Paulus pung nasehat-nasehat laste par jamaat Filipi
4:1-9
4
1 Basudara samua yang iko Yesus, beta paleng sayang deng rindu kamong paskali. Kamong tu yang biking beta pung hati paleng sanang deng yang angka beta pung muka. Beta su bilang samua yang kamong musti biking. Jadi, kamong musti parcaya Tuhan tarus iko apa yang beta su bilang tu.2 Sio Euodia deng Sintike, beta minta paskali dari kamong dua jang baku malawang. Kamong dua musti satu hati tagal kamong dua sama-sama parcaya Tuhan. 3 La Sunsugos e. Ale tu beta pung tamang yang salalu batamang beta karja par Allah. Beta minta ale tolong dong dua parampuang tu biar dong dua satu hati. Barang, dong dua tu su karja karas sama-sama deng beta par kasi tau Allah pung Kabar Bae par orang-orang. Klemens deng orang-orang laeng jua su karja sama-sama deng beta macang deng dong dua parampuang tu. Allah su tulis dong pung nama-nama di Antua pung buku, yang isi nama-nama orang yang nanti hidop tarus-tarus deng Antua.
4 Basudara samua, kamong pung hati musti paleng sanang tarus tagal kamong su satu hati deng Tuhan. Beta ulang satu kali lai, kamong pung hati musti paleng sanang! 5 Kamong musti kasi unju par samua orang kalo kamong tu pung hati bae. Ingatang! Seng lama lai Tuhan Yesus su mau datang kombali. 6 Jang kamong pung hati susa soal apa sa. Mar, kamong musti sombayang angka hati par Allah soal samua yang jadi dalang kamong pung hidop, la bilang apa yang kamong parlu deng minta dangke dari Antua. 7 Kalo kamong biking bagitu, Allah nanti biking kamong pung hati dame. Dame tu yang nanti jaga kamong pung hati deng pikirang tagal kamong su satu hati deng Yesus Kristus. Orang-orang jua nanti seng abis pikir mangapa sampe kamong pung hati dame bagitu.
8 Jadi basudara e, kamong musti pikir tarus samua yang ada pung guna. Samua yang ada pung guna tu: samua yang batul, samua yang pantas par orang taru hormat, samua yang sama deng Allah pung mau, samua yang seng biking kamong bardosa, samua yang biking orang pung hati sanang, deng samua yang pantas par orang puji. Kamong musti pikir samua-samua tu tarus. 9 La apa sa yang beta su kasi balajar par kamong deng apa sa yang kamong su tarima dari beta, kamong musti biking akang. Bagitu lai deng apa yang kamong su dengar deng lia dari beta, kamong jua musti biking akang bae-bae. Kalo kamong biking bagitu, Allah yang kasi dame par orang-orang tu nanti jaga kamong tarus.
Paulus minta dangke
4:10-20
10 Basudara samua yang iko Yesus, beta pung hati paleng sanang, jadi beta puji-puji Tuhan. Barang, su lama paskali baru kamong kasi unju kombali lai kalo kamong paduli deng beta. Beta tau kalo kamong tu paduli deng beta tarus, cuma waktu itu kamong balong ada jalang sa par kasi unju akang par beta. 11 Beta bilang bagitu bukang tagal beta ada kurang apapa. Beta su balajar puas deng apa yang ada. 12 Beta su tau bagemana hidop kurang deng bagemana hidop labe. Dalang samua yang jadi deng beta pung hidop, beta su balajar par puas deng apa yang beta pung biar kata beta pung poro babunyi ka poro tare, ka beta hidop kurang-kurang ka hidop labe. 13 Beta bisa batahang deng samua yang jadi dalang beta pung hidop tagal Yesus Kristus kasi kuat beta. 14 Mar, kamong su tolong beta lai waktu beta susa. Apa yang kamong su biking tu memang bae.
15 Basudara orang-orang Filipi e, kamong sandiri su tau to! Dolo waktu beta partama kali kasi tau Allah pung Kabar Bae par kamong la beta pi dari propinsi Makedonia tu, seng ada satu jamaat lai yang tolong beta waktu itu. Cuma kamong sa yang tolong beta deng cara kiring kepeng par beta. 16 Deng waktu beta masi ada di kota Tesalonika, kamong kiring kepeng satu dua kali par tolong beta. 17 Beta bilang bagitu bukang tagal beta mau kamong kasi apapa par beta tarus, mar beta mau biar Allah kasi berkat tarus par kamong tagal kamong su tolong beta. 18 Sakarang ni, beta su tarima samua yang kamong kiring par beta lewat Epaproditus, mala labe lai dari sisa. Jadi beta seng kurang apapa satu lai. Apa yang kamong kasi par beta tu, akang sama deng korbang binatang yang orang bakar par Allah yang akang pung asap bobou sadap deng biking Allah pung hati sanang. 19 Allah yang beta somba, yang pung kuasa deng yang paleng kaya paskali tu, Antua nanti kasi samua yang kamong parlu tagal kamong satu hati deng Yesus Kristus. 20 Mari katong puji-puji Allah Bapa yang katong somba tarus-tarus. Amin.
Paulus tutu dia pung surat
4:21-23
21 Basudara e, tolong kiring beta pung hormat jua par Tuhan pung orang-orang samua yang su parcaya Yesus Kristus yang ada di situ. La basudara yang parcaya Yesus Kristus yang ada sama-sama deng beta di sini, dong kiring hormat lai par kamong samua di situ. 22 Tuhan pung orang-orang samua yang ada di kota Roma kiring hormat lai par kamong. Labe-labe lai dong yang karja di Raja Basar Roma pung istana kiring hormat par kamong.
23 Katong minta biar Tuhan Yesus Kristus kasi berkat basar par kamong samua.
Hormat, Paulus