaga biar ale pung ajarang soal Allah tu batul. Ale musti biking samua yang beta su bilang ni tarus. Barang, kalo ale biking samua ni tarus, Allah nanti kasi salamat ale deng samua orang yang dengar ale pung ajarang.