Paulus pung Surat Kadua par Jamaat di
Tesalonika
Tabea
1:1-2
1
1 Par basudara jamaat yang ada di kota Tesalonika, yang su satu hati deng Allah Bapa yang katong somba deng Tuhan Yesus Kristus.Tabea! Ini beta Paulus deng beta pung tamang karja, Silasa deng Timotius.
2 Katong minta biar Allah Bapa yang katong somba deng Tuhan Yesus Kristus kasi berkat basar deng dame par kamong samua.
Paulus minta dangke dari Allah
1:3-12
3 Basudara yang iko Yesus, katong tiga musti minta dangke tarus dari Allah tagal kamong. Memang katong musti minta dangke, tagal kamong labe tamba parcaya Tuhan Yesus deng labe tamba baku sayang satu deng laeng. 4 Tagal itu, waktu katong ada deng Allah pung jamaat-jamaat laeng, katong sanang carita soal kamong. Katong carita kalo kamong tahang hati deng parcaya Tuhan Yesus tarus biar kata kamong dapa siksa deng sangsara. 5 Waktu kamong tahang hati deng parcaya Tuhan Yesus tarus, itu jadi bukti kalo Allah balas samua orang deng batul iko apa yang dong su biking. Allah nanti bilang kalo kamong tu pantas par jadi Antua yang pegang parenta jadi Raja tu pung orang-orang, tagal kamong ada dapa siksa tagal Allah su parenta kamong. 6 Allah tu memang balas samua orang deng batul iko apa yang dong su biking. Antua nanti balas orang-orang yang ada biking kamong sangsara, 7 deng jua kasi lapas kamong dari kamong pung susa deng sangsara. Bagitu lai deng katong. Antua nanti biking bagitu waktu Tuhan Yesus datang dari sorga dalang api yang manyala basar sama-sama deng Antua pung malekat-malekat yang pung kuasa basar. 8 Waktu itu, Antua nanti hukum orang-orang yang seng mau kanal Allah deng orang-orang yang seng iko Kabar Bae soal Tuhan Yesus yang katong somba. 9 Antua nanti hukum dong la dong nanti sangsara tarus-tarus, tagal Antua nanti buang dong dari Antua pung muka la dong seng bisa lia Antua pung kuasa basar yang hebat. 10 Samua ni nanti jadi waktu Tuhan Yesus bale kombali par dapa hormat dari Antua pung orang-orang deng dapa puji-puji dari samua orang yang parcaya Antua. Kamong jua nanti ada sama-sama deng Antua pung orang-orang tu, tagal kamong parcaya samua yang katong su kasi tau par kamong.
11 Basudara, tagal samua tu, katong sombayang seng abis-abis par kamong. Katong sombayang biar Allah yang katong somba, yang panggel kamong, lia kalo kamong pantas par tarima apa yang Antua mau kasi par kamong. Katong minta biar deng Antua pung kuasa, Antua tolong kamong par biking samua hal yang bae macang deng apa yang kamong mau biking tagal kamong parcaya Yesus. 12 Katong sombayang bagitu biar Tuhan Yesus yang katong somba nanti dapa puji-puji tagal apa yang Antua su biking par kamong, la Antua nanti puji-puji kamong tagal kamong su satu hati deng Antua. Samua tu bisa jadi tagal Allah yang katong somba deng Tuhan Yesus Kristus su kasi berkat basar par kamong.