Kolose 2

1 Basudara e, beta mau kamong tau soal bagemana beta karja banting tulang par tolong kamong orang-orang Kolose, tolong orang-orang parcaya yang ada di kota Laodikia, deng samua orang yang balong parna baku dapa langsung deng beta. 2 Beta biking bagitu biar kamong samua pung hati kuat deng baku sayang satu deng laeng sampe kamong samua jadi satu hati. La deng bagitu, kamong samua jadi batul-batul mangarti deng parcaya Allah pung rencana soal Kristus, yang dolo Antua sambunyi mati-mati dari kamong. 3 Cuma Kristus sandiri sa yang bisa biking katong mangarti Allah pung mau deng rencana yang paleng hebat deng luar biasa, yang Antua biking deng Antua pung pikirang-pikirang tajang, yang dolo tasambunyi tu. 4 Beta bilang bagini, biar kamong jang tagoyang waktu dengar ajarang-ajarang yang seng batul, biar kata dong bicara deng mulu manis lai. 5 Barang, biar kata beta jau dari kamong, mar beta pung hati ada salalu sama-sama deng kamong. Beta pung hati sanang waktu dengar kalo kamong samua hidop satu hati deng tetap parcaya Kristus tarus.

Hidop satu hati deng Kristus

2:6-19

6 Basudara e, tagal kamong su tarima Yesus Kristus jadi kamong pung Tuhan yang kamong musti dengar-dengarang Antua, kamong musti tetap hidop satu hati deng Antua. 7 Kamong musti tetap batumbu deng baakar kuat-kuat dalang kamong pung parcaya par Antua, sama deng apa yang kamong su parna dapa kasi balajar. La deng hati sanang, minta dangke banya-banya dari Antua tarus.

8 Kamong musti jaga diri bae-bae jang sampe ada orang bawa kamong par iko dong pung ajarang-ajarang yang seng batul deng seng ada pung guna apapa. Barang, dong pung ajarang-ajarang tu bukang dari Kristus, mar dari manusia pung pikirang deng dari adat yang dong dapa dari dong pung tete-nene moyang. 9 Tagal itu, jang iko dong tu, tagal Allah pung kuasa deng tabiat samua ada di Kristus pung diri. 10 Kristus tu kapala par samua kuasa deng samua yang pegang parenta di langit deng dunya. Jadi, tagal kamong su satu hati deng Antua, kamong seng parlu tamba yang laeng lai. Itu sa su sampe!

11 Tagal kamong su satu hati deng Kristus, kamong tu macang deng orang yang su sunat. Mar, sunat tu bukang sunat yang manusia biasa biking iko dong pung atorang agama, mar sunat hati. Sunat hati tu pung arti kamong su potong buang kamong pung tabiat hidop yang bardosa, tagal Kristus pung kuasa. 12 Waktu kamong dapa baptis, itu sama sa deng kamong tu su mati la dapa kubur sama-sama deng Kristus la su hidop kombali sama-sama deng Antua lai. Kamong su hidop kombali tagal kamong parcaya kalo Allah, yang pung kuasa par kasi hidop Yesus Kristus kombali tu, Antua bisa karja jua dalang kamong pung hidop. 13 Dolo waktu kamong balong parcaya Kristus, kamong tu macang deng orang yang su mati. Barang, kamong jaga langgar Allah pung parenta deng seng dapa sunat tagal kamong bukang orang Yahudi. Mar sakarang, Allah su biking kamong hidop kombali sama-sama deng Kristus. Allah su kasi ampong katong pung dosa-dosa samua. 14 Memang katong samua su bardosa deng musti dapa hukum tagal katong malawang Antua pung atorang-atorang. Mar, tagal Yesus mati di kayo salib, Allah kasi ampong katong pung dosa-dosa deng kasi lapas katong dari hukumang barát yang katong musti pikol tu. 15 La waktu Kristus mati di kayo salib, Antua kasi kala roh-roh jahat yang pegang parenta deng yang pung kuasa la kasi unju par samua-samua yang ada di langit deng dunya kalo Antua su manang.

16 Tagal itu basudara e, jang dengar orang yang coba paksa kamong par iko dong pung atorang-atorang tu. Dong bilang kata kamong sala tagal kamong makang deng minong apa yang dong larang. Dong bilang kata kamong sala tagal kamong seng biking hari-hari basar ka, pesta bulang baru ka, ka hari Barenti Karja. Jang dengar dong, tagal 17 dolo Allah kasi atorang-atorang tu cuma par kasi unju soal apa yang katong tunggu-tunggu. Kristus tu yang katong tunggu-tunggu tu. 18 Jang dengar orang-orang yang somba malekat-malekat deng yang pura-pura randa hati tu par coba paksa kamong par iko dong pung atorang-atorang. Kalo kamong iko dong, kamong nanti seng tarima berkat-berkat yang Allah su janji par kamong. Dong bilang kata dong dapa tanda dari sorga la dong anggap diri labe hebat dari orang laeng, biar kata dong seng ada pung dasar par biking bagitu. Dong pung pikirang tu seng datang dari Allah mar dari dong pung diri sandiri. 19 Dong tu seng taika deng Kristus. Sapa tau, Kristus tu kapala, la jamaat tu macang deng badang. Antua yang biking sampe katong taika jadi satu deng Antua, macang deng urat-urat yang biking sampe badang pung bagiang yang beda-beda taika jadi satu. Antua yang biking sampe jamaat labe tamba batumbu deng baakar dalang dong pung parcaya, sama deng apa yang Allah mau.

Orang-orang parcaya pung hidop yang baru

2:20—3:17

20-21 Basudara e! Kamong su satu hati deng Kristus, jadi itu sama sa deng kamong su mati sama-sama deng Antua. Kamong pung hati deng pikirang su seng sama deng dunya lai. Mar, mangapa kong kamong masi hidop sama deng orang-orang yang masi tarika deng dunya pung atorang deng adat lai? Mangapa kong kamong masi iko atorang-atorang tu? Dong bilang, “Jang loko ini!” Ka, “Jang makang itu!” Ka, “Jang kore itu!” 22 Atorang-atorang tu cuma bicara soal makanang deng minomang yang seng bisa batahang lama, tagal abis orang makang deng minong, abis. Atorang-atorang tu, manusia biking akang iko dong pung mau sandiri. 23 Memang kalo lia dari luar, atorang-atorang tu paleng bagus tagal akang ajar orang par rajing pi ibada, randa hati, deng siksa dong pung diri sandiri par biking Allah pung hati sanang. Mar, atorang-atorang tu seng ada pung guna apapa, tagal akang seng tolong dong par roba dong pung napsu jahat.