Paulus pung Surat par Jamaat di
Kolose
Tabea
1:1-2
1
1-2 Par basudara samua di kota Kolose yang su jadi Allah pung orang-orang, yang parcaya Yesus Kristus tarus.Tabea! Beta ni Paulus yang Allah pili par jadi Yesus Kristus pung utusang.
Beta deng katong pung sudara Timotius minta biar Allah Bapa yang katong somba kasi berkat basar deng dame par kamong samua.*
Paulus minta dangke dari Allah
1:3-14
3 Basudara e, sabang kali katonga sombayang par kamong, katong salalu minta dangke dari Allah, Tuhan Yesus Kristus yang katong somba pung Bapa. 4 Barang, katong su dengar kalo kamong parcaya Yesus Kristus tarus deng sayang Allah pung orang-orang samua. 5 Kamong biking bagitu, tagal kamong ada harap par tarima apa yang Allah su kasi siap par kamong di sorga. Kamong su tau itu kamuka dalang ajarang yang batul soal Yesus. Ajarang tu Kabar Bae 6 yang orang su kasi tau akang par kamong. Akang su tasiar sampe ka samua tampa di dunya, la orang-orang yang parcaya Yesus Kristus su labe tamba banya deng dong pung tabiat hidop su seng sama deng dolo lai. Bagitu lai deng kamong. Dari partama kali kamong dengar Kabar Bae tu, kamong pung tabiat hidop su seng sama deng dolo lai, deng kamong su labe tamba mangarti batul-batul soal Allah pung sayang deng bae par kamong. 7 Kamong su tau Kabar Bae tu dari katong pung tamang karja Epafras yang katong sayang. Dia seng putus-putus karja par Kristus deng biking Antua pung mau par kamong pung bae.* 8 Dia jua su bilang par katong kata Allah pung Roh pung kuasa su biking sampe kamong baku sayang satu deng laeng.
9 Tagal itu basudara e, waktu katong dengar soal samua yang jadi deng kamong tu, katong seng putus-putus sombayang par kamong. Katong minta dari Allah biar Antua pung Roh kasi pikirang tajang par kamong deng biking kamong mangarti batul-batul Antua pung mau. 10 Deng bagitu, kamong bisa hidop iko Antua pung mau deng biking Antua pung hati sanang. Katong sombayang bagitu jua biar kamong salalu biking samua hal yang bae deng labe tamba tau soal Allah. 11 Katong sombayang jua biar Antua kasi kuat kamong deng Allah pung kuasa yang hebat paskali tu, biar waktu kamong dalang susa deng sangsara, kamong bisa tahang hati tarus deng sabar par tarima samua tu deng hati sanang. 12 Katong jua sombayang biar kamong minta dangke dari Allah Bapa yang su biking kamong pantas par tarima apa yang Antua su kasi siap par Antua pung orang-orang di Antua pung karajaang yang tarang. 13 Antua su kasi lapas katong dari setang pung karajaang yang galap, la su bawa katong ka Antua pung Ana yang Antua sayang tu pung karajaang. 14 Antua pung Ana tu yang su tabus katong dari katong pung dosa-dosa la Antua su kasi ampong katong.*
Kristus labe basar dari samua-samua
1:15-23
15 Basudara e, seng ada orang yang bisa lia Allah. Mar waktu katong lia Yesus Kristus, itu sama sa deng katong su lia Allah deng tau Antua pung tabiat deng kuasa macang apa. Yesus Kristus tu su ada dari waktu langit deng dunya balong ada lai, deng pegang kuasa par samua-samua yang ada. 16 Barang lewat Antua, Allah biking samua yang ada di sorga deng yang ada di dunya, yang katong bisa lia deng yang katong seng bisa lia, yang pung kuasa deng yang pegang parenta, macang malekat-malekat deng roh-roh. Allah biking samua-samua tu lewat Yesus biar Yesus dapa puji. 17 Waktu samua-samua balong ada lai, Kristus su ada. La Antua yang ator deng kalesang samua-samua deng Antua pung kuasa. 18 Kristus tu kapala par Antua pung jamaat la jamaat tu macang deng Antua pung badang. Antua tu yang kasi hidop yang baru par Antua pung jamaat, tagal Antua yang bangkit labe kamuka dari samua orang yang mati, biar Antua jadi yang paleng panting dari samua-samua yang ada.* 19 Barang, Allah mau biar samua kuasa deng tabiat yang ada di Antua, akang ada di Antua pung Ana lai. 20 La tagal Antua pung Ana pung dara tatumpa di kayo salib, Antua baku bae deng samua-samua yang ada di dunya deng yang ada di sorga.*
21 Dolo, kamong jua hidop jau dari Allah deng musu Antua tagal kamong pung kalakuang deng pikirang yang jahat. 22 Mar sakarang, tagal Antua pung Ana mati di kayo salib, Antua su buka jalang biar kamong bisa baku bae kombali deng Antua. Deng cara bagitu, Allah anggap kamong tu orang yang seng bardosa, seng pung sala, deng seng biking apa sa yang jahat, 23 asal kamong tetap parcaya Kristus tarus, seng mundur, deng seng tagoyang dari kamong pung parcaya tu! Jang barenti par harap apa yang Allah su janji par kamong waktu kamong tarima Kabar Bae. Kabar Bae tu su tasiar sampe ka samua tampa di dunya. La beta Paulus su dapa angka par jadi Antua pung orang karja par pi kasi tau Kabar Bae tu.
Paulus pung karja par Allah pung orang-orang
1:24—2:5
24 Basudara e, sakarang ni beta pung hati sanang tagal beta tau kalo beta pung susa deng sangsara ni, itu par tolong kamong. Allah su ator biar beta dapa susa deng sangsara ni. Akang macang deng tugas yang beta musti kasi klar par tolong Kristus pung jamaat. Kristus jua su susa deng sangsara par tolong dong, yang macang deng Antua pung badang sandiri tu. 25 Allah su pili beta jadi Antua pung orang karja par tolong Antua pung orang-orang. Antua pili beta par kasi tau Antua pung ajarang samua-samua par kamong yang bukang Yahudi. 26 Dari dolo, Antua sambunyi Antua pung rencana mati-mati dari samua orang, mar sakarang Antua kasi tau akang tarang-tarang par Antua pung orang-orang. 27 Antua putus par kasi tau akang par dong biar dong tau Antua pung rencana yang paleng hebat deng luar biasa tu par orang-orang bukang Yahudi. Antua pung rencana tu bagini: Yesus Kristus tinggal dalang kamong pung hati. Jadi, kamong bisa tau deng parcaya kalo kamong nanti ada sama-sama deng Antua di Antua pung tampa yang luar biasa di sorga.
28 Jadi, katong ada kasi tau soal Yesus Kristus tu par samua orang tarus. La deng pikirang tajang yang Allah su kasi par katong, katong tagor deng kasi balajar dong. Katong biking bagitu biar katong bisa bawa samua orang parcaya di muka Allah, tagal dong su batul-batul batumbu deng baakar kuat-kuat dalang dong pung parcaya par Kristus. 29 Tagal samua tu, beta usaha sunggu-sunggu par biking beta pung karja ni deng kuasa yang Antua kasi par beta, yang karja luar biasa dalang beta pung diri.