Katong jadi batul di muka Allah tagal parcaya Yesus
3:1-11
3
1 Basudara samua yang iko Yesus, dengar apa yang beta mau bilang ni lai! Kamong pung hati musti sanang paskali tagal kamong su satu hati deng Tuhan. Beta seng rasa pastiu par bilang kombali apa yang beta su parna bilang par kamong. Barang apa yang beta bilang tu, akang bisa tolong kamong par jaga diri dari orang-orang yang kasi balajar ajarang-ajarang yang seng batul. 2 Kamong musti ati-ati paskali deng orang-orang jahat yang kasi balajar ajarang yang seng batul. Dong tu macang deng anjing. Dong ajar kata kalo mau jadi Tuhan pung orang-orang, musti dapa sunat. 3 Mar yang batul tu, katong ni batul-batul Tuhan pung orang-orang, bukang dong tu. Katong ni orang-orang yang somba Tuhan tagal Antua pung Roh yang tolong katong par somba Antua. Katong puji-puji Yesus Kristus deng taru harap cuma par Antua. Katong seng taru harap par apa yang manusia biking iko atorang-atorang Torat biar Tuhan kasi salamat katong. 4 Beta su seng taru harap lai par apa yang manusia biking iko atorang-atorang tu. Kalo ada orang yang pikir dia ada pung alasang par taru harap par atorang-atorang Torat biar Tuhan kasi salamat dia, beta pung alasang labe banya lai dari dia tu. 5 Beta dapa sunat umur dalapang hari. Beta ni orang Ibrani asli. Beta ni Israela pung turunang, dari suku Benjamin. Beta anggota dari kalompok Farisi, kalompok yang pegang apa yang ada di dalang Tuhan pung Kitab Torat yang Musa su tulis tu kuat-kuat. Beta biking akang seng kurang satu titik koma sadiki lai. 6 Mala, waktu itu beta paleng samangat par siksa orang-orang yang parcaya Yesus, tagal beta pikir kalo biking bagitu beta taru hormat par Allah. La kalo soal iko Kitab Torat sa, beta pung hidop batul sampe seng ada yang bisa bilang kalo beta ni ada biking apapa yang sala dari akang Torat tu.7 Mar, samua-samua yang dolo beta anggap bawa untung basar par beta tu, sakarang ni su seng ada arti apapa lai tagal beta mau kanal Yesus Kristus batul-batul. 8 Mala, beta anggap samua-samua seng bawa untung apapa tagal yang paleng panting paskali tu, beta bisa kanal Tuhan Yesus Kristus yang beta somba. Jadi, beta buang samua-samua tu la anggap akang sama deng rumpu busu. Beta su seng pastiu deng akang lai biar beta bisa somba Yesus Kristus, 9 deng biar beta hidop satu hati deng Antua. Allah bilang beta ni batul di muka Antua, bukang tagal beta biking apa yang ada di dalang Kitab Torat, mar tagal beta parcaya Kristus. Jadi, Allah sandiri yang biking beta jadi batul di muka Antua tagal beta parcaya Kristus. 10 Beta batul-batul mau kanal Yesus Kristus. Beta batul-batul mau biar Antua pung kuasa yang kasi hidop Antua kombali tu karja dalang beta pung hidop. Beta jua mau susa deng sangsara sama deng Antua. Kalo orang-orang siksa beta sampe mati, seng apapa. Barang, orang-orang jua siksa Yesus Kristus sampe mati. 11 La kalo beta mati, Allah nanti kasi hidop beta kombali.
Katong musti usaha sunggu-sunggu par jadi sama deng Yesus Kristus
3:12-16
12 Basudara samua yang iko Yesus, beta seng parna anggap kalo beta ni su biking samua yang beta musti biking, ka anggap beta pung hidop ni batul, seng ada dosa sama sakali macang deng Yesus Kristus. Mar, beta usaha sunggu-sunggu biar beta bisa jadi sama deng Antua tagal Antua su pili beta par jadi Antua pung orang.
13 Basudara e, beta jua seng anggap kalo beta pung hidop su sama deng Yesus. Mar, satu yang beta biking tu, beta usaha sunggu-sunggu tarus par jadi sama deng Yesus Kristus. Beta seng mau inga-inga hal-hal yang dolo beta anggap panting tu. 14 Beta sama deng orang yang ada baku taru lari dalang lomba yang seng pastiu deng apa yang ada di balakang biar dapa juara. Beta musti lari kuat-kuat tarus sampe di garis finis biar beta dapa hadia. Hadia tu, Allah panggel beta par tinggal sama-sama deng Antua di sorga tagal Yesus Kristus su mati par kasi salamat beta.
15 Tagal itu, katong samua yang su batumbu deng baakar kuat-kuat dalang katong pung parcaya par Yesus Kristus, katong musti hidop iko apa yang beta su bilang tu. Mar, kalo dari kamong ada yang pikir laeng dari apa yang beta su bilang tu, Allah sandiri yang nanti tolong dia par mangarti bae-bae kalo apa yang beta su bilang tu batul. 16 Mar yang panting tu, katong musti hidop iko apa yang Allah su kasi unju par katong musti biking.
Jang iko orang yang musu Yesus pung cara hidop
3:17-21
17 Basudara samua yang iko Yesus, beta minta kamong iko beta pung cara hidop. Beta jua minta kamong taru kira bae-bae orang-orang yang pung hidop macang deng katong la iko akang.* 18 Barang, banya orang bilang kalo dong parcaya Yesus Kristus, mar dari dong pung hidop kantara kalo dong tu musu Yesus Kristus deng seng mau tarima ajarang soal mangapa sampe Antua mati di kayo salib. Beta su bilang ulang-ulang soal orang-orang yang macang bagitu par kamong, la sakarang ni beta bilang akang lai par kamong deng aer mata malele-malele. 19 Orang-orang yang macang bagitu, Allah nanti angka buang dong ka dalang naraka. Dong hidop cuma par iko dong pung napsu. Dong seng tau malu. Dong biking hal-hal yang kalo iko batul itu biking malu dong, mar dong pikir dong hebat. Dong cuma pikir dunya pung mau sa. 20 Mar katong ni orang-orang yang pung hak par tinggal di sorga. Katong ada rindu paskali par Tuhan Yesus Kristus yang Kasi Salamat Manusia datang kombali dari sana. 21 Waktu Antua datang, Antua nanti roba katong pung badang yang bisa ancor ni jadi badang yang baru yang seng bisa ancor deng yang paleng bagus. Katong pung badang yang baru tu sama deng Antua pung badang sandiri yang seng bisa ancor deng yang paleng bagus. Antua bisa biking bagitu tagal Antua ada pung kuasa par biking apa sa tundu iko Antua pung parenta.