Paulus minta jamaat Tesalonika sombayang par Paulus dong
3:1-5
3
1 Basudara samua yang iko Yesus e, beta, Silas, deng Timotius minta kamong sombayang tarus par katong jua. Sombayang biar orang banya bisa capat dengar Kabar Bae soal Tuhan Yesus, deng biar dong bisa parcaya deng iko Kabar Bae tu macang deng kamong. 2 Sombayang jua biar Tuhan jaga katong dari orang-orang jahat deng orang-orang tukang biking kaco. Barang, seng samua orang yang dengar Tuhan pung Kabar Bae tu parcaya akang.3 Mar Tuhan seng parna kasi tinggal Antua pung orang-orang. Antua nanti biking kuat kamong pung hati deng jaga kamong dari Setang pung Raja. 4 Katong batul-batul parcaya kalo Tuhan ada tolong kamong biking apa yang katong suru kamong biking. Katong jua parcaya kalo Tuhan nanti tolong kamong par biking akang tarus. 5 Katong minta biar Tuhan tolong kamong biar kamong tau kalo Allah paleng sayang kamong, deng biar kamong kuat tarus deng sabar waktu kamong sangsara, sama deng Kristus waktu Antua sangsara.
Nasehat soal orang parcaya yang pamalas karja
3:6-15
6 Basudara yang iko Yesus e, deng Tuhan Yesus Kristus pung kuasa, katong parenta kamong jang batamang deng orang parcaya yang pamalas karja. Dong tu seng iko apa yang katong su ajar par kamong. 7 Katong bilang bagini tagal kamong sandiri tau kalo kamong musti hidop iko apa yang katong su biking. Waktu katong masi ada sama-sama deng kamong, katong bukang orang yang pamalas karja. 8 Kalo katong makang, katong bayar. Katong seng parna makang frei. Mala siang-malang, katong karja banting tulang biar katong seng biking susa satu orang lai dari kamong. 9 Katong karja banting tulang bagitu, bukang tagal katong seng ada pung hak par minta tolong dari kamong, mar tagal katong mau jadi conto par kamong. 10 Barang, waktu katong ada sama-sama deng kamong, katong su ulang-ulang kali parenta kamong kata, “Sapa sa yang seng mau karja, jang kasi makang dia!”
11 Katong bilang bagitu, tagal katong dengar kalo ada dari kamong yang pamalas karja. Dong seng mau karja apapa, mar labe suka bacampor deng orang laeng pung urusang. 12 Orang-orang yang macang bagitu tu, katong parenta deng kasi nasehat dong deng kuasa yang Tuhan Yesus Kristus kasi par katong biar dong ator dong pung hidop bae-bae. Dong musti karja biar dong bisa makang.
13 Mar basudara yang iko Yesus, jang pastiu-pastiu par biking apa yang bae. 14 Kalo ada orang yang seng iko apa yang katong bilang dalang surat ni, taru kira dia bae-bae la jang batamang deng dia, biar dia malu. 15 Mar jang lia dia macang deng kamong pung musu. Kamong musti kasi nasehat dia macang deng kamong pung sudara sandiri.
Paulus tutu dia pung surat
3:16-18
16 Katong minta dari Tuhan yang kasi dame par katong samua, biar Antua salalu kasi dame par kamong dalang sagala hal yang jadi dalang kamong pung hidop. Katong minta biar Antua ada tarus deng kamong samua.
17 Salam dari beta, Paulus. Beta sandiri yang tulis salam ni.a Beta pake cara ni par tutu beta pung samua surat. Beta biking bagitu biar kamong tau kalo surat ni batul-batul dari beta.
18 Katong minta biar Yesus Kristus, Tuhan yang katong somba, kasi berkat basar par kamong samua.
Hormat, Paulus