Nasehat biar hidop iko Yesus Kristus pung cara hidop
2:1-11
2
1 Basudara e, kamong pung hati kuat tagal kamong su hidop satu hati deng Yesus Kristus. Kamong pung hati sanang tagal Kristus sayang kamong. Kamong laeng deng laeng su hidop satu hati tagal Allah pung Roh yang ator kamong pung hidop. Kamong jua laeng sayang laeng deng laeng tolong laeng. 2 Tagal kamong samua hidop macang bagitu, beta minta kamong biking beta pung hati labe tamba sanang lai bagini: Kamong musti satu pikirang, musti baku sayang, musti satu hati, deng satu maksud. 3 Jang biking apapa biar orang anggap kamong tu labe panting ka biar orang puji kamong. Mar, kamong musti randa hati deng anggap orang laeng labe panting dari kamong pung diri sandiri. 4 Jang satu-satu cuma pikir dia pung diri sandiri sa, mar musti pikir orang laeng lai.5 Kamong pung hati deng pikirang musti macang deng Yesus Kristus pung hati deng pikirang:
6 Biar kata Antua tu Allah,
mar Antua seng parna pikir par pegang Antua pung hak tu kuat-kuat.
7 Mala, Antua kasi tinggal samua-samua tu la jadi sama deng jongos.
Antua jadi manusia sama deng katong.
8 La waktu Antua jadi manusia, Antua biking diri macang deng orang yang seng pung arti apapa.
Antua iko Allah pung mau tarus sampe Antua kasi Antua pung diri par mati.
Mala, Antua mati di kayo salib macang deng Antua tu orang yang paleng jahat.
9 Tagal itu sampe Allah angka Antua par dudu di tampa paleng panting
deng kasi kuasa yang labe basar dari samua kuasa yang ada par Antua.
10 Allah biking bagitu biar samua yang ada di sorga, di dunya, deng di dalang kubur,
dong nanti tikang lutu somba Yesus.
11 Dong jua nanti mangaku di muka orang banya kalo Yesus Kristus tu, Tuhan yang parenta katong samua.
La deng bagitu, Allah Bapa nanti dapa puji deng dapa hormat.*
Nasehat biar hidop macang deng tarang
2:12-18
12 Basudara samua yang beta sayang, tagal Kristus iko Allah pung mau, kamong musti biking bagitu lai. Memang kamong su biking bagitu waktu beta ada sama-sama deng kamong, labe-labe lai sakarang ni waktu beta seng ada sama-sama deng kamong. Kamong musti usaha sunggu-sunggu tarus par jaga kamong pung hidop bae-bae deng musti taku par biking dosa, tagal kamong tu orang-orang yang Antua su kasi salamat. 13 Barang, Allah sandiri yang karja dalang kamong pung hati sampe kamong mau hidop iko Antua pung mau deng yang tolong kamong par biking akang.
14 Jadi apa sa yang kamong biking, kamong jang biking akang deng barsungut ka baku malawang, 15 biar orang-orang bisa lia kalo kamong tu Allah pung anana yang seng biking kajahatang, seng biking dosa, deng seng ada pung sala di tenga-tenga orang-orang jahat deng orang-orang bardosa. Jadi, kamong pung kalakuang tu musti labe bae dari dong kalakuang biar kamong jadi macang deng tarang yang manyala di dunya yang galap. 16 Kamong musti kasi tau Allah pung Kabar Bae tarus soal bagemana dong bisa hidop tarus-tarus deng Antua. Kalo kamong biking samua tu, beta pung hati nanti paleng sanang waktu Yesus Kristus bale kombali ka dunya. Barang, beta pung usaha yang sunggu-sunggu deng karja karas par kasi tau Allah pung Kabar Bae, akang seng parcuma. 17 Mangkali beta nanti dapa bunu la beta pung dara tatumpa macang deng korbanga par Allah tagal beta su kasi tau Kabar Bae par kamong. Kamong jua sangsara tagal parcaya Kabar Bae tu. Mar biar kata bagitu, beta pung hati paleng sanang sama-sama deng kamong samua. 18 Jadi, kamong pung hati jua musti paleng sanang sama-sama deng beta.
Soal Timotius deng Epaproditus
2:19-30
19 Basudara samua e, kalo Tuhan Yesus sayang, beta harap seng lama lai beta bisa suru Timotius pi lia kamong, biar waktu dia bale, beta bisa dengar kamong pung kabar dari dia biar beta pung hati jua sanang. 20 Beta suru dia pi tagal cuma dia sa yang satu hati deng satu pikirang deng beta, yang batul-batul paduli deng kamong. 21 Dong yang laeng tu cuma pikir dong pung diri sandiri sa. Dong seng pastiu deng Yesus Kristus pung mau. 22 Kamong sandiri su tau soal bagemana Timotius pung karja to? Dia su karja karas sama-sama deng beta par kasi tau Allah pung Kabar Bae par orang-orang. Dia su bantu beta macang deng ana satu yang bantu dia pung bapa sandiri. 23 Jadi, nanti waktu beta su tau beta pung parkara ni bagemana, beta langsung suru dia pi par kamong. 24 Mar, beta parcaya kalo Tuhan pasti buka jalang biar seng lama lai beta bisa datang par kamong.
25 Mar, soal Epaproditus yang dolo kamong suru dia datang par tolong beta tu, beta pikir labe bae beta suru dia bale kombali par kamong. Dia su karja sama-sama deng beta par kasi tau deng bela Allah pung Kabar Bae macang deng tantara yang seng taku mati. Beta su anggap dia macang deng beta pung sudara sandiri. 26 Beta pikir par suru dia bale par kamong tagal dia su rindu paskali par baku dapa deng kamong samua. Dia pung hati tinggal kong balisa tagal kamong su dengar kabar kalo dia saki. 27 Memang batul dia saki sampe amper mati. Mar tagal Allah kasi unju Antua pung hati bae par dia, dia bae. Antua kasi unju Antua pung hati bae bukang cuma par dia sa, mar par beta lai. Antua kasi bae dia biar beta pung hati seng tamba susa kalo sampe dia mati. 28 Tagal itu, beta mau paskali par suru dia bale kombali par kamong, biar kamong pung hati sanang waktu baku dapa deng dia deng biar beta pung hati jadi tenang lai. 29 Jadi, beta minta kamong tarima dia deng hati yang paleng sanang tagal dia tu kamong pung sudara yang parcaya Tuhan. Kamong jua musti taru hormat par orang-orang macang dia tu. 30 Barang, dolo dia amper mati tagal karja par Yesus Kristus. Dia seng taku mati par tolong beta di sini ganti kamong.