Nasehat par jongos-jongos
6:1-2a
6
1 Timotius, jongos-jongos yang parcaya Tuhan Yesus musti taru hormat par dia pung bos biar orang-orang seng biking busu Allah pung nama deng katong pung ajarang. 2a Jongos yang pung bos orang parcaya, dia seng bole anggap enteng dia pung bos tu, tagal dong sama-sama basudara yang iko Yesus. Mala dia musti karja par dia pung bos labe bae lai, tagal dia deng dia pung bos tu sama-sama parcaya Tuhan deng dia jua sayang dia pung bos.Ajarang yang seng batul deng orang yang mata kepeng
6:2b-10
2b Timotius, samua yang beta ada tulis par ale ni, ale musti kasi balajar akang par orang-orang parcaya. Ale jua musti minta deng sunggu-sunggu dari dong par iko akang. 3 Ada orang-orang yang kasi balajar ajarang yang laeng dari ajarang yang beta su ajar. Dong pung ajarang tu seng sama deng ajarang yang batul dari Yesus Kristus, Tuhan yang katong somba. Dong pung ajarang tu jua seng ajar orang par iko Allah pung mau. 4 Dong tu sombong deng tar mangarti apapa. Dong pung panyaki tu cuma par cari masala deng baku malawang soal kata-kata pung arti sampe biking orang-orang jadi culas, baku tatoki, laeng hojat laeng, laeng curiga laeng, 5 deng baku musu seng abis-abis. Barang, dong su seng bisa pikir apapa yang bae lai deng seng iko ajarang yang batul soal Yesus Kristus. Dong kira kalo dong rajing ibada, dong bisa kaya ka dapa kepeng banya.
6 Memang katong baruntung paskali kalo katong hidop iko Allah pung mau deng kalo katong rasa puas deng apa yang Antua kasi. 7 Barang waktu katong lahir, katong seng bawa apapa ka dunya ni. Bagitu lai waktu katong mati, katong jua seng bawa apapa. 8 Jadi, kalo su ada makanang deng pakiang, itu su cukup par katong. 9 Mar orang-orang yang mau kaya, dong gampang paskali tagoda deng seng bisa talapas dari dong pung napsu yang seng ada pung guna deng yang biking dong susa. Napsu tu biking dong pung hidop cilaka deng ancor. Dong macang deng ikang saekor yang galojo umpang la tagae di mata kael. 10 Jadi, orang yang mata kepeng nanti bisa biking kajahatang apa sa par dapa akang. Ada orang-orang yang tagal mata kepeng sampe su seng parcaya Tuhan Yesus lai la dong sandiri yang biking dong pung hidop susa paskali.
Pegang kuat-kuat ajarang yang batul
6:11-21
11 Mar Timotius e, ale tu Allah pung orang, jadi ale musti jau-jau dari samua yang jahat tu. Ale musti usaha biking apa yang batul, iko Allah pung mau, parcaya Antua tarus, baku sayang deng orang laeng, tahang hati deng parcaya Tuhan Yesus tarus, deng hidop manis-manis deng sapa sa. 12 Ale musti usaha sunggu-sunggu parcaya Allah deng iko Antua pung mau tarus, biar ale bisa hidop tarus-tarus deng Antua. Akang macang deng orang yang manggurebe lari waktu iko lomba biar manang. Barang, Allah su pili ale par hidop tarus-tarus deng Antua, deng ale su mangaku di muka orang banya kalo ale parcaya Yesus Kristus.
13 Timotius e! Allah yang su kasi hidop par samua yang ada di dunya ni, deng jua Yesus Kristus yang su bicara batul-batul soal Antua pung diri di muka Pontius Pilatus,* jadi saksi par apa yang beta mau bilang ni. Beta minta ale 14 musti sunggu-sunggu iko samua parenta ni biar orang seng bisa kasi sala ale. Ale musti sunggu-sunggu iko akang sampe waktu Yesus Kristus, Tuhan yang katong somba, bale kombali. 15 Apa tempo Antua bale kombali ka dunya ni, Allah yang ator akang. Cuma Allah sa yang pegang kuasa par dunya. Orang-orang puji-puji Antua. Antua tu Raja dari sagala raja deng Tuhan dari sagala tuhan. 16 Cuma Antua sa yang hidop tarus-tarus deng seng parna mati. Antua tinggal di dalang tarang yang orang seng bisa dekat akang. Seng ada orang yang parna lia Antua, tagal seng ada yang bisa lia Antua. Mari katong taru hormat par Antua. Antua yang pung kuasa tarus-tarus. Amin.
17 Timotius, beta minta ale kasi nasehat orang-orang yang kaya deng harta dunya biar dong jang sombong deng jang taru harap par apa yang bisa ilang, macang harta. Mar dong musti taru harap par Allah yang pung samua-samua, yang kasi apa sa batambong-tambong par katong biar katong sanang. 18 Bilang dong musti biking apa yang bae tarus par orang, suka kasi apa sa yang orang parlu, deng jua bage apa sa par tolong orang. 19 Kalo dong biking bagitu, akang sama deng dong ada kumpul harta yang paleng bagus par jadi dasar yang kuat waktu dong nanti hidop tarus-tarus deng Allah. Hidop tarus-tarus deng Allah tu, hidop yang paleng bae paskali.
20 Timotius, ajarang yang Allah su kasi par ale tu, jaga akang bae-bae la kasi tau akang par orang-orang. Ale jang iko campor deng orang yang bicara apapa yang seng ada pung guna deng yang biking orang seng taru hormat par Allah. Ale jua jang pastiu deng orang-orang yang malawang ajarang-ajarang yang batul soal Allah. Orang-orang yang malawang tu, dong bilang dong pung ajarang tu batul, sapa tau seng. 21 Ada orang-orang yang su iko ajarang tu sampe dong seng parcaya Tuhan Yesus lai.
Timotius, beta minta biar Tuhan kasi berkat basar par kamong samua.
Hormat, Paulus