Filipi 1

Paulus pung Surat par Jamaat di

Filipi

Tabea

1:1-2

1-2 Par basudara jamaat yang jadi Allah pung orang-orang, yang su satu hati deng Yesus Kristus di kota Filipi. Par pamimping-pamimping jamaat deng diaken-diaken lai.

Tabea! Ini beta Paulus deng beta pung tamang Timotius. Katong dua ni Yesus Kristus pung orang suru-suru. Katong dua minta biar Allah Bapa yang katong somba deng Tuhan Yesus Kristus kasi berkat basar deng dame par kamong samua.

Paulus minta dangke dari Allah deng sombayang par jamaat Filipi

1:3-11

3 Basudara e, sabang kali beta inga kamong, beta minta dangke banya-banya dari Allah yang beta somba. 4 La sabang kali beta sombayang par kamong samua, beta sombayang deng hati paleng sanang. 5 Barang, kamong su bantu beta pung karja par kasi tau Kabar Bae soal Yesus Kristus par orang-orang, mulai dari partama kali kamong parcaya Kabar Bae tu sampe oras tadi ni. 6 Beta parcaya kalo Allah yang su mulai biking apapa yang bae di dalang kamong pung hati, Antua nanti biking akang tarus sampe akang abis waktu Yesus Kristus bale kombali ka dunya ni. 7 Memang seng sala kalo beta bapikir macang bagitu soal kamong, tagal beta sayang kamong samua. Barang, kamong su bantu beta par biking Tuhan pung karja yang Antua su kasi par beta tagal Antua pung hati bae. Kamong bantu beta waktu beta dapa rante dalang bui deng waktu beta bela Kabar Bae soal Yesus Kristus di muka orang-orang yang malawang akang. 8 Allah yang jadi saksi kalo beta rindu paskali par baku dapa kombali deng kamong samua, tagal beta sayang kamong macang deng Yesus Kristus sayang kamong.

9 Basudara e, beta sombayang biar kamong labe tamba sayang Allah deng orang laeng tarus. Beta sombayang biar kamong nanti labe tamba tau deng mangarti batul-batul apa yang bae deng apa yang seng bae. 10 Beta sombayang macang bagitu biar kamong nanti bisa pili apa yang paleng bae yang kamong musti biking. Beta jua sombayang biar kamong pung hidop barsi deng biar kamong seng bardosa sampe waktu Yesus Kristus bale kombali. 11 Beta sombayang macang bagitu biar kamong salalu biking apapa yang bae, tagal Yesus Kristus tolong kamong par biking bagitu. La waktu orang-orang lia kamong biking bagitu, dong nanti taru hormat par Allah deng puji-puji Antua.

Paulus sanang tagal Kabar Bae soal Yesus Kristus tasiar tarus

1:12-26

12 Basudara samua yang iko Yesus e, sakarang ni beta mau kamong tau kalo samua yang jadi par beta ni seng bisa pele beta par kasi tau Allah pung Kabar Bae. Mala akang biking orang labe banya lai parcaya Allah pung Kabar Bae tu, 13 sampe samua tantara yang jaga Raja Basar Roma pung istana deng samua orang di sini jua tau kalo beta maso bui ni tagal beta karja par Yesus Kristus. 14 La tagal beta maso bui ni jua, basudara-basudara yang iko Yesus jadi labe tamba parcaya Antua deng labe barani, seng taku-taku lai par kasi tau Kabar Bae tu par orang-orang.

15 Memang batul kalo ada babarapa orang yang kasi balajar soal Yesus Kristus tagal dong culas par beta deng tagal dong mau orang-orang anggap dong labe panting dari beta. Mar, ada orang laeng yang kasi balajar soal Yesus Kristus tagal dong mau bantu beta biar Allah pung Kabar Bae tasiar tarus. 16 Dong kasi tau soal Yesus par orang-orang tagal dong sayang beta. Barang, dong tau kalo Allah pili beta par bela Antua pung Kabar Bae. 17 Mar yang laeng tu, dong kasi balajar soal Yesus Kristus tagal dong mau orang-orang anggap dong labe panting dari beta. Dong pung hati kotor. Dong pikir kalo dong bisa biking orang-orang iko dong, beta nanti makang hati la tamba susa dalang bui.

18 Mar seng apapa jua. Biar kata dong pung hati tu barsi ka kotor ka, itu seng panting par beta. Yang panting tu, Kabar Bae soal Yesus Kristus bisa tasiar tarus. Ini ni yang biking beta pung hati sanang. Labe-labe lai beta pung hati nanti sanang tarus 19 tagal beta batul-batul tau kalo Allah nanti kasi salamat beta dari sangsara ni. Antua kasi salamat beta tagal kamong sombayang par beta deng tagal Yesus Kristus pung Roh yang bantu beta. 20 Beta batul-batul mau deng harap paskali kalo beta seng parna biking apapa yang bisa biking malu beta pung diri sandiri. Mala, beta harap paskali kalo beta barani kasi tau Allah pung Kabar Bae par orang-orang, macang yang beta salalu biking. Apalai sakarang ni, beta harap beta labe barani lai. Biar kata beta hidop ka mati ka, beta seng ambe pusing. Yang panting dari apa yang beta biking, orang-orang puji-puji Yesus Kristus. 21 Tagal par beta, beta pung hidop samua ni cuma par Yesus Kristus biar orang puji-puji Antua. Mar kalo beta mati, itu jua labe bae, tagal beta bisa hidop sama-sama deng Antua di sorga. 22 Mar, kalo beta hidop tarus di dunya ni, beta bisa kasi balajar orang-orang tarus soal Yesus Kristus biar labe banya orang parcaya Antua. Jadi, beta bingong seng tau mau pili yang mana. 23 Beta macang deng orang yang badiri di dua mata jalang, seng tau mau pili yang mana. Yang satu, beta rindu paskali par kasi tinggal dunya ni biar beta bisa tinggal sama-sama deng Yesus Kristus di sorga, tagal itu yang paleng bae par beta. 24 Mar yang satu lai, labe bae beta hidop tarus di dunya ni tagal kamong masi parlu beta. 25 Beta batul-batul tau kalo kamong masi parlu beta, jadi beta tau kalo beta musti tinggal tarus sama-sama deng kamong samua. Beta musti hidop biar beta bisa tolong kamong par labe sunggu-sunggu parcaya Kristus deng biking kamong pung hati labe tamba sanang tagal kamong parcaya Antua. 26 Jadi waktu beta bale kombali, kamong nanti sunggu-sunggu puji-puji Yesus Kristus tagal Antua su biking beta bale par kamong.

Nasehat biar parcaya Yesus Kristus tarus

1:27-30

27 Basudara e, biar kata apa yang mau jadi lai, kamong musti hidop iko apa yang Allah pung Kabar Bae su bilang soal Yesus Kristus tu. La kalo beta datang kombali, beta bisa lia kamong pung hidop deng beta pung mata kapala sandiri. Mar kalo beta seng datang, beta bisa dengar carita dari orang-orang soal kamong. Beta bisa dengar kalo kamong samua tu satu hati deng satu maksud par seng mundur sadiki lai dari kamong pung parcaya par Kabar Bae soal Yesus Kristus, deng sama-sama malawang orang-orang yang seng parcaya akang. 28 Jang taku sadiki lai deng orang-orang yang malawang kamong. Kalo kamong seng taku dong, itu jadi tanda par dong kalo Allah nanti angka buang dong ka dalang naraka. Mar par kamong sandiri, itu jadi tanda kalo Antua nanti kasi salamat kamong. Antua yang biking sampe samua tu jadi. 29 Barang, Allah kasi unju Antua pung hati bae par kamong, bukang cuma biar kamong parcaya Yesus Kristus, mar jua biar kamong bisa susa deng sangsara tagal parcaya Antua. 30 Sakarang kamong ada susa deng sangsara tagal orang-orang yang siksa kamong seng mau Kabar Bae soal Yesus tu tasiar tarus. Akang macang deng yang dolo kamong lia jadi par beta. Bagitu lai deng yang sakarang kamong dengar jadi par beta di dalang bui ni.