Orang jahat yang malawang Allah
2:1-12
2
1 Basudara yang iko Yesus e! Tuhan Yesus Kristus yang katong somba tu nanti bale kombali la kumpul katong samua par baku dapa deng Antua. Jadi, katong tiga minta dari kamong samua,* 2 jang capat babingong ka balisa waktu dengar orang-orang bilang kalo Tuhan Yesus su bale kombali. Kamong jang parcaya orang-orang tu, biar kata dong bilang kalo dong tau akang dari Tuhan pung Roh, ka dari apa yang katong su kasi tau, ka dari surat yang katong su tulis lai. 3 Jang kasi biar orang biking bodo kamong deng cara apa sa. Barang, nanti ada banya orang yang malawang Allah deng ada satu orang yang paleng jahat paskali yang kasi unju dia pung diri do, baru Tuhan Yesus bale kombali. Orang jahat tu nanti maso naraka. 4 Dia nanti malawang Allah deng angka diri labe tinggi dari apa sa yang manusia somba ka panggel par allah. Jadi, dia nanti dudu di orang Yahudi pung Tampa Sombayang Pusat la mangaku par samua orang kata, “Beta ni, Allah!”*5 Waktu beta masi ada deng kamong di kota Tesalonika, beta biasa kasi tau soal samua ni par kamong to? Kamong masi inga akang ka seng? 6 Kamong tau kalo sakarang ada yang tahang orang jahat tu. Kamong jua tau sapa yang tahang dia. Dia dapa tahang biar nanti Allah kasi biar dia unju dia pung diri sandiri pas di waktu yang Antua su ator. 7 Barang, sakarang ni Setang pung Raja su mulai karja sambunyi-sambunyi par biking orang malawang Tuhan, mar masi ada yang tahang orang jahat tu. Nanti kalo yang tahang dia tu su seng tahang dia lai, 8 baru Allah kasi biar dia unju dia pung diri sandiri. Mar waktu Tuhan Yesus bale kombali deng Antua pung kuasa basar, Antua nanti kasi kala orang jahat tu sampe dia su seng pung kuasa lai deng kasi ancor dia cuma deng bicara sa.*
9 Waktu Tuhan Yesus balong bale kombali, orang jahat tu muncul. Dia pake Setang pung Raja pung kuasa la biking sagala macang tanda herang sampe orang-orang dapa parlente la kira kalo dia ada pake Allah pung kuasa.* 10 Dia nanti parlente orang-orang deng sagala macang hal yang jahat. Dong yang dapa parlente tu nanti maso naraka, tagal dong seng mau buka dong pung hati par tarima ajarang yang batul soal Yesus Kristus. Jadi, Allah nanti seng kasi salamat dong. 11 Tagal dong seng mau tarima ajarang yang batul tu, Allah nanti kasi biar dong parcaya orang jahat tu deng dia pung ajarang yang seng batul. 12 Allah biking bagitu biar Antua nanti hukum samua orang yang seng parcaya ajarang yang batul soal Yesus Kristus deng yang suka biking kajahatang.
Allah pili jamaat Tesalonika par kasi salamat dong
2:13-17
13 Basudara yang Tuhan sayang, katong musti minta dangke tarus dari Allah tagal kamong. Barang, dari waktu Allah balong biking dunya ni lai, Antua su pili kamong par kasi salamat kamong. Antua kasi salamat kamong waktu Antua pung Roh biking kamong jadi Antua pung orang-orang yang seng bardosa deng waktu kamong parcaya ajarang yang batul soal Yesus Kristus. 14 Tagal Allah mau kasi salamat kamong, jadi Antua panggel kamong waktu kamong parcaya Kabar Bae yang katong kasi tau par kamong. Antua panggel kamong biar nanti waktu orang-orang taru hormat par Yesus Kristus, Tuhan yang katong somba tu, kamong jua iko dapa hormat sama-sama deng Antua lai. 15 Jadi basudara yang iko Yesus, kamong musti tetap parcaya deng pegang kuat-kuat ajarang-ajarang yang katong su kasi tau par kamong, lewat katong pung mulu ka lewat surat.
16-17 Katong minta biar Yesus Kristus, Tuhan yang katong somba, deng Allah, katong pung Bapa, kasi kuat kamong pung hati biar kamong parcaya Yesus tarus. Katong jua minta biar Antua tolong kamong par bilang deng biking apa yang bae tarus. Antua sayang katong samua. Antua jua pung hati bae sampe Antua su kasi kuat katong pung hati tarus-tarus deng biking kamong parcaya sunggu-sunggu kalo Antua nanti biking samua yang Antua su janji.